आज देशभर माध्यमिक शिक्षा परीक्षा (एसइई) परीक्षा सुरु हुँदैछ । त्यसका लागि सम्पूर्ण तयारी पूरा भैसकेको शिक्षा विकास तथा समन्वय इकाइ बाँकले जानकारी दिएको छ । परीक्षामा बाँकेका २ सय ११ वटा विद्यालयका नौ हजार बढी विद्यार्थी सहभागी हुँदैछन् ।
शिक्षा विकास तथा समन्वय इकाइ बाँकेका प्रमुख धनसुदन चौलागाईँले बाँकेका यस बर्षको एसईई परीक्षामा ९ हजार ६ सय १५ विद्यार्थी सहभागी हुने । गत वर्ष बाँकेबाट १० हजार ४१६ जना विद्यार्थीले एसइई दिएका थिए ।
‘४ हजार ६ सय ७५ छात्रा र ४ हजार ९ सय ४० छात्राले एसईई दिन लागेका हुन्’, शिक्षा विकास तथा समन्वय इकाइ बाँकेका प्रमुख चौलागाईँले भने । ७ हजार ९ सय १३ नियमित र एक हजार ७ सय २ ग्रेडका विद्यार्थीहरूले परीक्षा दिनेछन् ।
बाँकेमा यस बर्ष एसईईका लागि ३६ वटा परीक्षा केन्द्र निर्धारण गरिएको छ । जसमा सामुदायिक तर्फका २७ तथा ९ वटा निजी विद्यालय रहेका छन् । १० वटा सामुदायिक विद्यालयका २७० नियमित र ५४ ग्रेड वृद्धि गरी ३ सय २४ जना प्राविधिकधारका विद्यार्थी पनि सहभागी हुने छन् । जसमध्ये सामुदायिक १ सय ५ विद्यालयका तीन हजार ३ सय २ छात्रा र ३ हजार ८३ छात्र गरी छ हजार ३८५ विद्यार्थी र संस्थागत १ सय ६ विद्यालयका एक हजार ३ सय ७३ छात्रा र एक हजार ८ सय ५७ छात्र गरी तीन हजार २ सय ३० विद्यार्थी रहेका छन् ।
४२ जना कैदीबन्दी र बालबिज्याईकर्ता पनि एसईई परीक्षामा
यस बर्षको एसईई परीक्षामा बाँकेमा रहेका कारागार र बाल सुधार गृहका ४२ जना सहभागी हुने भएका छन् । शिक्षा विकास तथा समन्वय इकाइ कार्यालय बाँकेका प्रमुख धनसुदन चौलागाईले दुई वटा कारागारका आठ र दुई वटा बाल सुधार गृहका ३४ जनाले एसईई दिन लागेको बताएका छन् ।
शिक्षा विकास तथा समन्वय इकाइले कारागार र बालसुधार गृहमा नजिकको परीक्षा केन्द्रको उपकेन्द्र सञ्चालन गरी परीक्षा दिने व्यवस्था मिलाइएको जानकारी दिएको छ ।
३६ वटा केन्द्राध्यक्ष र ७२ सहायक केन्द्राध्यक्ष
एसईई परीक्षाका लागि प्रत्येक केन्द्रमा १ जना केन्द्राध्यक्ष र दुई सहायक केन्द्राध्यक्ष खटिने शिक्षा विकास तथा समन्वय इकाइ कार्यालयले जानकारी दिएको छ । ४ सय ८६ निरीक्षक सहित थप १ सय ५३ जना कर्मचारी पनि खटिने छन् ।
बोर्डले भन्यो तयारी पूरा
राष्ट्रिय परीक्षा बोर्डले परीक्षाको सम्पूर्ण तयारी पूरा भएको जनाएको छ । देशभरका सबै परीक्षा केन्द्रबाट बिहान ८ बजेदेखि एकै समयमा एसईई परीक्षा सुरु हुने छ । १९ चैत गतेदेखि सुरु भई परीक्षा २९ गतेसम्म चल्ने एसईई परीक्षामा यसवर्ष पाँच लाख १२ हजार ४२१ जना विद्यार्थी सहभागी हुँदै छन् । जसमध्ये नियमिततर्फ चार लाख ४१ हजार ५६६ र ग्रेड वृद्धितर्फ ७० हजार ८५५ जनाले परीक्षा दिँदै छन् । परीक्षा दिनेमा छात्राको संख्या बढी छ ।
यसवर्ष परीक्षा दिने छात्राको संख्या २ लाख ५७ हजार ६१३ भने दुई लाख ५४ हजार ८०१ छात्र र अन्य सात जना रहेका छन् । यसका साथै जापानको एक परीक्षा केन्द्रबाट समेत यस वर्ष २३ जनाले परीक्षा दिँदै छन् । गत वर्ष पनि जापानमा परीक्षा केन्द्र कायम गरिएको थियो ।
यस्तो छ, परीक्षा तालिका
पहिलो दिन चैत १९ गते अनिवार्य अङ्ग्रेजी विषयको परीक्षा सञ्चालन हुनेछ । चैत २० गते अनिवार्य नेपाली, २२ गते अनिवार्य गणित, २३ गते विज्ञान तथा प्रविधि, २४ गते सामाजिक अध्ययन, २५ गते ऐच्छिक प्रथम खण्डका सबै विषय, २६ गते ऐच्छिक द्वितीय खण्डका सबै विषय र चैत २७, २८ र २९ गते प्राविधिक धारका बाँकी विषयहरूको परीक्षा सञ्चालन हुनेछ ।
राष्ट्रिय परीक्षा बोर्ड परीक्षा नियन्त्रण कार्यालय कक्षा १० का उप–नियन्त्रक विष्णुप्रसाद ज्ञावलीले परीक्षा सकिएपछि संकलित उत्तरपुस्तिका सोही परीक्षा केन्द्रको विद्यार्थी भएमा अरू परीक्षार्थीसँगै राखेर जाँच गरिनेछ भने फरक केन्द्रको भएमा छुट्टै प्याकिङ गरेर परीक्षा नियन्त्रण कार्यलय पठाउने व्यवस्था गरिएको छ ।
एक महिनामै नतिजा प्रकाशन
परीक्षा नियन्त्रक कार्यलयले यसवर्षको एसईई परीक्षाको नतिजा एक महिनाभित्रै प्रकाशन गर्नेगरी तयारी गरेको छ । उप–नियन्त्रक ज्ञावलीले विगतमा जस्तो परीक्षाफल प्रकाशन गर्न तीन महिना नलाग्ने पनि स्पष्ट पारे । सरकारले छिटो नतिजा प्रकाशन गर्न निर्देशन दिएकोले सोहीअनुसार तयारी गरिएको उनको भनाइ छ । उनकाअनुसार परीक्षाकेन्द्रमा नै उत्तरपुस्तिका जाँच गर्ने तयारी गरिएको छ ।
परीक्षा भएको विषयको सोही दिन परीक्षाकेन्द्रमा परीक्षक र संपरीक्षकहरूले उत्तरपुस्तिका जाँच गरेर विद्यार्थीको लब्धांकपत्र शिक्षा विकास तथा समन्वय इकाईमा पठाउने व्यवस्था गरिएको छ ।