कानुन व्यवसायीहरुको साझा संस्था, नेपाल बार एशोसिएसनको नेपालगन्जस्थित, उच्च अदालत बार एशोसिएसन नेपालगन्जमा सर्वसम्मत नयाँ कार्यसमिति निर्वाचित भएको छ ।
आगामी कार्यकालका लागि मनोनयन दर्ताका क्रममा आवश्यक पदसंख्या अनुसारनै उम्मेदवारी परेपछि निर्विरोध नयाँ कार्यसमिति निर्वाचित भएको हो । निर्वाचनबाट अधिवक्ता पवनकुमार गुप्ता अध्यक्ष पदमा निर्विरोध निर्वाचित भएका छन् । उनीसँगै एशोसिएसनका सम्पूर्ण पदाधिकारी तथा कार्यसमिति सदस्यहरू पनि निर्विरोध रूपमा चयन भएका हुन् ।
निर्वाचन समितिका अनुसार, अधिवक्ताहरूबीच आपसी सहमति र एकताको वातावरण बनेपछि यसपटक सबै पदमा निर्विरोध निर्वाचन सम्भव भएको हो । ‘अहिलेको परिस्थितिमा सबै अग्रजहरु एकै ठाउँ बसेर सबैको प्रतिनिधित्व सुनिश्चित हुनेगरि नयाँ कार्यसमिति बनाइएको हो,’ नवनिर्वाचित अध्यक्ष गुप्ताले दैनिक नेपालगन्जसँग भने । नयाँ कार्यसमितिले न्यायपालिका सुदृढीकरण, कानून व्यवसायको गरिमा अभिवृद्धि, अधिवक्ताहरूको पेशागत मर्यादा कायम राख्ने तथा हकहित संरक्षणका लागि सक्रिय भूमिका निर्वाह गर्ने विश्वास गरिएको अग्रज कानुन व्यवसायीहरुको भनाइ छ ।
नयाँ कार्यसमितिअन्तर्गत उपाध्यक्षमा अधिवक्ता विजयकुमार शर्मा, सचिवमा अधिवक्ता कुसुमा सुवेदी र कोषाध्यक्षमा अधिवक्ता हरिश्चन्द्र सिजापति निर्विरोध चयन भएका छन् । त्यसैगरी कार्यसमिति सदस्यहरूमा अधिवक्ता रामकुमार दीक्षित, हिराबहादुर श्रेष्ठ, समसुद्धिन इद्रिसी, विनोद कार्की, यशोदाकुमारी उपाध्याय, राधेश्याम थारु, नरेन्द्र न्यौपाने, महेशकुमार चौधरी र सुरेशकुमार गौतम निर्विरोध निर्वाचित भएका छन् ।
