प्याब्सन नेपालगन्जको आयोजनामा मङ्सिर २५ गतेदेखि २७ गतेसम्म सञ्चालन भएको प्याब्सन नेपालगन्ज भलिबल कप–२०८२ उत्साहपूर्ण वातावरणका बीच शनिवार सकिएको छ । वडा नम्बर १२ स्थित ज्वाला खेलमैदानमा तीन दिनसम्म चलेको प्रतियोगिताले विद्यालयस्तरीय खेलकुदको महत्व र सामूहिक सहभागिताको शक्ति स्पष्ट रूपमा देखाएको छ ।
प्याब्सन नेपालगन्जका उपाध्यक्ष हेमन्तराज काफ्लेका अनुसार, तीन दिनसम्म सञ्चालित प्रतियोगितामा नेपालगन्जका १८ विद्यालय सहभागी भएका थिए । छात्रा, छात्र, महिला शिक्षक कर्मचारी र पुरुष शिक्षक कर्मचारी गरी चार विधामा ५८ टिमबीच प्रतिस्पर्धा भएको यस प्रतियोगिताले खेलकुदलाई केवल प्रतिस्पर्धा मात्र नभई अनुशासन, सहकार्य र नेतृत्व विकासको अभ्यासको रूपमा प्रस्तुत गरेको देखियो ।
छात्रा भलिबलतर्फ नेपालगन्ज मोडेल एकेडेमी प्रथम, मुनतारा इङ्लिस मिडियम हाइ स्कुल द्वितीय र जय बागेश्वरी सेकेन्डरी स्कुल तृतीय भए । छात्र भलिबलतर्फ स्टार फ्युचर सेकेन्डरी स्कुलले उपाधि जित्दा वेस्ट जोन इङ्लिस मिडियम हाइ स्कुल द्वितीय र मेरीगोल्ड इङ्लिस बोर्डिङ स्कुल तृतीय स्थानमा रहे ।
त्यसैगरी महिला शिक्षक कर्मचारी भलिबलतर्फ नेपालगन्ज मोडेल एकेडेमी प्रथम, जय बागेश्वरी सेकेन्डरी स्कुल द्वितीय र आदर्श माध्यमिक विद्यालय तृतीय भए भने पुरुष शिक्षक कर्मचारी भलिबलतर्फ जी.भि.एन. सेकेन्डरी स्कुल प्रथम, वेस्ट जोन इङ्लिस मिडियम हाइ स्कुल द्वितीय र जय बागेश्वरी सेकेन्डरी स्कुल तृतीय स्थानमा रहन सफल भए ।
विजेता तथा उपविजेता विद्यालयका खेलाडीहरूलाई प्रमाणपत्र, मेडल र ट्रफी प्रदान गरिएको थियो । छात्रा र छात्र विधामा क्रमशः रु ६ हजार, रु ५ हजार र रु ४ हजार तथा महिला र पुरुष शिक्षक कर्मचारी विधामा क्रमशः रु १० हजार, रु ७ हजार ५ सय र रु ५ हजार नगद पुरस्कार प्रदान गरिएको आयोजकले जनाएको छ । प्याब्सन बाँकेका अध्यक्ष विकास बज्राचार्यले विजेताहरूलाई पदक तथा पुरस्कार वितरण गरे । त्यसअघि नेपालगन्ज उप–महानगरपालिकाका शिक्षा तथा खेलकुद महाशाखा प्रमुख गोर्ख बहादुर थापाले खेलाडीहरूलाई हौसला दिन मैदान पुगेका थिए ।
आयोजक प्याब्सन नेपालगन्जका अनुसार, प्रतियोगिताले विद्यालय तहबाटै खेलकुद संस्कृतिको विकास, स्वस्थ प्रतिस्पर्धा र आपसी सद्भाव प्रवद्र्धनमा महत्वपूर्ण भूमिका खेलेको छ । सहभागी विद्यालय, खेलाडी, शिक्षक र दर्शकको उत्साहपूर्ण उपस्थितिले प्रतियोगितालाई सफल बनाएको आयोजकको निष्कर्ष छ ।
प्रतियोगिताको उद्घाटन मङ्सिर २५ गते प्याब्सन नेपालगन्जका अध्यक्ष मानबहादुर थापाको सभापतित्व तथा नेपालगन्ज उपमहानगरपालिकाका प्रमुख प्रशान्त बिष्टको प्रमुख आतिथ्यतामा भएको थियो ।
समारोहमा वडा नम्बर १२ का वडाध्यक्ष तरुण बज्राचार्य, प्याब्सन बाँकेका अध्यक्ष विकास बज्राचार्य, प्याब्सन बाँकेका पदाधिकारी, प्याब्सन नेपालगन्ज नगर कार्यसमिति तथा विभिन्न विद्यालयका संस्थापक र प्रधानाध्यापकहरूको उल्लेखनीय उपस्थिति रहेको थियो ।
