जेन–जी आन्दोलनपछिको राजनीतिक रूपान्तरणबारे युवाको आवाज बुझ्न राष्ट्रिय निर्वाचन पर्यवेक्षण समिति (नियोक–NEOC) ले लुम्बिनी प्रदेशको नेपालगञ्जमा आइतबार अन्तरक्रिया कार्यक्रम आयोजना गर्ने भएको छ। कार्यक्रमका लागि नियोकका केन्द्रीय अध्यक्ष डा. गोपालकृष्ण सिवाकोटी नेतृत्वको टोली नेपालगञ्ज आइपुगेको नियोक लुम्बिनी प्रदेश अध्यक्ष अधिवक्ता बसन्त गौतमले जानकारी दिए।
कार्यक्रमको पूर्वसन्ध्यामा शनिबार नियोकले प्रदेश तथा जिल्लाका पदाधिकारीसँग आसन्न निर्वाचन र निर्वाचन पर्यवेक्षणमा नियोकको भूमिकाका विषयमा छलफल गरेको छ। छलफल कार्यक्रममा बोल्दै केन्द्रीय अध्यक्ष डा. सिवाकोटीले जेन–जी आन्दोलनपछिको राजनीतिक परिस्थिति, आसन्न निर्वाचनका चुनौती र नागरिक समाजको भूमिकाबारे धारणा राखेका थिए।
नियोक लुम्बिनी प्रदेश अध्यक्ष बसन्त गौतमको अध्यक्षतामा भएको छलफल कार्यक्रममा नियोकका कार्यकारी निर्देशक डा. विकल श्रेष्ठ, केन्द्रीय सदस्य सुरेश गौतम, लुम्बिनी प्रदेश सचिव प्रभात कुमार ठकुरी, जिल्ला अध्यक्ष नमस्कार शाह तथा सदस्यहरू वरिष्ठ अधिवक्ता लोकबहादुर शाह, हेमराज भट्ट, रबिन्द्र कर्णलगायतले निर्वाचन पर्यवेक्षणमा नियोकले खेल्नुपर्ने भूमिका, सम्भावित सुरक्षा चुनौती र व्यावसायिकताका विषयमा आ–आफ्ना धारणा राखेका थिए।
छलफललाई सम्बोधन गर्दै केन्द्रीय अध्यक्ष डा. सिवाकोटीले जेन–जी आन्दोलनपछि विकसित हुँदै गएको मुद्दामुखी र डिजिटल युगको राजनीतिक अभ्यासबारे सातै प्रदेशमा छलफल कार्यक्रम सञ्चालन गरिएको र सोही क्रममा कर्णाली प्रदेशको सुर्खेतमा कार्यक्रम सम्पन्न गरी नेपालगञ्ज आइपुगेको बताए। पहिलो चरणमा जेन–जीपछिको राजनीतिक अभ्यासबारे छलफल गरिने र दोस्रो चरणमा निर्वाचन तथा नियोकले गर्ने निर्वाचन पर्यवेक्षणसम्बन्धी कार्यक्रम सञ्चालन गर्ने योजना रहेको उनले जानकारी दिए।
“जेन–जीपछिको राजनीतिक रूपान्तरणः सवाल, चुनौती र अवसरहरू” विषयक अन्तरक्रियामा युवाको राजनीतिक प्रतिनिधित्वमा अर्थपूर्ण सहभागिता प्रवर्द्धन गर्ने उद्देश्य रहेको नियोकका केन्द्रीय सदस्य सुरेश कुमार गौतमले बताए। सामाजिक सञ्जाललाई वैकल्पिक राजनीतिक मञ्चका रूपमा प्रयोग गर्ने प्रवृत्तिबारे समीक्षा गरिने तथा युवाको विरोधका गतिविधिलाई दिगो लोकतान्त्रिक सहभागितामा कसरी रूपान्तरण गर्न सकिन्छ भन्ने विषयमा समेत छलफल हुने नियोक लुम्बिनी प्रदेश सचिव प्रभात कुमार ठकुरीले जानकारी दिए।
निर्वाचनको निष्पक्षता र विश्वसनीयता सुनिश्चित गर्न नियोकले देशभर मतदान प्रक्रिया अनुगमन गर्दै आएको छ। नियोकका पर्यवेक्षकहरूले मतदान केन्द्रमा आचारसंहिता पालनाको अवस्था, मतदाताको पहुँच, शान्ति–सुरक्षा तथा सम्भावित अनियमिततामाथि निगरानी राख्ने गर्दछन्। संकलित तथ्यका आधारमा नियोकले प्रारम्भिक तथा अन्तिम प्रतिवेदन सार्वजनिक गर्दै निर्वाचन सुधारका लागि सम्बन्धित निकायलाई सिफारिससमेत गर्ने गर्दछ।
