आज शुक्रवारदेखि सनचाँदी व्यवसाय सुचारु हुने भएको छ । सुनचाँदी तथा रत्नआभूषण व्यवसायी महासंघ र नेपाल सुनचाँदी व्यवसायी महासंघले सुनचाँदी व्यवसायको समस्या समाधानका लागि सरकारसँग भएका छलफल सकारात्मक दिशातर्फ अगाडि बढेको भन्दै आजदेखि सबै विरोधका कार्यक्रमहरू स्थगित गर्ने निर्णय गरेका हुन् ।
सुन, चाँदी तथा रत्न आभूषणको कारोबार र ढुवानीसम्बन्धी समस्या समाधान गर्न सरकारका विभिन्न मन्त्रालय र निकायसँग जारी छलफलमा व्यवसायीहरूका मागप्रति सरकारले चासो देखाएको भन्दै विहीवार बसेको संयुक्त बैठकले यस्तो निर्णय लिएको हो ।
पत्रमा उल्लेख गरिएअनुसार, व्यवसायीका माग सम्बोधन गर्न वाणिज्य मन्त्रालयको नेतृत्वमा ६ सदस्यीय समिति गठन गरिएको छ । समितिले व्यवसायको स्वचालित सञ्चालनका लागि आवश्यक प्रक्रिया र सन्दर्भ पत्र तयार गर्नेछ ।
महासंघहरूले विरोधस्वरूप घोषणा गरिएको सम्पूर्ण कार्यक्रमहरू र व्यवसाय बन्दको निर्णय स्थगित गरिएको नेपालगन्ज सुनचाँदी व्यवसायी संघका महासचिव सुखनारायण सोनारले जानकारी दिए । उनका अनुसार, व्यवसाय पुनः सञ्चालन गर्न महासंघले भनेको छ ।
महासंघले सरकारसँग थप सहकार्यमा रही व्यवसाय सुधारका अन्य कदमहरू चाँडै अघि बढाइने समेत स्पष्ट पारेको छ ।
सुन, चाँदी तथा रत्न आभूषण व्यवसायसँग सम्बन्धित कर प्रणाली, ढुवानी प्रक्रिया र सरकारी नीतिगत समस्याहरू समाधानका लागि सुनचाँदी व्यवसायी संघ र नेपाल सरकारबीच ६ बुँदे सहमति भएको छ । सहमति भएपछि व्यवसायीहरूले सबै विरोधका कार्यक्रम फिर्ता लिंदै शुक्रबारदेखि देशभर व्यवसाय पुनः सञ्चालन गर्ने निर्णय गरेका हुन् ।
बिहीबार अर्थ मन्त्रालय, वाणिज्य तथा आपूर्ति मन्त्रालय, भन्सार विभाग, नेपाल राष्ट्र बैंक लगायत सरकारी निकाय र नेपाल सुनचाँदी व्यवसायी महासंघ, नेपाल सुनचाँदी रत्न तथा आभूषण महासंघबीचको छलफलपछि लिखित रूपमा सहमति भएको हो ।
उक्त सहमतिमा स्थानीय व्यवसायीलाई समेटेर केन्द्रसम्म जोड्ने संरचना बनाइने, सुनचाँदी ढुवानीको मापदण्ड र प्रणाली स्पष्ट बनाइने र भन्सार मूल्यांकन, प्रतिशुल्क दर, मूल्य निर्धारण लगायत विषयमा छुट्टै अध्ययन गरी सुझाव प्रस्तुत गरिने उल्लेख छ ।
उक्त सहमति कार्यान्वयन र व्यवसायीको माग सम्बोधन गर्न ६ सदस्यीय कार्यदल गठन गरिने बताइएको छ ।
