पछिल्लो पटक नेपालगन्ज उपमहानगरपालिकाले गरेको सार्वजनिक सुनुवाईमा सडक तथा नाला अतिक्रमणको विषयमा जोडतोडले उठाइयो ।
सडक र नाला कब्जा हुँदा दुर्घटनाको जोखिमका साथ यात्रुहरूलाई समेत सास्ती भैरहेको सार्वजनिक सुनुवाईमा नागरिकले उपमहानगरपालिकाको ध्यानाकर्षण गराएका थिए । त्यसको व्यवस्थापनका लागि उपमहानगरपालिकाबाट प्रतिबद्धता पनि व्यक्त भयो । यो पहिलो पटक भने होइन, हरेक सार्वजनिक सुनुवाई फुटपाथ, नाला तथा सडक अतिक्रमणको विषय उठ्ने गरेको छ । तर, अझै पनि नेपालगन्जको सहरी क्षेत्र र मुख्य बजारमा त्यसको व्यवस्थापन उपमहानगरपालिकाले गर्न सकेको छैन ।
पटकपटक उपमहानगरपालिकाको नगर प्रहरीले अतिक्रमण हटाउने र पुन उस्तै हुने गरेको छ । उपमहानगरपालिकाले ठोस कारवाही नगर्दा पनि अतिक्रमणको समस्या पूर्ण समाधान हुन नसकेको बताउँछन् । नेपालगन्ज पछि बनेका सहरहरूमा सडक, नाला र फुटपाथ अतिक्रमण हटाएपनि नेपालगन्जमा भने त्यसविरुद्ध ठोस कदम नचाल्दा समस्या दोहोरिई रहने गरेको हो ।
‘सटरमा पसल राख्ने र नाला तथा सडक कब्जा गरेर मालसामान राख्ने गरेको उपमहानगरपालिकाले नदेखेको होइन, हटाउनका लागि नगर प्रहरी पठाउने, सम्झाउने पनि गरेको छ, तर अन्य ठाउँहरूमा जस्तो कारवाही नहुँदा अवस्था परिवर्तन हुन नसकेको हो’, नेपालगन्जका स्थानीय भन्छन्, ‘नगरले हटाए जस्तो गर्ने, कारवाही नगर्ने तथा सडक, नाला मिच्नेले मिचिरहने अवस्था छ ।’
मुख्य समस्या नेपालगन्जको मुख्य बजार क्षेत्रमै देखिन्छ । घरबारीटोल, त्रिवेणीमोड, त्रिभुवनचोक, सदरलाइन, त्रिवेणीमोड पूर्वलाइन निकै अव्यवस्थित बनिरहेका हुन् ।
नेपालगन्ज उपमहानगरपालिकाका नगर प्रहरी इन्चार्ज सुर्य बोगटी उपमहानगरपालिकाको ऐन, नियम बमोजिम अनुगमन र कारवाही भैरहेको बताउँछन् । ‘फुटपाथ, नाला तथा सडकमा मालसामान नराख्न अनुरोध गर्दा अटेरी हुने गरेको छ’, उनी भन्छन्, ‘सामान उठाएर ल्याउने, जरिवाना गर्ने काम पनि भैरहेको छ, तर केही ठाउँमा अवस्था सुधार हुन सकेको छैन ।’
‘अतिक्रमण गर्नु हुँदैन भन्नेमा आम नागरिक, व्यवसायी आफै पनि जागरुक हुनुपर्दछ’, नेपालगन्ज उपमहानगरपालिकाका नगर प्रहरी इन्चार्ज बोगटीले भने, ‘सम्झाएर र
जरिवाना गरेर मात्रै केही ठाउँमा अटेरी हटेको छैन ।’ यद्यपि, उनले नेपालगन्जका धेरै ठाउँमा फुटपाथ अतिक्रमण हटाएर व्यवस्थित गरेको सुनाए । ‘सटरमा व्यापार गरिरहँदा नाला र सडक अतिक्रमण गर्नु हुँदैन भन्नेमा व्यवसायीहरू आफै पनि सचेत हुनुपर्छ’, उनले भने ।
नगरका कतिपय ठाउँमा नियमित जसो नगर प्रहरीले अतिक्रमण हटाउन जाँदा खाली गर्ने र नगर प्रहरी त्यहाँबाट जाने बित्तिकै पुनः उस्तै गर्ने प्रवृत्ति देखिएको नगर प्रहरी इन्चार्ज बोगटी बताउँछन् ।
नेपालगन्ज उपमहानगरपालिकाले धेरै पटक अतिक्रमण विरुद्ध अभियान समेत चलाएको छ । तर, अभियानहरू मुख्य बजार क्षेत्रमा प्रभावकारी नदेखिएको हो । कतिपयले जनप्रतिनिधि स्थानीय हुँदा अतिक्रमण हटाउँदा आफुहरूलाई भोलिका दिनमा राजनीतिक समर्थन गुम्न सक्ने डरले पनि कडा कारवाही नगर्ने गरेको बताइन्छ । यद्यपि, फोहोर व्यवस्थापन तर्फ भने उपमहानगरपालिकाले अनुगमन र
लापरवाही गर्नेलाई जरिवाना गर्दै प्रभावकारी काम गरेको बताइन्छ ।
