डिसेम्वर ९ अर्थात् मंसिर २३ गते भ्रष्टाचार बिरुद्धको अन्तराष्ट्रिय दिवसको अवसरमा आयोजना हुने भ्रष्टाचार बिरुद्ध पाचौं नेपालगन्ज वाकाथनको तयारीलाई तिब्रता दिइएको आयोजकले जनाएको छ ।
आयोजक संस्था बास नेपाल तथा व्यवस्थापन गर्ने संस्था अन्तरालले तयारीलाई ब्यापकता दिएको जानकारी दिएको हो । भ्रष्टाचार बिरुद्ध सचेतना जगाउने तथा नेपालगन्जको पहिचानलाई व्यापकता दिने उद्धेश्यले यो आयोजना गरिदै आएको छ ।
उक्त कार्यक्रममा सबैको सहभागिताका साथ भब्यता दिन विभिन्न संघसंस्था तथा निकायहरुको सहकार्य गरिंदै छ । आयोजक भन्छन्, उक्त कार्यक्रममा गैसस क्षेत्रको ऐक्यबद्धता र प्रतिबद्धताका लागि समन्वय बैठक गरिएको छ । बैठकमा सहभागी गैससकर्मीहरुले सुशासनको खडेरी परेको समयमा नेपालगन्जको सडकबाट भ्रष्टाचार बिरुद्धको सन्देस प्रवाह गर्न सबै एकजुट भएर लाग्ने प्रतिबद्धता गरेका छन् । आइतवार पनि सरोकारवालाहरुबीच समन्वय बैठक गरिएको बासका कार्यकारी निर्देशक नमस्कार शाहले जानकारी दिए ।
बैठकमा कार्यक्रमका परिकल्पनाकार जयनारायण शाहले सुशासनका लागि गतिलो सन्देश दिन सक्ने यो आयोजनालाई सबैले अपनत्व लिएर सहभागिता जनाउनुपर्ने बताए । बासका अध्यक्ष शिव कुमार बर्माको अध्यक्षतामा भएको समन्वय बैठकमा भ्रष्टाचार बिरुद्धका लागि सँगै हिँडौं भन्ने नाराका साथ आयोजना हुन थालेको वाकाथनका लागि भइरहेका तयारी बारे जानकारी दिइएको थियो ।
आयोजकका अनुसार, वाकाथनमा नेपाल प्रहरीको ब्याण्ड बाजा, विभिन्न साँस्कृतिक प्रस्तुती, झाँकी प्रहर्सन, पर्चा, पम्लपेट बितरण, लगायतका गतिविधिहरु हुने छन् । कार्यक्रमका सहभागीहरु भ्रष्टाचार बिरुद्धको नारा सहित नेपालको झण्डा र भ्रष्टाचार बिरुद्धका सन्देस संकितको प्लेकार्डका साथमा भ्रष्टाचार बिरुद्ध सडकमा उत्रिने छन् ।
२००३ डिसेम्बर ९ मा संयुक्त राष्ट्रसंघीय महासभाबाट भ्रष्टाचार बिरुद्ध संयुक्त राष्ट्रसँघिय महासन्धि पारित भएको थियो । बास नेपालले पश्चिम नेपालमा २०७८ साल देखि नियमित रुपमा नेपालगन्जमा भ्रष्टाचार बिरुद्ध नेपालगन्ज वाकाथन कार्यक्रम गर्दै आएको छ । ‘देशमै यसखालको आयोजना सम्भवतः पहिलो हो,’ परिकल्पनाकार शाहले भने ।
रजत बर्ष मनाउँदै बास
भ्रष्टाचार बिरुद्ध क्रियाशिल बास नेपाल रजत बर्ष मनाउँदै छ । रजत बर्षको अवसरमा बास नेपालले मंसिर २४ गते बिशेष समारोहको आयोजना गर्ने भएको हो ।
रजत वर्षका क्रममा बास रजत स्मारिका बिमोचन, उत्कृष्ठ शाखा, स्वयंसेवक घोषणा, सम्मान कार्यक्रम, ईनोभेटिभ युथ अवार्ड प्रदान लगायतका कार्यक्रम हुने बासका सूचना अधिकारी हेमराज भट्टले जानकारी दिए ।
२०५७ साल मंसिर २४ गते स्थापना भएको बास नेपालले रजत बर्षको लोगो शनिवार सार्वजनिक गरेको छ । पत्रकार जयनारायण शाहले परिकल्पना गरेको लोगो एक कार्यक्रमको बिच सार्वजनिक गरिएको हो ।
लोगोका परिकल्पनाकार शाहसँगै, बास नेपालका पूर्ब अध्यक्ष मन भण्डारी, अध्यक्ष शिव कुमार बर्मा, कार्यकारी निर्देशक नमस्कार शाह लगायतले लोेगो सार्वजनिक गरेका हुन् । सार्वजनिक गरिएको लागोमा २५ बर्ष देखि भ्रष्टाचार बिरुद्धको अभियानमा बास नेपालको यात्रामा उकालोे लागिरहेको सन्देश प्रतिबिम्वित छ ।
लोगो सार्वजनिकरण कार्यक्रममा बाँके कला केन्द्रका अध्यक्ष सुन्दर गुरुंग, गैर सरकारी संस्था महासंघ नेपाल बाँकेका पूर्ब अध्यक्ष तेज बिक्रम शाह, उच्च अदालत बार ईकाईका अध्यक्ष चित्र बहादुर शाही, नुड्स बाँकेका अध्यक्ष लोग बहादुर परियार, गैसस महासंघ नेपाल बाँकेकी पूर्ब उपाध्यक्ष निर्मला सुनार, नेपाल रेडक्रस सोसाइटी बाँकेकी सरिता सिंह, पूर्ब बिद्यार्थी समाज जनता नमुना माबिका अध्यक्ष झविलाल शर्मा लगायत बास नेपालका पदाधिकारीहरुको उपस्थिति थियो ।
