स्वदेशी लगानी, सामूहिक स्वामित्व र नेपाली आतिथ्य संस्कृतिको आधारमा अघि बढिरहेको होटल पौवा प्रालिले आफ्नो १० वर्षे गौरवमय यात्रा पूरा गरेको जनाएको छ ।
१० वर्षअघि चैत २५ गतेबाट औपचारिक सेवा सुरु गरेको पौवाले छोटो समयमै नेपाली हस्पिटालिटी क्षेत्रमा छुट्टै पहिचान बनाउन सफल भएको हो । होटल पौवाले १० औँ वार्षिकोत्सवको अवसरमा देशभर रहेका सम्पूर्ण शाखाहरूमा ‘स्वाद उत्सव’ आयोजना गर्ने भएको छ ।
स्थापना दिवस, स्वाद उत्सव र नयाँ वर्ष शुभकामना साँझको बारेमा जानकारी दिन नेपालगन्जमा मंगलवार गरिएको अन्तरक्रियात्मक भेटघाटमा होटल पौवाका अध्यक्ष दुर्गाप्रसाद भण्डारीले १९ जनाको लगानीबाट सुरु भएको पौवामा २५० बढी लगानीकर्ता, १ हजार बढी कर्मचारी र २० वटा शाखा विस्तार भएको जानकारी दिए ।
आगामी चैत्र २८ गते लगानीकर्ताहरुबीच लगानी सम्मेलन आयोजना गरिएको जनाउँदै अध्यक्ष भण्डारीले आगामी १० वर्षमा १०० शाखाको लक्ष्य पुरा हुने योजना सुनाए । ‘मिसन १००’ लक्ष्यसहित आयोजना हुने उक्त सम्मेलनमार्फत व्यवस्थापन क्षमता, ब्रान्ड विश्वसनीयता र संस्थागत परिपक्वता अभिवृद्धि गर्ने योजना रहेको अध्यक्ष भण्डारीले बताए ।
अध्यक्ष भण्डारीका अनुसार, वार्षिकोत्सवको अवसरमा कम्पनीले देशभर रहेका आफ्ना सबै शाखाहरूमा ‘स्वाद उत्सव’ आयोजना गर्ने जानकारी दिए । यही चैत्र २६, २७ र २८ गते सञ्चालन हुने उत्सवमा नेपाली रैथाने परिकार, विशेष आतिथ्य र मौलिक स्वादमार्फत ग्राहकलाई फरक अनुभव प्रदान गरिने जनाइएको छ ।
कार्यक्रममा सहभागी पत्रकारहरुलाई जानकारी दिंदै होटल पौवाका ब्राण्डिङ विभाग प्रमुख विष्णुप्रसाद भण्डारीले स्वाद उत्सवमा देशभरका पौवा शाखाबाट ४० हजारभन्दा बढी निमन्त्रणापत्र वितरण गरिएको छ ।
रुपन्देहीको सालझण्डीस्थित सानो घरका सात कोठाबाट सुरु भएको पौवाको यात्रा आज देशका विभिन्न स्थानमा २० शाखासम्म विस्तार भइसकेको छ । ‘जहाँबाट नेपाली आतिथ्यको सुरुवात हुन्छ’ भन्ने मूल नाराका साथ अघि बढिरहेको कम्पनीले नेपाली भाषा, संस्कृति र परिकारको संरक्षण तथा प्रवद्र्धनलाई प्राथमिकतामा राख्दै आएको जनाएको छ ।
यसैबीच, नयाँ वर्ष २०८३ को स्वागतलाई लक्षित गर्दै नेपालगन्ज शाखामा चैत्र ३० गते ‘शुभकामना साँझ–२०८३’ आयोजना गरिने भएको छ । कार्यक्रममा चर्चित गायक कमल खत्री र गायिका समिक्षा अधिकारी को विशेष प्रस्तुति रहनेछ । कार्यक्रमको सञ्चालन प्रस्तोता सहिरमान श्रेष्ठले गर्नेछन् भने स्थानीय मोहिनी डान्स ग्रुप र गायक प्रिन्स ठकुरीको समेत प्रस्तुति रहने बताइएको छ ।
होटल पौवाले विगतदेखि नै नेपाली चाडपर्व र संस्कृतिसँग जोडिएका कार्यक्रमहरू गर्दै आएको छ । दशैंपछिको सराय नाच, तिहारको देउसी–भैलो, माघीको खिचडी तथा महाशिवरात्रिमा शिव भजनजस्ता गतिविधिमार्फत कम्पनीले सांस्कृतिक संरक्षणमा योगदान दिँदै आएको महाप्रबन्धक गिरीराज पाण्डेले जानकारी दिए ।
‘कम्पनीले वार्षिकोत्सवका अवसरमा आयोजना हुने ‘स्वाद उत्सव’ र ‘शुभकामना साँझ–२०८३’ कार्यक्रममा स–परिवार सहभागी भई नेपाली स्वाद, संस्कृति र मनोरञ्जनको अनुभव लिन सबैलाई हार्दिक आमन्त्रण गरेको छ,’ पत्रकारहरुसँगको कार्यक्रम सहजीकरण गरिरहेका पौवाका संस्थापक सञ्चालक शरण कर्माचार्यले भने ।
होटल पौवाले देशमै आफ्नो सबैभन्दा ठुलो प्रोपर्टीका रुपमा नेपालगन्जमा पाँच तारे होटल निर्माण गरिरहेको छ । सय करोडबडीको लगानीमा बनिरहेको होटल निर्माण कार्य भइरहेको छ ।
