जिल्लामा मानव बेचविखन तथा ओसारपसार विरुद्धको क्षेत्रमा काम गर्नेहरुका लागि ‘रेस्क्यु भेइकल’ को आवश्यकता औल्याइएको छ । आइतवार एउटा अनुगमन बैठकमा सहभागीले भने, ‘जिल्लामा काम गर्न सबैका लागि उपयुक्त हुने गरि रेस्क्यु भेइकल आवश्यक देखिन्छ ।’
मानव बेचविखन तथा ओसारपसार विरुद्धको क्षेत्रमा काम गर्दै आइरहेको शान्ति पुनःस्थापना केन्द्र शाखा कार्यालय नेपालगन्जले आइतवार संस्था र संस्थाको कामका बारेमा सरोकारवालाबाट अनुगमन तथा निरीक्षण आयोजना गरेको थियो ।
त्यसक्रममा सहभागी सरकारी प्रतिनिधिहरुले सरकारी निकायबाट हुनुपर्न काम गैससले गरिरहेकाले परियोजनामा वजेट अनुदान नआउँदा पनि कामलाई निरन्तरता दिनेगरि योजना बनाउन स्थानीय सरकारको सहभागिता आवश्यक रहेको सुझाव दिए । ‘त्यसका लागि जिल्ला समन्वय समितिले आवश्यक समन्वय पनि गर्छ,’ अनुगमनमा सहभागी जिल्ला समन्वय समिति बाँकेका प्रमुख ज्ञानेन्द्र कुमार चौधरी, उपप्रमुख सिता कार्कीले आगामी जिल्ला सभामा योजना लैजाने प्रतिबद्धता पनि व्यक्त गरे ।
त्यसक्रममा शान्ति पुनःस्थापना केन्द्रले गत आर्थिक बर्षमा ३९९ जनाको उद्दार गरेको तथ्यांक प्रस्तुत गरिएको थियो । उक्त तथ्यांकमा पछिल्लो चार महिनामा नेपालगन्ज नाकाबाट जोखिमपूर्ण यात्रामा रहेका १२६ जनालाई उद्दार गरिएको उल्लेख छ ।
शान्ति पुनःस्थापना केन्द्रका जिल्ला कार्यक्रम संयोजक सम्झना चदाराले गत आर्थिक बर्षमा ३०३ जनालाई सिधै अभिभावकको जिम्मा लगाइएको थियो भने ९५ जनालाई प्रहरीमार्फत परिवारको सम्पर्कमा पु¥याइएको बताइन् ।
शान्ति पुनः स्थापना गृहले देशका विभिन्न भागसँगै बाँकेका विभिन्न पाँच स्थानमा आफ्नो सूचना तथा परामर्श केन्द्र स्थापना गरी मानव बेचबिखन तथा ओसारपसारविरुद्ध कार्यक्रम सञ्चालन गर्दै आएको छ ।
‘यसरी देशभरिनै हामीले सरकारी निकायसँगको समन्वय र सहकार्यमा काम गरिरिहेका छौं,’ शान्ति पुनःस्थापना केन्द्रका राष्ट्रिय उद्दार संयोजक भूमिराज भट्टराईले संस्थाले गरिररहेको काम तथा उद्दार र पुनःस्थापना संयन्त्रबारे जानकारी दिंदै भने, ‘भारतीय क्षेत्रमा पनि त्यहाँका सरकारी र गैरसरकारी निकायसंगको सहकार्यमा काम गरिरहेका हुन्छौं ।’
यो अवधिमा संस्थाले १२ हजार २ सय ३३ जनालाई परामर्श दिएको जनाएको छ । यी मध्ये ९ हजार ३ सय ९४ जनालाई गत आर्थिक बर्षमा र २ हजार ८ सय ३९ जनालाई चालू आर्थिक बर्षभित्र परामर्श दिइएको चदाराले जानकारी दिइन् ।
कार्यक्रममा नेपालगन्ज उपमहानगरपालिका महिला, बालबालिका तथा जेष्ठ नागरिक शाखा प्रमुख पवित्रा कुमारी पुरी, राष्ट्रिय मानव अधिकार आयोग नेपालगन्जका अधिकृत धनराज शाही, आइसिपीमा कार्यरत सशस्त्र प्रहरी नायब उपरीक्षक युवराज खड्का, इलाका प्रहरी कार्यालय जमुनाहाका इन्चार्ज प्रहरी निरीक्षक किरण प्रकाश मल्ल, नेपाल पत्रकार महासंघ बाँकेका अध्यक्ष नवीन गिरी लगायतले विभिन्न सुझाव दिएका थिए ।
