नेपालगन्ज शहरको मुटु मानिने मुख्य सडक क्षेत्रमा अब पैदलयात्रीका लागि सहज र सुरक्षित यात्रा सुनिश्चित गर्ने लक्ष्यसहित फुटपाथ निर्माणको कामले गति लिएको छ ।
त्यसक्रममा बुधवार सुर्खेत रोड अन्तर्गत धम्बोझी चोकदेखि कारकाँदो चोकसम्मको व्यस्त सडक खण्डमा नालीको किनारबाट दुई मिटर चौडा मार्किङ गर्दै डोजर लगाइएको हो । त्यसक्रममा कतिपयले हठात् डोजर लगाएर जनधनको क्षति पुर्याएको भन्दै आक्रोश व्यक्त गरे ।
‘भत्काउने भन्दा निर्माणलाई जोड दिनुपर्छ,’ सडक छेउ फोहर, अव्यवस्थित नाला देखाउँदै व्यवसायी मो. सरिफ बागवानले दैनिक नेपालगन्जसँग भने, ‘स्थानीय सरकारको काम जिम्मेवार र जनउत्तरदायी भएन ।’
नेपालगन्ज उपमहानगरपालिकाले वर्षौंदेखि अतिक्रमणमा परेको सडक किनारलाई व्यवस्थित बनाउने अभियान अन्तर्गत अवैध संरचना हटाउन डोजर परिचालन गर्नु परेको नगर प्रमुख प्रशान्त विष्टले भने ।
नगर प्रमुख विष्टका अनुसार, अहिले खाली गरिएको ठाउँमा फुटपाथ निर्माण गरिनेछ, जससँगै हरियाली प्रवद्र्धनका लागि वृक्षारोपण पनि गरिने योजना छ । शहरको सौन्दर्य र व्यवस्थित यातायात दुवैलाई ध्यानमा राखेर सुरु गरिएको यो अभियानले नेपालगन्जलाई आधुनिक शहरी स्वरूपतर्फ अघि बढाउने अपेक्षा गरिएको छ ।
नगर प्रमुख विष्टका अनुसार, उपमहानगरपालिकाले यसअघि नै सूचना जारी गरी अवैध संरचना हटाउन समय दिएको थियो । तर, अटेर गरिएपछि बाध्य भएर डोजर चलाएर संरचना हटाउन थालिएको हो । ‘सार्वजनिक स्थल अतिक्रमण सह्य हुँदैन, व्यवस्थित शहर निर्माणका लागि कडाइ आवश्यक हुन्छ,’ उनले दैनिक नेपालगन्जसँग भने ।
नगर प्रमुख विष्टका अनुसार, फुटपाथ निर्माण केवल धम्बोझी–कारकाँदो खण्डमा सीमित छैन । आयल निगम चोकदेखि सरोजनी अस्पताल हुँदै राँझा चोक जाने सडकमा पनि यस्तै योजना लागू गरिँदैछ । ‘राँझा क्षेत्रमा भने चैत १५ गतेदेखि नै निर्माण कार्य सुरु भइसकेको छ, जसले अभियानलाई थप तीव्र बनाएको छ,’ विष्टले भने ।
२ करोड १५ लाख रुपैयाँको लागत अनुमान गरिएको यो योजनामा गाउँले कन्स्ट्रक्सन ÷ पञ्चदेवी निर्माण सेवा र ए एण्ड ए कन्स्ट्रक्सन जेभीले २ करोड ७ लाख ९९ हजार २ सय ११ रुपैयाँ ६६ पैसामा ठेक्का सम्झौता गरेका छन् । उपमहानगरपालिकाका वरिष्ठ इन्जिनियर भुपेन्द्र बोहराका अनुसार, सम्झौता अवधि असार २० गतेसम्म तोकिएको छ ।
यसअघिनै विपी चोक देखि धम्बोझी चोकसम्म फुटपाथ बनाउने काम धमाधम भइरहेको छ । विपीचोक देखि गणेशमान चोकतर्फ भने समस्या आएपछि फेरि बनाउने योजना नेपालगन्ज उपमहानगरको छ ।
