आशा परियार
नेपालगन्ज–१ धम्बोझीस्थित सुलभराज श्रेष्ठको घर अहिले गहिरो शोकमा डुबेको छ । एक्लो छोरा गुमाएकी आमा बिना खड्का श्रेष्ठ पीडासँग सामना गर्न नसकी अचेत छिन् । घर वरिपरि रुवाबासी, आफन्त र छिमेकीहरूको भीड छ ।
काठमाडौंमा सोमबार भएको जेनजी आन्दोलनमा २३ वर्षीय सुलभराज श्रेष्ठको मृत्यु भएको छ । उनी नेपालगन्ज–१ का स्थायी बासिन्दा र काठमाडौंको एक इञ्जिनियरिङ कलेजमा सिभिल इञ्जिनियरिङ अध्ययनरत विद्यार्थी थिए ।
सुलभ भेरी स्कूल सञ्चालक नरेन्द्र श्रेष्ठ र बिना खड्का श्रेष्ठका एक्ला छोरा हुन् । छोरा गुमाएको खबर सुन्नासाथ नरेन्द्र श्रेष्ठ सोमबार बेलुकी ६ बजे हवाइमार्ग हुँदै काठमाडौं गएका छन् ।
यही आन्दोलनमा नेपालगन्ज–१ धम्बोझीका अर्का युवा आयुष थापा मगरको पनि ज्यान गएको छ । फ्रान्स जाने तयारीमा काठमाडौं पुगेका १९ वर्षीय आयुष आन्दोलनमा परेर ज्यान गुमाएका हुन् । उनका बुबा सुशील थापा मगर र आमा पुनम थापा मंगलबार बिहान ७ ः४० बजे हवाई मार्ग हुँदै काठमाडौं गएका छन् ।
पीडित परिवारले सरकारप्रति कडा रोष प्रकट गर्दै भनेका छन्, ‘हाम्रा सन्तानलाई अपराधीझैँ ताकी–ताकी गोली हानियो । उनीहरू दोषी थिएनन्, आफ्ना माग सडकमा राखिरहेका थिए । तर निर्दोष युवाको रगत बगाएर सरकारले हाम्रो घरै रित्याइदियो ।’
दुई युवाको मृत्युले नेपालगञ्जको वडा नम्बर १ शोकमा डुबेको छ । आफन्त मात्रै होइन, स्थानीय समुदायसमेत पीडामा छ । नेपालगन्ज उपमहानगरपालिका वडा नम्बर–१ का वडाअध्यक्ष प्रमोद रिजालले आन्दोलनमाथि भएको दमनलाई “अकल्पनीय र अमानवीय” बताएका छन् । उनले भने, “शान्तिपूर्ण ढंगले माग राख्न सडकमा उत्रिएका युवामाथि यसरी गोली प्रहार हुनु राष्ट्रकै लागि लज्जास्पद हो । सत्यतथ्य छानबिन बिना वास्तविकता बाहिर आउँदैन । दोषी जो भए पनि कारबाही हुनैपर्छ । राज्यकै संयन्त्र दोषी ठहरियो भने त्यसलाई पनि कानूनको कठघरामा उभ्याउनुपर्छ ।”
उनले दुःख प्रकट गर्दै थपे, “फुल्दै गरेका होनहार युवाहरू गुमाउनु देशकै ठूलो क्षति हो । राज्यले देखाउनुपर्ने संवेदनशीलता र जिम्मेवारी देखाउन सकेको छैन । यसको जिम्मेवारी लिनैपर्छ ।”
रिजालका अनुसार पीडित परिवारप्रति ऐक्यबद्धता जनाउन मङ्गलबार वडा कार्यालयले विज्ञप्ति जारी गरी वडाभरिका विद्यालय तथा कार्यालय बन्द गर्ने निर्णय गरिएको छ ।
