उद्घाटन खेलमै आयोजक ‘बी’ र ब्रदर्श एफसी भिड्दै
प्रथम खजुरा गोल्डकप फुटबलको तयारी भइरहँदा बाँकेको खजुरा गाउँपालिकामा फुटबलको उत्साह शुरु भएको छ । आज आइतवारदेखि दोस्रो योगिनी कप फुटबल प्रतियोगिता–२०८२ संगै फुटबलको उत्साह शुरु हुने भएको हो ।
आयोजकका अनुसार, आज उद्घाटन खेलमा आयोजक योगिनी युवा क्लब ‘बी’ र ब्रदर्श एफसी क्लबबीच प्रतिस्पर्धा हुने भएको छ ।
योगिनी युवा क्लबको आयोजनामा हुन लागेको प्रतियोगितामा बाँके र बर्दियाका गरी १३ टोलीको सहभागिता रहने आयोजकले जनाएको छ । प्रतियोगिताको सम्पूर्ण तयारी पूरा भइसकेको र खेलहरू निर्धारित समयमै सञ्चालन हुने जनाइएको छ ।
चैत २९ गतेसम्म चल्ने प्रतियोगितामा मोडेल एफसी क्लब, सीतापुर युनाइटेड, जय किसान स्पोट्र्स क्लब, मानवी स्पोट्र्स क्लब, २७ स्टार क्लब, राइजिङ स्टार, एक्स आर्मी लेजेन्ड, चन्द्र ज्योती युवा क्लब, केवाईसी, योगिनी युवा क्लब ‘ए’ र एक्टिभ युवा क्लब लगायतका टोलीहरू प्रतिस्पर्धामा उत्रिनेछन् ।
खजुरा गाउँपालिका–२ स्थित योगिनी माविको खेल मैदानमा आयोजना हुने प्रतियोगिताको विजेताले ५१ हजार रुपैयाँ र उपविजेताले २५ हजार रुपैयाँ पुरस्कार प्राप्त गर्नेछन् । साथै, प्रतियोगितामा उत्कृष्ट प्रदर्शन गर्ने खेलाडीहरूलाई सर्वोत्कृष्ट खेलाडी, उत्कृष्ट गोलकिपर, उत्कृष्ट रक्षक, उत्कृष्ट मिडफिल्डर र उत्कृष्ट स्ट्राइकर विधामा सम्मान गरिनेछ ।
प्रतियोगिता संयोजक गणेश राईका अनुसार स्थानीय प्रतिभालाई अवसर दिने उद्देश्यले प्रतियोगिता आयोजना गरिएको हो । क्लबका अध्यक्ष कमल पुनले युवालाई खेलकुदमार्फत सकारात्मक दिशातर्फ उन्मुख गराउने लक्ष्यसहित प्रतियोगिता गरिएको बताए ।
बाँके जिल्ला फुटबल संघको प्राविधिक सहयोगमा सञ्चालन हुने योगिनी कपको पहिलो संस्करण २०७६ सालमा आयोजना भएको थियो । ‘दोस्रो संस्करणले खजुरामा फुटबलप्रतिको आकर्षणलाई अझ बढाउने अपेक्षा गरिएको छ,’ प्रतियोगिता संयोजक राईले भने ।
योगिनी कप सकिएकै भोलिपल्ट खजुरामा ‘प्रथम खजुरा गोल्डकप फुटबल’ प्रारम्भ हुनेछ । खजुरा गाउँपालिकाको संरक्षकत्वमा डाँफे स्पोर्टस् क्बलले यो एतिहासिक खेल उत्सव आरम्भ गर्न लागेको हो । क्लबका अध्यक्ष बालाराम खत्रीका अनुसार, प्रतियोगितामा दुई विदेशी टिमसहित आठ टोलीको सहभागिता रहनेछ । जसमा संकटा क्लब, एपीएफ क्लब, चर्च ब्वाइज क्लब जस्ता चर्चित घरेलु टोलीसँगै नाइजेरिया र भारतका क्लबहरूले पनि प्रतिस्पर्धा गर्नेछन् ।
प्रतियोगितालाई अझ रोमाञ्चक बनाउँदै विजेताले ७ लाख रुपैयाँ, ट्रफी, मेडल र प्रमाणपत्र प्राप्त गर्नेछ भने उपविजेताले ४ लाख रुपैयाँसहित सम्मानित हुनेछन् । उत्कृष्ट खेलाडी र विधागत उत्कृष्टलाई पनि विशेष पुरस्कार प्रदान गरिनेछ ।
