आसन्न संसदीय निर्वाचन लक्षित नेपाल–भारत सीमामा सुरक्षा व्यवस्था कडा पारिएको छ । भारतीय पत्रकार सन्तोषकुमार शुक्लका अनुसार, सीमावर्ती नगर पंचायत रुपईडीहामा सुरक्षा अवस्थाको निरीक्षण गर्दै प्रशासनले होली चाडपर्व र निर्वाचन दुवैलाई शान्तिपूर्ण रूपमा सम्पन्न गराउन तयारी तीव्र पारेको जनाएको छ ।
आइतवार बहराइच अपर पुलिस अधीक्षक (ग्रामीण) दुर्गा प्रसाद तिवारी तथा क्षेत्राधिकारी नानपारा पहुप सिंह रुपईडीहा पुगेर सीमा क्षेत्रको स्थलगत निरीक्षण गरेका छन् । ‘उनीहरूले रुपईडीहा आदर्श थाना कोतवालीमा पुगेर त्यहाँ तैनाथ प्रहरी टोलीसँग समन्वय गरी भारत–नेपाल सीमाको अवस्था अवलोकन गरेका थिए,’ पत्रकार शुक्लले दैनिक नेपालगन्जसँग भने ।
निरीक्षणका क्रममा सीमा क्षेत्रमा खटिएका सुरक्षाकर्मीलाई आवश्यक निर्देशन दिँदै उच्च सतर्कता अपनाउन आग्रह गरिएको थियो । पत्रकारसँगको कुराकानीमा अपर पुलिस अधीक्षक तिवारीले आगामी होली पर्व तथा पवित्र रमजान महिनालाई दृष्टिगत गरी क्षेत्रको निरीक्षण गरिएको बताए ।
उनले सबै नागरिकलाई चाडपर्व प्रेम, सौहार्द र भाइचाराको भावनासहित मनाउन अपिल गर्दै भने, ‘होली तथा अन्य पर्वहरू शान्तिपूर्ण र सकुशल रूपमा सम्पन्न गराउन प्रशासन पूर्ण तयारीमा छ ।’
यसैक्रममा तहसीलदार नानपारा शैलेश अवस्थीले रुपईडीहास्थित होलिका दहन स्थलको निरीक्षण गरी आवश्यक व्यवस्थाको समीक्षा गरेका छन् । उनले स्थलमा सरसफाइ, दाउरा उपलब्धता, सुरक्षा प्रबन्ध तथा दहनको निर्धारित समयबारे जानकारी लिँदै सम्बन्धित अधिकारी र होली समितिका पदाधिकारीलाई सुरक्षा र स्वच्छतामा विशेष ध्यान दिन निर्देशन दिए ।
तहसीलदार अवस्थीले होली समिति अध्यक्ष अनिल अग्रवालसँग विस्तृत छलफल गर्दै आवश्यक सुझाव दिएका थिए । ‘चाडपर्व आपसी सद्भाव र शान्तिका साथ मनाइनुपर्छ, प्रशासन यसप्रति पूर्ण रूपमा सजग र प्रतिबद्ध छ,’ उनले स्पष्ट पारे ।
निरीक्षणका क्रममा थाना प्रभारी रुपईडीहा रमेश सिंह रावत आफ्नो टोलीसहित उपस्थित थिए। साथै लेखपाल करुणेश त्रिपाठी लगायत अन्य सम्बन्धित अधिकारी तथा स्थानीय गणमान्य व्यक्तिहरूको पनि उल्लेखनीय उपस्थिति रहेको थियो ।
सीमा क्षेत्रमा बढाइएको सुरक्षा सतर्कतासँगै स्थानीय प्रशासनले चाडपर्व र निर्वाचन दुवैलाई शान्तिपूर्ण र व्यवस्थित रूपमा सम्पन्न गराउने प्रतिबद्धता दोहो¥याएको छ ।
