नेपालकै अग्रणी होटल चेन सिद्धार्थ हस्पिटालिटीले आफ्नो २८औं वार्षिकोत्सव शुक्रवार देशभर विभिन्न सामाजिक तथा रचनात्मक कार्यक्रम आयोजना गरी मनाएको जनाएको छ ।
वार्षिकोत्सवका अवसरमा टोल, मठ–मन्दिर सरसफाइ, रक्तदान, आश्रममा भोजन वितरण, पाहुनालाई विशेष छुटलगायत सामाजिक उत्तरदायित्वमुखी कार्यक्रम सञ्चालन गरिएको कम्पनीले जनाएको छ ।
सिद्धार्थ होटल नेपालगन्जमा आयोजित रक्तदान कार्यक्रममा महाप्रबन्धक बद्री कोइरालासहित २८ जनाले रक्तदान गरेका थिए । त्यस्तै, होटल परिसरमा आयोजित विशेष समारोहमा आध्यात्मिक गुरु, मनोवैज्ञानिक परामर्शदाता तथा मनोक्रान्ति अभियानका प्रणेता योगी विकासानन्दले केक काटेर कार्यक्रम उद्घाटन गरे ।
सो अवसरमा उनले आफूले गर्ने कामप्रति प्रेम र समर्पण भए सफलता स्वतः प्राप्त हुने बताउँदै कर्मप्रति सकारात्मक दृष्टिकोणले नै प्रगति सम्भव हुने धारणा राखेका थिए ।
यसैबीच, सिद्धार्थ बिजनेस ग्रुपले वार्षिकोत्सवकै अवसर पारेर धनगढीमा जिल्ला प्रहरी कार्यालय कैलालीलाई एक थान प्रहरी बिट हस्तान्तरण गरेको छ ।
प्रहरी बिट हस्तान्तरण गर्दै ग्रुपका रिजनल एक्जुकेटिभ डाइरेक्टर केशव न्यौपानेले सामाजिक उत्तरदायित्व अन्तर्गत स्थानीय सुरक्षा संरचना सुदृढ बनाउन सहयोग गरिएको बताए । उनले शान्ति, सुरक्षा र अपराध नियन्त्रणमा प्रहरीको भूमिका महत्वपूर्ण हुने उल्लेख गर्दै निजी क्षेत्र र सुरक्षाकर्मीबीचको सहकार्य आवश्यक रहेको धारणा व्यक्त गरे ।
कार्यक्रममा धनगढी उपमहानगरपालिका–३ का वडाध्यक्ष राजबहादुर ऐरले प्रहरी बिटले स्थानीय तहमा शान्ति सुरक्षाको प्रत्याभूति दिलाउन सहयोग पुग्ने विश्वास व्यक्त गरे। निजी क्षेत्रबाट भएको यस्तो योगदान प्रशंसनीय रहेको उनले बताए ।
प्रहरी बिट ग्रहण गर्दै जिल्ला प्रहरी कार्यालय कैलालीका प्रवक्ता प्रहरी नायब उपरीक्षक योगेन्द्र तिमल्सिनाले सिद्धार्थ बिजनेस ग्रुपप्रति धन्यवाद व्यक्त गर्दै उक्त संरचनाले प्रहरीको दैनिक कार्यसम्पादन सहज हुने बताए ।
वार्षिकोत्सव तथा प्रहरी बिट हस्तान्तरण कार्यक्रममा विभिन्न सामाजिक व्यक्तित्व, व्यवसायी, सुरक्षाकर्मी तथा ग्राहकहरूको उल्लेखनीय सहभागिता रहेको थियो । व्यवसायसँगै सामाजिक उत्तरदायित्वलाई प्राथमिकतामा राख्दै आएको सन्देश कम्पनीले कार्यक्रममार्फत स्पष्ट पारेको छ ।
