नेपालगन्जस्थित युनाइटेड एजुकेसनल एकेडेमीले आफ्नो स्थापनाको २५ वर्ष पूरा भएको अवसरमा शनिवार रजत–जयन्ती समारोह भव्य रूपमा मनाएको छ ।
गुणस्तरीय शिक्षा र संस्कारयुक्त शिक्षणलाई प्राथमिकतामा राख्दै आएको विद्यालयले आफ्नै प्रांगणमा आयोजित कार्यक्रममा शिक्षक, विद्यार्थी, कर्मचारी तथा अभिभावकहरूको उल्लेखनीय सहभागिता रहेको थियो ।
कार्यक्रममा शिक्षा विकास तथा समन्वय इकाई बाँकेका प्रमुख धनसुदन चौलागाईले विद्यालयले विगत २५ वर्षदेखि शिक्षा क्षेत्रमा महत्वपूर्ण योगदान पु¥याएको बताए । समारोहका प्रमुख अतिथि चौलागाईले गुणस्तरीय शिक्षा प्रदान गर्दै समाज रूपान्तरणमा विद्यालयहरूले अग्रणी भूमिका खेल्नुपर्ने उल्लेख गरे । साथै अनुशासन, सिर्जनशीलता र नैतिक शिक्षालाई विद्यालय शिक्षाको मूल आधार बनाउनुपर्नेमा जोड दिए ।
विद्यालयका मावि संयोजक अरुण कुमार श्रीवास्तवले विद्यालयले शैक्षिक उत्कृष्टता, संस्कार र अनुशासनलाई प्राथमिकतामा राख्दै विद्यार्थीलाई सक्षम नागरिक बनाउन निरन्तर प्रयास गरिरहेको बताए । उनले आगामी दिनमा विद्यालयलाई अझ उचाइमा पु¥याउने प्रतिबद्धता समेत व्यक्त गरे ।
कार्यक्रममा राष्ट्रिय परीक्षा बोर्ड शाखा कार्यालय कोहलपुरका प्रमुख लक्ष्मी प्रसाद पोखरेल तथा प्याब्सन बाँकेका वरिष्ठ उपाध्यक्ष शरद चन्द्र रावल लगायतले विद्यालयको प्रगतिशील यात्राप्रति शुभकामना व्यक्त गरेका थिए ।
समारोहको अध्यक्षता विद्यालयका अध्यक्ष तरुण कुमार बज्राचार्यले गरेका थिए । नेपालगन्ज उपमहानगरपालिका वडा नम्बर १२ का वडा अध्यक्षसमेत रहेका उनले विद्यालयले २५ वर्षको यात्रामा हासिल गरेको उपलब्धि समुदायका लागि गौरवको विषय भएको उल्लेख गर्दै आगामी दिनमा अझ गुणस्तरीय शिक्षा प्रदान गर्दै अघि बढ्ने विश्वास व्यक्त गरे ।
कार्यक्रममा विद्यालयका डाइरेक्टर गणेश पाठकले स्वागत मन्तव्य राखेका थिए । सो अवसरमा विद्यालयमा लामो समयदेखि योगदान पु¥याएका शिक्षक, कर्मचारी तथा उत्कृष्ट विद्यार्थीहरूलाई सम्मान तथा पुरस्कृत गरिएको थियो ।
समारोहलाई अझ आकर्षक बनाउन विद्यार्थीहरूले नृत्य, गीत तथा विभिन्न सांस्कृतिक प्रस्तुति प्रस्तुत गरेका थिए । विद्यालयका प्रबन्ध निर्देशक विकास बज्राचार्यका अनुसार उत्साहपूर्ण वातावरणमा सम्पन्न कार्यक्रमले विद्यालयको २५ वर्षे यात्रालाई स्मरणीय बनाएको छ । कार्यक्रम सञ्चालन शिक्षक सिताराम भण्डारीले गरेका थिए ।
रजत–जयन्तीको खुसी साटासाट गर्दै सहभागीहरूले केक काटेर विद्यालयको २५ वर्षे सफल यात्राको उत्सव मनाएका थिए । प्रबन्ध निर्देशक बज्राचार्यका अनुसार, विद्यालयले शिक्षा, संस्कार र अनुशासनलाई आधार मानेर आगामी दिनमा पनि समाजलाई सक्षम र जिम्मेवार नागरिक उत्पादन गर्ने प्रतिबद्धता दोहो¥याएको छ ।
