नेपालगन्ज–गुलरिया सडक आयोजनाअन्तर्गत लामो समयदेखि अन्योलमा परेको धम्बोझीस्थित प्रारम्भिक सडकखण्ड विस्तारका लागि प्रक्रिया अगाडि बढेको छ । नेपालगन्ज उपमहानगरपालिकाले हुलाकी राजमार्ग निर्देशनालयसँग औपचारिक समन्वय थालेपछि धम्बोझी–नन्दनी मिल खण्डको सडक विस्तार सहमतिपछि तत्कालै सुरु हुने भएको हो ।
‘हुलाकी राजमार्ग निर्देशनालयले आफै सम्पर्क गरेर काम अगाडी बढाउन अग्रसरता देखाएकाले हाम्रो धेरै अघिदेखिको प्रयासले सार्थकता पाउने निश्चित भएको छ,’ नेपालगन्ज–गुलरिया सडकको अधिकांश खण्डको काम अन्तिम चरणमा पुगेका बेला धम्बोझी क्षेत्रको सडक विस्तारको काम अघि बढ्न थालेको जानकारी दिंदै उपमहानगरपालिका नगर प्रमुख प्रशान्त विष्टले भने ।
सडक मापदण्डभित्र परेका केही संरचना हटाउनुपर्ने भएकाले हुलाकी राजमार्गले सहयोग मागेको हो । सडक विस्तारको विषयलाई केन्द्रमा राखी हुलाकी राजमार्ग निर्देशनालय योजना कार्यालय नेपालगन्ज र नेपालगन्ज उपमहानगरपालिकाबीच छिट्टै समन्वय बैठक बस्ने तयारी गरिएको नगर प्रमुख विष्टले बताए ।
नगर प्रमुख प्रशान्त विष्टले सडक निर्माणको प्रारम्भिक चरणमै हुलाकी राजमार्गसँग छलफल भएको उल्लेख गर्दै अब बाँकी सडकखण्ड विस्तारका लागि आवश्यक सबै सहयोग गर्न उपमहानगरपालिका तयार रहेको बताए । घना बस्तीका कारण नेपालगन्जको धम्बोझी क्षेत्रबाट सडक निर्माण गर्न कठिन भएपछि करिब दुई किलोमिटर पश्चिम नन्दनी मिलबाट सडक निर्माण सुरु गरिएको थियो । ‘स्थानीय सहमति जुट्ने बित्तिकै काम अघि बढ्न कुनै अवरोध हुँदैन, नगर प्रमुख विष्टले दैनिक नेपालगन्जसंग भने, ‘अधिकांश सडक क्षेत्र खाली पनि भइसकेको छ, बाँकी पनि समयमै खाली गरिनेछ ।’
नन्दनी मिलदेखि बर्दियाको गुलरियासम्मको सडक निर्माण कार्य अन्तिम चरणमा पुगेको हुलाकी राजमार्ग निर्देशनालय योजना कार्यालय नेपालगन्जका प्रमुख डिभिजनल इन्जिनियर लीलाबहादुर भण्डारीले जानकारी दिए । उनका अनुसार, धम्बोझी क्षेत्रका स्थानीय बासिन्दा सहमतिमा आएपछि प्रारम्भिक सडकखण्डको निर्माण तत्कालै सुरु गरिनेछ ।
धम्बोझीदेखि नन्दनी मिलसम्म दर्जनौं घर तथा संरचना सडक क्षेत्रभित्र परेकाले यस खण्डमा काम अघि बढाउन ढिलाइ भएको हो । ३२ किलोमिटर लम्बाइको नेपालगन्ज–गुलरिया सडक करिब तीन अर्ब रुपैयाँ लागतमा शर्मा एन्ड शर्मा कम्पनीले निर्माण गरिरहेको छ । घना बस्ती क्षेत्रमा चार लेन र अन्य क्षेत्रमा दुई लेनको सडक निर्माण गरिएको छ ।
लमही–धानखोला सडकका लागि २३७ लाख डलरको सम्झौता
दैनिक नेपालगन्ज
मिलेनियम च्यालेन्ज एकाउन्ट नेपाल विकास समिति (एमसिए–नेपाल) अन्तर्गत पूर्व–पश्चिम राजमार्गको लमही–धानखोला सडकखण्ड स्तरोन्नति हुने भएको छ । यसका लागि एमसिए–नेपालले करिब दुई करोड ३७ लाख अमेरिकी डलर बराबरको सम्झौता गरेको छ ।
एमसिए–नेपालले सोमबार जारी गरेको प्रेस विज्ञप्तिअनुसार, एमसिसी नेपाल कम्प्याक्टअन्तर्गत सडक मर्मत तथा स्तरोन्नति आयोजना कार्यान्वयन गर्दै धानखोलाबाट लमहीसम्मको ४० किलोमिटर सडकखण्ड स्तरोन्नतिका लागि शर्मा–कुमार संयुक्त उपक्रमसँग करिब दुई करोड अमेरिकी डलर बराबरको सम्झौता गरिएको हो ।
यसैगरी उक्त सडकखण्डको स्तरोन्नति कार्य तथा नारायणघाट–मुग्लिङ सडकखण्डको आवधिक मर्मतको सुपरिवेक्षणका लागि इन्टरनेसनल कन्सल्टेन्ट एन्ड टेक्नोक्राट्स प्रालिसँग करिब ३६ दशमलव ६ लाख अमेरिकी डलर बराबरको सम्झौता गरिएको छ ।
राससका अनुसार, आयोजनाअन्तर्गत लमही–धानखोला सडकखण्डलाई १२ मिटर चौडाइमा स्तरोन्नति गरिनेछ भने नारायणघाट–मुग्लिङ सडकखण्डमा आवधिक मर्मत कार्य हुनेछ ।
सम्झौता हस्ताक्षर कार्यक्रममा एमसिए–नेपालका कार्यकारी निर्देशक खड्गबहादुर विष्ट र शर्मा–कुमार संयुक्त उपक्रमका प्रतिनिधि सौरभ शर्माले लमही–धानखोला सडक स्तरोन्नति सम्बन्धी सम्झौतापत्रमा हस्ताक्षर गरेका थिए ।
