बाँकेमा रहेका मधेसी समुदाय बीच आफ्नो बेग्लै पहिचान स्थापित गर्न उद्दत, कसौंधन वैश्य समाजले आफ्नो समुदायका विवाद समाजभित्रैबाट समाधान पहलकदमीका लागि छुट्टै संयन्त्र बनाएको छ । ‘स–साना विवादहरू बढ्दै समस्याले उग्र रूप लिंदा परेको सामुदायिक क्षति कम गर्न संयन्त्रले पहलकदमी लिनेछ’, कसौंधन महिला समाजकी अध्यक्ष सरिता वैश्यको संयोजकत्वमा संयन्त्र गठन गरिएको जानकारी दिंदै कसैंधन वैश्य समाजका अध्यक्ष सन्तोष कुमार वैश्यले दैनिक नेपालगन्जसँग भने, ‘मेलमिलाप समितिले सम्बन्धित पक्षको घरमै गएर दुई पक्षीय छलफल, परामर्शपछि आवश्यक निर्णय सहितको सुझाव दिनेछ ।’
आफ्नो गाउँठाउँ र समाजभित्र भए गरेका विवादको निप्ठयारा लगाउन प्रहरी कहाँ पुग्ने प्रवृत्तिले विवाद बढ्दै जाने र तेस्रो पक्षले मौकाको फाइदा उठाउने समस्या बढ्दै गएपछि ‘मेलमिलाप समिति गठन गरिएको’ अध्यक्ष वैश्यको भनाइ छ । समितिमा अध्यक्ष वैश्य आफै पदेन सदस्य छन् । उनीसँगै कसौंधन वैश्य युवा समाजका अध्यक्ष सञ्जय कुमार गुप्ता वैश्य पनि पदेन छन् । अनुपमा वैश्य र सुनिता गुप्ता सदस्य रहेको मेलमिलाप समितिले मेलमिलाप समितिले समस्या आइपर्दा छलफल, परामर्शबाट निकाय खोज्ने बताइएको छ ।
‘कसौंधन वैश्य समाज भित्रका आपसी भेदभाव, पारिवारिक मामिलाका विवाद सकभर समाज बाहिर नजाओस् भन्ने हाम्रो उद्देश्य हो’, समाजका अध्यक्ष वैश्यले भने, ‘त्यसरी बाहिर जाँदा वा प्रहरी समक्ष पुग्दा व्यक्ति परिवारसँग समाज नै कलंकित हुन पुग्छ, सम्बन्धित पक्ष, विपक्षले पनि अनाहकको दुःख पाइरहेको हुन्छ ।’ अध्यक्ष वैश्यले प्रहरी प्रशासन र अदालतको ढोका गुहार्दा आर्थिक रूपमा पनि निकै ठूलो क्षति व्यहोर्नु परेका तमाम उदाहरण आफ्नो समाजमा रहेको अनुभव सुनाउँदै भने, ‘अन्ततः मिलाप नै उचित विकल्प हो भन्ने हाम्रो ठम्याई हो ।’
‘केहीगरी मिल्दैनन् भने कानुनी उपचारमा जाने, कानुन बमोजिमको अधिकार जो कसैलाई पनि छँदैछ’, अध्यक्ष वैश्यले मेलमिलाप समितिको उद्देश्यबारे प्रष्ट पार्दै भने, ‘सकेसम्म हाम्रो कोशिश हो सामुदायिक स्तरका झैझगडा, स–साना विवाद समाजभित्रै बसेर निप्ठयारा लगाउँ ।’
समाजमा नयाँ सदस्यलाई जिम्मेवारी –
कसौंधन वैश्य समाजले नयाँ सदस्य मनोनयन गर्दै उनीहरुलाई जिम्मेवारी प्रदान गरेको जनाएको छ । कसौंधन वैश्य समाजका महासचिव विजय कुमार वैश्यका अनुसार, समितिमा दिपेन्द्र कुमार गुप्ता र वीरेन्द्र कुमार गुप्तालाई मनोनयन गरिएको छ । डा. पंकज कुमार गुप्ता र पवन कुमार वानियाँलाई पदमुक्त गरी दिपेन्द्र र वीरेन्द्रलाई मनोनयन गरिएको हो । ‘समाजलाई गतिशिलता दिन विधान बमोजिम नयाँ मनोनयन गरिएको हो’, समाजका अध्यक्ष सन्तोष कुमार वैश्यले दैनिक नेपालगन्जसँग भने, ‘यसअघि महासचिवमा समेत विजय कुमार वैश्यलाई ल्याउने निर्णय कार्यसमितिले गरेको थियो ।’
समाजले जिल्ला भरी रहेका कसौंधन वैश्यहरुको जनगणना एकिन गर्नेदेखि सामाजिक, धार्मिक, सामुदायिक स्तरमा विभिन्न गतिविधि गरिरहेको जनाएको छ । सन्तोष कुमार वैश्यको अध्यक्षतामा रहेको समितिमा उपाध्यक्ष रामलखन वैश्य, महासचिव विजय कुमार वैश्य (गुप्ता), कोषाध्यक्ष सन्तोष कुमार वैश्य, सचिव सन्तोष बाबु आर्य र सदस्यहरुमा वीरेन्द्र कुमार वैश्य, सुनिता गुप्ता, माधव प्रसाद कसौंधन, वीरेन्द्र कुमार गुप्ता (वीरु), सुरेन्द्र कुमार गु्प्ता, राजकुमार वैश्य र दिनेश कुमार वैश्य छन् ।
सञ्जय कुमार गुप्ता र सरिता वैश्य पदेन सदस्य रहेको केन्द्रीय समितिमा अधिवक्ता विनोद कुमार गुप्ता कानुनी सल्लाहकार रहेको अध्यक्ष वैश्यले जानकारी दिए ।