नेकपा एमाले बाँके क्षेत्र नं. २ का उम्मेदवार मो. इस्तियाक राईले होली पर्व असत्यमाथि सत्यको जितको प्रतिकका रुपमा मनाउने गरिएको बताएका छन् ।
नेपाल उद्योग तथा व्यवसायी महासंघ बाँके शाखाले आयोजना गरेको होली मिलन कार्यक्रममा शुभकामना दिंदै उम्मेदवार इस्तियाक राईले होली पर्व आपसी मनमुटाव, तिक्तता हटाएर सामिप्यता तथा सौहार्दता कायम गर्ने पर्वको रुपमा पनि मनाउने गरिएको बताए । ‘होली जस्तै सबैको मन रंगीचंगी होस्, नराम्रको कुराहरु होलीले हटाउस्, शान्ति र समृद्धि होस्’, उम्मेदवार राईले भने ।
‘अहिले विषम परिस्थितिमा पनि मैले एमाले रोजे’, उम्मेदवार राईले भने, ‘उम्मेदवारी पश्चात घरदैलोका क्रममा मतदाताको माया पाए ।’ उनले अहोरात्र खटिएका पार्टी नेता, कार्यकर्ताहरु आभार व्यक्त गर्दै मत जोगाउनका लागि अझै तीन खटिन आग्रह गरेका थिए ।
‘समृद्ध नेपालगन्ज, जिल्ला समृद्ध बनाउने, देशलाई समृद्ध बनाउने राष्ट्रियताको मुद्दालाई शिरोधार्य गरी काठमाडौंसम्म पुर्याउने मेरो सपनालाई, आँटलाई तपाईहरु सहयोग गरिदिनुहुनेछ र सुर्य चिन्हमा मतदान गरिदिनुहुनेछ भन्ने पूर्ण आशा र विश्वास छ’, उम्मेदवार राईले भने ।
‘तपाईहरुको परिवारसँग परिवारसँगै जुड्न आए, अब हाम्रो र तपाई अलग भन्ने कुरा छैन, मैले मेरो क्षेत्रमा त्यस्तो महसुस गरिन, म कमरेड नै हो, तपाईहरुले दिनरात मेरा लागि मेहनत गरिरहनु भएको छ’, कार्यक्रममा सहभागी एमाले नेता, कार्यकर्तालाई राईले भने ।
उम्मेदवारलाई सबैलाई मत हाल्न अपिल गर्दै आफुले प्रत्येक मतको सम्मान गर्ने बताएका थिए । ‘मलाई मत दिएपछि पछुताउने आवस्था आउन्न दिन्न’, उम्मेदवार राईले भने ।
कार्यक्रममा महासंघका केन्द्रीय नेता डेकनाथ गौतम, नेपाल उद्योग वाणिज्य महासंघका पूर्व केन्द्रीय सदस्य कृष्ण प्रसाद श्रेष्ठ, बाँके निर्वाचन क्षेत्र नं. २ का निर्वाचन परिचालन कमिटि संयोजक भाष्कर काफ्ले, समानुपातिक उम्मेदवार विजया धिताल लगायतले बोलेका थिए ।
महासंघका अध्यक्ष भीम बहादुर रानाभाटको अध्यक्षतामा भएको कार्यक्रमको सञ्चालन सचिव विष्णु श्रेष्ठले गरेका थिए ।
