ठूलो परिमाणमा कपडा बरामद, तीन तस्कर पक्राउ
नेपाल–भारत सीमाक्षेत्रमा सशस्त्र सीमा बल (एसएसबी) को सक्रियताले पुनः अवैध कारोबारविरुद्ध कडा कदम चालेको देखिएको छ । भारतको बहराइचस्थित ४२औँ वाहिनी एसएसबीले सञ्चालन गरेको विशेष अभियानअन्तर्गत ठूलो परिमाणमा कपडा बरामद गर्दै तीन जनालाई पक्राउ गरेको हो ।
भारतीय पत्रकार सन्तोषकुमार शक्लका अनुसार, कमाण्डेन्ट गंगा सिंह उदावतको निगरानीमा २४ मार्च २०२६ मा प्राप्त गोप्य सूचनाका आधारमा सीमा स्तम्भ नम्बर ६५०÷४ नजिकै विशेष गस्ती परिचालन गरिएको थियो । सहायक उपनिरीक्षक श्यामलालको नेतृत्वमा खटिएको टोली दिउँसो करिब २ः३० बजे घटनास्थलतर्फ प्रस्थान गरी भारततर्फको सीमाक्षेत्रमा निगरानीमा बसेको थियो ।
करिब ३ः५० बजे तीन जना व्यक्तिहरू साइकलमा सामान बोकेर नेपालतर्फ जाँदै गरेको अवस्थामा शंका लागेपछि एसएसबी टोलीले उनीहरूलाई नियन्त्रणमा लिएको थियो । सोधपुछका क्रममा पक्राउ पर्नेहरू बहराइच जिल्ला, रुपैडिहा थाना अन्तर्गत निधिनगर संकल्पा गाउँका २० वर्षीय राम सहाय वर्मा, १५ वर्षीय हलीम र २० वर्षीय बच्छ राज रहेको खुल्न आएको छ ।
तलासीका क्रममा उनीहरूको साथबाट २०० थान लेडीज सूट, २३ थान साडी तथा ३ वटा साइकल बरामद गरिएको एसएसबीले जनाएको छ । आवश्यक कानुनी प्रक्रिया पूरा गरी बरामद सामानसहित पक्राउ परेका तीनै जनालाई थप कारबाहीका लागि नानपारा भन्सार कार्यालयमा बुझाइएको पत्रकार शुक्लले सुरक्षाकर्मीलाई उद्धृत गर्दै दैनिक नेपालगन्जलाई दिएको जानकारीमा उल्लेख छ ।
