बाँकेको खजुरा गाउँपालिका अब केही दिनमै फुटबलको रंगले झिलिमिली हुने भएको छ । खेलकुदको क्षेत्रमा आफ्नो छुट्टै पहिचान बनाउँदै आएको खजुराले पहिलो पटक अन्तर्राष्ट्रिय टिमहरूको सहभागितासहित ‘प्रथम खजुरा गोल्ड कप’ आयोजना गर्न लागेको हो ।
न्यू डाँफे स्पोर्टस् क्लबको आयोजनामा र खजुरा गाउँपालिकाको संरक्षकत्वमा चैत ३० गतेदेखि सुरु हुने प्रतियोगिताको तयारी अहिले अन्तिम चरणमा पुगेको जानकारी दिंदै आयोजकले सोमबार पत्रकार सम्मेलन गरेको छ । पत्रकार सम्मेलनमा आयोजकले खेलप्रेमीहरूलाई एक रोमाञ्चक फुटबल पर्वको अनुभव दिलाउने दाबी गरेको छ ।
क्लबका अध्यक्ष बालाराम खत्रीका अनुसार, प्रतियोगितामा दुई विदेशी टिमसहित आठ टोलीको सहभागिता रहनेछ । जसमा संकटा क्लब, एपीएफ क्लब, चर्च ब्वाइज क्लब जस्ता चर्चित घरेलु टोलीसँगै नाइजेरिया र भारतका क्लबहरूले पनि प्रतिस्पर्धा गर्नेछन् ।
प्रतियोगितालाई अझ रोमाञ्चक बनाउँदै विजेताले ७ लाख रुपैयाँ, ट्रफी, मेडल र प्रमाणपत्र प्राप्त गर्नेछ भने उपविजेताले ४ लाख रुपैयाँसहित सम्मानित हुनेछन् । उत्कृष्ट खेलाडी र विधागत उत्कृष्टलाई पनि विशेष पुरस्कार प्रदान गरिनेछ ।
प्रतियोगिता सफल आयोजना गर्न करिब ७३ लाख ५० हजार रुपैयाँ खर्च हुने अनुमान गरिएको छ । यसमध्ये गाउँपालिकाबाट १७ लाख सहयोग प्राप्त हुने भएको छ भने विदेशमा रहेका समाजसेवी लिलबहादुर थापा र अंकित थापाबाट मुख्य पुरस्कार रकम सुनिश्चित भइसकेको आयोजकले जनाएको छ ।
गाउँपालिकाका अध्यक्ष डम्बर विक (तुफान)ले खेलकुदमार्फत खजुरालाई राष्ट्रिय तथा अन्तर्राष्ट्रिय स्तरमा चिनाउने लक्ष्य लिइएको बताए । प्रतियोगितामा सहभागी विदेशी खेलाडीलाई बाँके राष्ट्रिय निकुञ्ज र ठाकुरद्वारा जस्ता पर्यटकीय स्थलको भ्रमण गराउने तयारीसमेत गरिएको छ ।
खजुराको मिनी रंगशालामा बैशाख ७ गतेसम्म सञ्चालन हुने प्रतियोगितालाई करिब ५० हजार दर्शकले अवलोकन गर्ने अपेक्षा गरिएको आयोजकले भनेको छ ।
सोमवार पत्रकार भेटघाटमा खजुरा खेलकुद विकास परिषदका सदस्य सचिव छवि विष्टले ‘खजुरामा गोल्ड कप गर्ने सपना अब यथार्थमा बदलिँदैछ’ भन्दै सबैलाई साथ दिन आग्रह गरे । त्यस्तै, शिक्षा तथा युवा खेलकुद शाखा प्रमुख खगेन्द्र मल्ल ले खेलकुदले युवालाई सकारात्मक बाटोमा डोर्याउने विश्वास व्यक्त गरे ।
खजुराले पहिलो पटक आयोजना गर्न लागेको प्रथम गोल्ड कप फुटबल खेल प्रतियोगितालाई सफल बनाउन खजुरा एकजुट हुनुपर्ने पत्रकार सम्मेलनमा उपस्थितहरुको जोड थियो ।
‘समग्रमा, खजुराले पहिलो पटक आयोजना गर्न लागेको यो गोल्ड कप केवल फुटबल प्रतियोगिता मात्र होइन, यो स्थानीय एकता, युवाको ऊर्जा र क्षेत्रीय पहिचानको उत्सव बन्ने अपेक्षा गरिएको छ,’ पत्रकार भेटघाटमा सहभागी लुम्बिनी कप महिला फुटबलका आयोजक संस्था, अन्तरालका प्रमुख कार्यकारी जयनारायण शाहले दैनिक नेपालगन्जसँग भने ।
