बाँकेको कोहलपुरमा धुलो दुध कारखाना (पाउडर प्लान्ट) स्थापना पहल थालिएको छ । कोहलपुर नगरपालिकाले संस्थागत रूपमै पावर प्लान्ट स्थापनाका लागि नेपाल सरकारका कृषि तथा पशुपंक्षी मन्त्री रामनाथ अधिकारी लगायतका उच्च अधिकारीसँग भेटवार्ता गरी उक्त पहल थालेको हो ।
कोहलपुर नगरपालिका–९ स्थित दुग्ध विकास संस्थान, दुग्ध वितरण आयोजनाको क्षमता बिस्तार गरी किसानहरूले उत्पादन गरेको दुध बजारिकरणमा सरकारी सहयोगको माग बर्षौदेखि हुँदै आएपनि त्यसको सम्बोधन हुन सकिरहेको छैन ।
आयोजनामा असोजदेखि चैत्रसम्म दैनिक आठ हजार लिटर र असोज, कार्तिक, मंसिर, पुस, माघ, फागुन महिनामा त्यो भन्दा बढी दुध उत्पादन हुने गरेको छ । जसका कारण मिल्क होलिडेको मारमा किसान पर्दै गएपछि पाउडर मिल्क प्लान्टको माग गरिएको हो । ‘हामीले दुग्ध विकास बोर्डका कार्यकारी अध्यक्ष राजेन्द्र प्रसाद यादव सहित कृषि मन्त्री अधिकारीलाई भेट गरी पाउडर प्लान्ट स्थापनाको मागलाई बलियो गरी राखेका छौं’, कोहलपुर नगरपालिकाका नगर प्रमुख पूर्ण प्रसाद आचार्यले दैनिक नेपालगन्जसँग भने, ‘मन्त्री अधिकारीको प्रतिबद्धता र बजेट सुनिश्चितताको योजनाले हामी छिट्टै काम सुरु हुनेमा ढुक्क छौं ।’
नगर प्रमुख आचार्यका अनुसार, त्यसका लागि मन्त्री अधिकारीले भाद्र १८ गतेको मन्त्रीस्तरीय निर्णयबाट ५० लाख बजेट समेत विनियोजित भएको भएको जानकारी दिएका छन् । ‘पालिकाबाट हामीले पनि राम्रो बजेट छुट्याउने सोंचमा छौं’, नगर प्रमुख आचार्यले झण्डै ५० करोड लागतमा बन्ने पाउडर प्लान्टका लागि पिपरी स्थित दुग्ध विकासको चार विगाह बढी जग्गा मापदण्ड अनुसार भएकाले ६ महिना भित्र काम अगाडि बढ्नेमा ढुक्क रहेको दोहोर्याए । ‘यसले पश्चिम नेपालका लुम्बिनी, कर्णाली र सुदूरपश्चिम प्रदेशका दुग्ध व्यवसायी किसानलाई आत्मनिर्भर बनाउँदै ग्रामीण अर्थतन्त्रको बलियो आधार तय गर्न सहयोग पुर्याउँछ’, त्यसैले पनि सरकारले लाखौं किसानहरूको मागलाई सम्बोधन गर्ने कुरामा आफु विश्वस्त रहेको तर्क नगरप्रमुख आचार्यको छ ।
दुग्ध वितरण आयोजनाले दाङको शान्तिनगर दुग्ध चिस्यान केन्द्र, लमही दुग्ध चिस्यान केन्द्र, बर्दियाको सानोश्री, भूरीगाउँ चिस्यान केन्द्रबाट दुध संकलन गर्दै आएको छ ।
त्यस्तै, कर्णाली प्रदेशको सुर्खेतको छिन्छु दुग्ध चिस्यान केन्द्र र बाँकेको कोहलपुर आयोजना कार्यालयबाट समेत दुध संकलन हुँदै आएको हो । जहाँ एक सय ११ सहकारी संस्थाबाट हजारौं किसानले दुध बिक्रीवितरण गर्दै आएका छन् ।
प्रतिघण्टा एक हजार लिटर दुध प्रशोधन गर्न सक्ने उद्योगको क्षमता छ। हाल दैनिक १२ हजार लिटर दुध संकलन हुँदै आएको आयोजना कार्यालयले जानकारी दिएको थियो। साथै दुधको सहज बजारीकरणको लागि पाउडर प्लान्ट निर्माणको प्रस्ताव पनि गरिएको छ ।
