प्रतिनिधिसभा सदस्य निर्वाचनको परिणाम सार्वजनिक भएपछि नेपाली कांग्रेसका उम्मेदवार सुधान्सु कोइराला ले निर्वाचन परिणामलाई सम्मानपूर्वक स्वीकार गर्दै मतदाता र समर्थकप्रति आभार व्यक्त गरेका छन् ।
उनले लोकतन्त्रमा प्रतिस्पर्धा स्वाभाविक हुने र प्रतिस्पर्धामा हार–जित दुवै स्वीकार गर्नुपर्ने उल्लेख गर्दै प्राविधिक रूपमा पराजित भए पनि मतदाता तथा समर्थकबाट प्राप्त माया र विश्वासलाई ठूलो उपलब्धि मानेको बताएका छन् ।
‘लोकतन्त्रमा प्रतिस्पर्धा हुन्छ र प्रतिस्पर्धामा हार जित दुवै स्वीकार गर्नुपर्छ। प्राविधिक रूपमा हामी पराजित हुँदै गर्दा पनि धेरैको माया र आशीर्वाद प्राप्त गरेको अनुभूति गरेको छु,’ कोइरालाले वक्तव्यमा उल्लेख गरेका छन् ।
कोइरालाले आगामी दिनमा पनि जनताको सुख–दुःखमा साथ दिने प्रतिबद्धता व्यक्त गरेका छन् । साथै, उनले निर्वाचनमा विजयी भएका आफ्ना प्रतिस्पर्धी, विजेता नेकपा एमालेका उम्मेदवार मो. इस्तियाक राईलाई हार्दिक बधाई दिँदै सफल कार्यकालको शुभकामना व्यक्त गरेका छन् । उनले निर्वाचित प्रतिनिधिले क्षेत्रको विकास र जनताको हितमा काम गर्ने विश्वास व्यक्त गरेका छन् ।
निर्वाचन परिणामपछि शनिवार जारी वक्तव्यमा कोइरालाले मनोनयन दर्ताको दिनदेखि मतदान र मतगणनासम्मको अवधिमा आफूलाई प्रत्यक्ष तथा अप्रत्यक्ष रूपमा साथ, सहयोग र आशीर्वाद दिने सबैप्रति हृदयदेखि धन्यवाद व्यक्त गरेका छन् ।
प्रतिनिधिसभा निर्वाचन २०७९ मा काँग्रेस उम्मेदवार सुदीप नरसिंह राणाले ४ हजार ४०३ प्राप्त गर्दा काँग्रेसले १० हजार १९८ समानुपातिक मत प्राप्त गरेको थियो । काँग्रेस बाकेका सचिव समेत रहेका निर्वाचन क्षेत्र नम्बर २ का उम्मेदवार कोइरालाले भने १७ हजार ५८५ मत प्राप्त गरि तेस्रो स्थान प्राप्त गरेका छन् ।
