नेपालगन्जमा केही दिनयता चोरीका घटना फेरि बढ्न थालेका छन् । शनिवार वडा नं. १३ बुलबुलिया शान्तिनगरस्थित दुई पसलमा चोरी भएको छ । नीलसागर आश्रम अगाडिको सरिया–सिमेन्ट तथा रक्सी पसलबाट नगद र जिन्सी सामान चोरी भएको बताइएको छ ।
प्रत्यक्षदर्शीका अनुसार, बिहान पसल खोल्दा शटर फोडिएको देखिएपछि घटना सार्वजनिक भएको हो । प्रहरीलाई खबर गरेपछि करिब डेढ घण्टापछि मात्र पुगेको भन्दै स्थानीयले गुनासो गरेका छन् । पटक–पटक चोरी भइरहे पनि सो क्षेत्रमा प्रहरी गस्ती नदेखिएको स्थानीयको भनाइ छ ।
जिल्ला प्रहरी कार्यालय बाँकेका प्रमुख प्रहरी उपरीक्षक अंगुर जिसीले उक्त क्षेत्रलाई ‘शान्त क्षेत्र’ मानिएकाले नियमित गस्ती हुन नसकेको र सवारी साधनको अभावका कारण निगरानी बढाउन समस्या भएको बताएको टोल विकास समितिले भनेको छ । चोरीका घटनापछि टोलवासी पनि सचेत भएको र प्रहरी निगरानी बढ्ने विश्वास गरिएको टोल समितिको भनाइ छ ।
