यस बर्षको इनोभेटिम राष्ट्रिय युवा स्वयम् सेवक पुरस्कार बर्दिया बासगढीका युवा एक नारायण अधिकारीले हात पारेका छन् । देशभरीबाट विभिन्न चरण पार गर्दै फाइनलमा प्रवेश गरेका १० जना प्रतिष्पर्धीलाई पछि पार्दै अधिकारीले उत्कृष्ट अवार्ड प्राप्त गर्न सफल भएका हुन् ।
उत्कृष्ट हुन सफल अधिकारीले बास नेपालको रजत समारोहको भब्य कार्यक्रममा बुधवार नगद ५० हजारसँगै, ट्रफी हासिल गर्न सफल भएका छन् । कार्यक्रमका बिच कर्णाली प्रदेश सरकारका सामाजिक विकास मन्त्री घनश्याम भण्डारी, राष्ट्रिय सूचना आयोगका पूर्व प्रमुख सूचना आयुक्त कृष्णहरी बास्कोटा, भ्रष्टाचार बिरुद्धका अभियन्ता केदार खड्का, सूचनाको हकका अभियन्ता तारानाथ दाहाल लगायत अतिथिहरूले दोसल्ला, नगद र ट्रफी प्रदान गरेका थिए ।
निस्वार्थ रूपमा समाज रूपान्तरणको यात्रामा हिंडिरेका युवा स्वयंसेवकहरूको उदगर्ष, संघर्ष, समपर्ण र योगदानको कदर स्वरूप बास नेपालद्वारा प्रदानित स्वयंसेवक पुरस्कार अवार्डका लागि नेपाल भरबाट प्राप्त सबै उमेदवारहरूको कार्य मूल्यांकन र समाजप्रतिको योगदानको आधारमा छनोट प्रक्रियाका विभिन्न मापदण्डहरूलाई पार गर्दै उत्कृष्ठ १० मा पर्न सफल उमेद्वारहरू मध्ये अवार्ड घोषणा कार्यक्रममा अन्तिम चरणमा पुगेका अन्य ९ जनालाई विभिन्न विधागत सम्मान गरिएको छ । उत्कृष्ट ९ मा पर्न सफल सरिता खनालले ह्यूम्यानिटेरियन अवार्ड हासिल गरेकी छिन् । यसैगरी सुर्यकिरण केसीले युथ इन्करेजमेन्ट अवार्ड, नारायण प्रसाद रिजालले युथ फ्रेन्डली लोकल गभरमेन्स च्याम्पियन अवार्ड, सुशील बस्यालले आइडियल युथ अवार्ड, रमेश वरले आउटस्टेन्डिङ्ग चाइल्ड वेजफेयर अवार्ड, जय बहादुर सिंहले कम्युनिटी ट्रान्सफरमेशन क्याम्पेनर अवार्ड हासिल गर्न सफल भएका छन् । यसैगरी ऋतिक शाहीले चाइल्ड फ्रेन्डली लोकल गभरमेन्स च्याम्पियन अवार्ड, सुनिल परियारले हिडन हिरो युथ अवार्ड र बेद प्रशाद सापकोटाले एग्रो इन्ट्रप्रेन्योर डाइनामिक युथ अवार्ड हासिल गरेका थिए ।
बास नेपालले अन्तराष्ट्रिय युवा दिवसको अवसरमा गत बर्ष देखि निस्वार्थ रूपमा समाज रूपान्तरणको यात्रामा क्रियाशिल एक जना युवालाई अवार्ड प्रदान गर्दै आएको छ । यस बर्ष अवार्डको दोश्रो संकरण हो ।
यी हुन एकनारायण अधिकारी
खेलकुद र युवा सशक्तिकरणमा जोडिएको पख्यात नाम हो एक नारायण अधिकारी । बाल्यकाल देखि नै फुटबल, क्रिकेट लगाएतको खेलमा रुची रहेकै कारण उनी खेलकुद तिर संलग्न रहँदै आए । उनी केवल आफु खेलाडी मात्र बनेन् खेलाडी उत्पादन गर्नु तर्फलागे उनकोे अगुवाईमा क्रिकेट, फुटबल, व्याटमिन्टन लागाएतका खेलमा १२२ जना खेलाडी बर्दिया जिल्लाबाट उत्पादन भई खेल खेलिरहेका छन् ।
उनले छोरी सशक्तिकरणका लागि महिला फुटबलमा बर्दियाका किशोरीहरूलाई अगाडी सारे । उनले उत्पादन गरेका सुरक्षा सुखरिया र सुस्मिता थारु नेपाल आर्मीमा राष्ट्रिय फुटबलको टिममा रहेका छन् । छोरीहरूलाई सशक्त बनाउँदै उनले प्रशिक्षण दिएका धेरै छोरीहरू नेपाल प्रहरीमा आबद्ध हुन सफल भएका छन् । उनले उत्पादन गरेका खेलाडी मध्ये चर्चित क्रिकेटर हुन करण बुढा मगर । जसले भारतको धेरै राष्ट्रिय स्तरको क्रिकेटमा सहभागिता जनाइसकेको छन् । हाल अधिकारी ४१ जना किशोर किशोरीहरूलाई खेलकुदमा निरन्तर प्रशिक्षण गराउने कार्यमा तल्लिन छन् ।
उनले खेलकुद बाहेक मानव सेवामा समेत योगदान दिएका छन् । उनले मृगौला पीडित धन बहादुर परियोरको मृगौला प्रत्यारोपणका लागि आर्थिक संकलन गरी जीवन बचाउने कार्य गरे भने प्यारालाइसिस रोगबाट ग्रसित रिरुता क्षेत्रीलाई प्यारालाईसिसको उपचार गराई पहिलाकै अवस्थामा ल्याउने कार्य गरेका थिए ।
उनी केवल मानव सेवा र खेलकुदमा मात्र छैनन् । उनले बर्दिया जिल्लामा साप्ताहिक सरसफाई अभियान, तीन÷तीन महिनको अन्तरालमा निरन्तर रक्तदान कार्यक्रम, असहाय र टुहुरा बालबालिकालाई शैक्षिक सामाग्री वितरण कार्यक्रम, लागु औषध दुव्र्यसनी विरुद्धको सचेतनामूलक कार्यक्रम संचालन गर्दै आएका छन् । अनौठो कुरो त के छ भने उनी यस्ता सामाजिक कार्य गरे वापत प्रायः जसो आर्थिक सहयोग लिदैनन् ।
