बाँकेको खजुरामा विद्यालयका शिक्षक तथा विद्यालयमा कार्यरत स्वास्थ्यकर्मीहरूलाई स्वस्थ जीवनशैली, स्वस्थकर खानपान तथा योग शिक्षा सम्बन्धी अभिमूखिकरण गरिएको छ ।
खजुरा गाउँपालिका अन्तर्गत रहेको नागरिक आरोग्य सेवा केन्द्र आयुर्वेद शाखाको आयोजनामा भएको अभिमुखिकरणमा अग्र्यानिक खानेकुरालाई विशेष स्थान दिनुपर्नेमा जोड दिइएको थियो ।
कार्यक्रममा बोल्ने अधिकांशले खानपिनको ब्यालेन्स मिलाउन नसक्नाले धेरै रोगको सिकार बन्न परिरहेको गुनासो गरेका थिए । अभिमूखिकरण कार्यक्रममा बोल्दै खजुरा गाउँपालिका अध्यक्ष डम्बर बहादुर विकले अग्र्यानिक खानपान, स्वस्थ जीवन शैली बनाउन पर्नेमा जोड दिए । अध्यक्ष विकले निरोगी बन्न व्यायाम देखि खानपानमा विशेष ध्यान पुगाउने जरुरी रहेको उल्लेख गरे ।
खजुरा गाउँपालिका उप प्रमुख मञ्जु मल्लले खजुरामा दैनिक जसो जटिल बिरामीहरू सिफारिस तथा सहयोगका लागि आउने गरेको बताइन् । विद्यालयका शिक्षकहरूलाई स्वस्थ जीवनशैली सम्बन्धी जानकारी प्रदान गरे पछि विद्यार्थीमाझ छिटो संदेश पुग्ने उनले उल्लेख गरिन् ।
खजुरा गाउँपालिका वडा नम्बर २ का वडा अध्यक्ष पूर्ण बहादुर भण्डारीले आयुर्वेद सेवा दिन थप योजना जरुरी रहेको उल्लेख गरे । सामाजिक विकास संयोजक कृष्णा पोखरेलले जटिल रोगहरूको संख्या बढ्दै गएको अवस्थामा खानपिनमा विशेष ध्यान दिन जरुरी रहेको बताइन् । शिक्षा शाखा प्रमुख खगेन्द्र मल्लले हरेक विद्यालयमा स्वास्थ्य सम्बन्धी सचेतना अभियान सञ्चालन गरिने जनाए ।
विद्यालयका शिक्षकलाई सिपीआर सिकाई अनिवार्य प्रदान गर्न आवश्यक रहेको उल्लेख गरे । खजुरा प्राथमिक स्वास्थ्य केन्द्रका डाक्टर अनिश रुचालले पछिल्ला दिनहरूमा खानपानको गडबढीका कारण धेरै बिरामी हुने गरेको बताउँदै दैनिक रुटिङ नै बनाएर स्वस्थ्य जीवनशैली अपनाउन अनुरोध गरे । कार्यक्रमको सहजीकरण आयुर्वेद शाखाका प्रमुख किरन खनालले गरेका थिए । कार्यक्रममा नसर्ने रोग न्यूनीकरणका लागि प्रतिबद्धता समेत गरेका थिए । प्रतिबद्धता व्यानरमा सबैलाई हस्ताक्षर गर्न लगाइएको थियो ।
