साहित्यकार समेत रहेका प्राध्यापक डाक्टर हरि प्रसाद तिमिल्सिनाले यस बर्षको लक्षिमा–शेर बहादुर रानाभाट स्मृति पुरस्कार प्राप्त गरेका छन् । साहित्यकार डा. हरि प्रसाद तिमिल्सिनालाई प्रदान गरिएको छ ।
नेपालगन्जमा शनिबार आयोजित एक कार्यक्रमका बीच प्राज्ञ सनत रेग्मीले महेन्द्र बहुमुखी क्याम्पस नेपालगञ्जका उपप्राध्यापक समेत रहेका डा. तिमिल्सिनालाई १५ हजार १ सय १ रूपैयाँ राशीको लक्षिमा–शेर बहादुर रानाभाट स्मृति पुरस्कार प्रदान गरेका हुन् ।
साहित्य क्षेत्रमा पुर्याएको योगदानको उच्च कदर गर्दै भेरी साहित्य समाज केन्द्रीय समिति बाँकेले डा. तिमिल्सिनालाई पुरस्कृत गरेको हो । साहित्यकार भरत बहादुर रानाभाट र उनका भाई भिम बहादुर रानाभाटले आफ्ना स्वर्गीय आमा लक्षिमा रानाभाट र बुवा स्वर्गीय शेर बहादुर रानाभाटको स्मृतिमा २०७२ सालमा भेरी साहित्य समाजमा रु. १ लाख ११ हजार १ सय ११ रूपैयाँको अक्षयकोष खडा गरी पुरस्कार स्थापना गरेका थिए । उनीहरूको बुवाको निधन भएको दिन चैत १८ गते उक्त पुरस्कर दिँदै आइएको छ । भेरी साहित्य समाजका अध्यक्ष इन्द्र बहादुर बस्नेतको अध्यक्षतामा पुरस्कार वितरण समारोह सम्पन्न भएको थियो ।
कार्यक्रममा पुरस्कारका बारेमा भरत बहादुर रानाभाट र पुरस्कृत व्यक्तित्वका बारेमा लेक प्रसाद प्याकुरेलले जानकारी गराएका थिए । कार्यक्रमको सञ्चालन भेरी साहित्य समाजकी महासचिव गीता अर्यालले गरेकी थिइन् भने स्वागत मन्तव्य सचिव प्रभात सुवेदीले ब्यक्त गरेका थिए । त्यस अवसरमा डा. पूर्ण बहादुर शाही, डा. विष्णु बहादुर केसी, डा. चक्र प्रसाद अधिकारी, डा. जगत खत्री तिमिल्सिना, डा. कविन्द्र भट्टराई, डा. राजकुमार थारुलाई सम्मान पनि गरिएको थियो ।
