ज्ञानज्योति माविमा पाँच लाखको अक्षयकोष
वामपन्थी नेता, स्वर्गीय नेता अशोक कोइरालाको सम्झनामा बाँकेको कोहलपुर–१२ स्थित ज्ञानज्योति माध्यमिक विद्यालय, चप्परगौडीमा पाँच लाख रुपैयाँको अक्षयकोष स्थापना गरिएको छ । स्व. कोइरालाको वार्षिक पुण्यतिथिको अवसर पारेर परिवारले शुक्रवार विद्यालयमा उक्त अक्षयकोष स्थापना गरेको हो ।
विद्यालयका प्रधानाध्यापक सुमित्रा न्यौपानेका अनुसार, स्वर्गीय कोइरालाको योगदानलाई सम्मान गर्दै स्थापना गरिएको अक्षयकोषबाट विद्यालयमा अध्ययनरत गरिब, जेहेन्दार तथा पछाडि परेका विद्यार्थीलाई शैक्षिक सामग्री उपलब्ध गराइनेछ । ‘विद्यालयको विकास र शिक्षामा कोइरालाले पु¥याएको योगदानलाई स्मरण गर्दै परिवारले समाजसेवामुखी काममार्फत उहाँको सम्झनालाई जीवन्त राख्ने उद्देश्यले अक्षयकोष स्थापना गरेको हो,’ प्रधानाध्यापक न्यौपानेले दैनिक नेपालगन्जसँग भनिन् ।
शुक्रवार कोइराला परिवारका सदस्यहरू—श्रीमती मञ्जु कोइराला, छोरा आशिस कोइराला र छोरी आस्था कोइरालाले विद्यालयका प्रधानाध्यापक न्यौपाने तथा विद्यालय व्यवस्थापन समितिका अध्यक्ष दशरथ पराजुलीलाई पाँच लाख रुपैयाँको चेक हस्तान्तरण गरेका हुन् ।
विद्यालयका प्रधानाध्यापक न्यौपानेले स्वर्गीय कोइरालाको योगदान स्मरणीय रहेको उल्लेख गर्दै उहाँको नाममा स्थापना गरिएको अक्षयकोषले धेरै विद्यार्थीको भविष्य उज्यालो बनाउने विश्वास व्यक्त गरिन् ।
‘स्कूल पोशाक, जुत्ता, कापी कलम किन्नै नसक्नेहरुको पहिचान गरि उनीहरुलाई कोषको ब्याज रकमबाट छात्रवृत्ति प्रदान गरिनेछ,’ प्रधानाध्यापक न्यौपानेले स–साना अक्षय कोष यसअघि पनि सञ्चालनमा रहेपनि यो सबैभन्दा ठुलो रकमको भएको जानकारी दिंदै भनिन् ।
तत्कालीन नेकपा (एकीकृत समाजवादी) का पोलिटब्युरो सदस्यसमेत रहेका कोइराला बाँके जिल्लाको इन्चार्जको जिम्मेवारी सम्हालिरहेका बेला निधन भएको थियो । पार्टीकै कामका क्रममा कपिलवस्तुमा रहँदा कोइरालालाई मस्तिष्कघात भएको थियो । भैरहवामा प्रारम्भिक उपचारपछि थप उपचारका लागि काठमाडौँस्थित शिक्षण अस्पताल महाराजगञ्ज लगिएकोमा उपचारकै क्रममा गत वर्ष चैत ११ गते कोइरालाको निधन भएको थियो ।
