निर्वाचन नजिकिँदै जाँदा नेकपा एमालेबाट प्रतिनिधिसभा सदस्य उम्मेदवार मोहम्मद इश्तियाक राईले बाँके क्षेत्र नं २ का सबै मतदातासम्म पुग्न सक्रियता बढाउनुभएको छ। उम्मेदवार राईले आज नेपालगन्जको वडा नं १ का विभिन्न टोलहरूमा घरदैलो गर्नुभएको छ।
वडा नं १ को चन्दननाथ टोल, दीपज्योति टोल, पिपल चौतारा टोल लगायतमा एमालेका उम्मेदवार राईले घरदैलो गर्नुभएको हो। सहरी विकास मन्त्री र भौतिक मन्त्री हुँदा वडा नं १ मा विकासका थुप्रै परियोजनाहरू ल्याउनुभएका राईलाई घरदौलोका क्रममा मतदाताहरूले वडाका समस्याहरू सुनाउनुभएको थियो।
घरदैलोपछि वडा नं १ कै सुन्दर टोलमा चुनावी कोण सभा आयोजना गरिएको थियो। जहाँ उम्मेदवार राईले महिलाहरूका अजेन्डामा आफूलाई केन्द्रित गर्नुभएको थियो। वहाँले महिलाहरूको सशक्तिकरण, शिक्षा र स्वास्थ्यमा उनीहरूको सहज पहुँच तथा सहज जीवनयापनका उपायका सन्दर्भमा चर्चा गर्नुभएको थियो।
‘महिला सशक्तिकरणका सवालमा हामी तुलनात्मकरूपमा पछाडि छौं। मातृ मृत्युदर लुम्बिनी प्रदेशमा सबैभन्दा धेरै छ। त्यसमा पनि बाँकेमा धेरै रहेछ। समयमै प्रसुति सेवा नपाउँदा धेरैले ज्यान गुमाउनु परेको छ।’, राईले भन्नुभयो, ‘ म स्थानीय तहहरूमा सुविधासम्पन्न प्रसुति सेवा विस्तार गर्न प्रयास गरिरहेको छु।’ वहाँले भेरी अस्पतालमा भौतिक संरचना निर्माणमा प्रगति भएपनि विशेषज्ञ सेवाको अझैं पनि अभाव रहेको बताउनुभयो।
राईले वडा नं १ मा विकासका मामिलामा सुन्दर टोल सबैभन्दा पछाडि परेको महसुस आफूले गरेको स्वीकार्दै राईले निर्वाचित भएपछि त्यस टोलको बाटोघाटो, नाला लगायत संरचनागत सुधार गर्ने प्रतिबद्धता व्यक्त गर्नुभयो।
यसैबीच राईले आजै यस क्षेत्रका बुद्धिजीविहरूसँग पनि छलफल गर्नुभएको छ। यहाँको शैक्षिक विकासका सम्बन्धमा बुद्धिजीविहरूबाट प्राप्त सुझावअनुसार आफू अघि बढ्ने राईले प्रतिबद्धता जनाउनुभयो।
