रुपैडिहा बहराइच–नेपालगन्ज रेलमार्गमा छिट्टै रेल सञ्चालन हुने आशा पुनः बलियो बनेको छ । भारतीय पत्रकार सुरेन्द्र मधेसियाका अनुसार, शनिबार साँझ पूर्वोत्तर रेलवेका महाप्रबन्धक उदय बोलवर्करको नेतृत्वमा उच्चस्तरीय टोलीले रुपैडिहास्थित नेपालगन्ज रोड रेलवे स्टेशनको स्थलगत निरीक्षण गरेपछि स्थानीयमा उत्साह बढेको हो ।
महाप्रबन्धकसँगै डीआरएम लखनऊ गौरव अग्रवाल र प्रधान सुरक्षा आयुक्त सत्यप्रकाश समेत सहभागी टोलीले स्टेशनको प्लेटफर्म, पेयजल व्यवस्था तथा यात्रु प्रतीक्षालयको अवस्थाबारे विस्तृत अवलोकन गरेको थियो। गोंडा–बहराइच–नानपारा हुँदै रुपैडिहा पुगेको स्पेशल ट्रेनमार्फत गरिएको निरीक्षणलाई रेल सञ्चालनको तयारीको महत्वपूर्ण चरणका रूपमा हेरिएको छ ।
यसअघि १९ सेप्टेम्बर २०२५ मा सीआरएस निरीक्षण सम्पन्न भए पनि त्यसपछि उच्चस्तरीय अनुगमन नभएकाले रेल सञ्चालनमा ढिलाइ भइरहेको थियो । करिब आठ महिनापछि भएको यस निरीक्षणले भने अब छिट्टै रेल सेवा सुरु हुने अपेक्षा जगाएको छ ।
रेलवेका सीपीआरओ सुमित कुमारका अनुसार, स्टेशनको पूर्वाधार, प्लेटफर्म निर्माण तथा पानीको व्यवस्थाको समीक्षा गरिएको छ र गोंडा–रुपैडिहा खण्डमा छिट्टै रेल सञ्चालन गर्ने तयारी भइरहेको छ । स्थानीय बासिन्दाले अब ‘रेलमा सरर’ यात्रा गर्ने दिन धेरै टाढा नरहेको विश्वास व्यक्त गरेका छन् । नेपालगन्जवासी समेत त्यही विश्वासमा रमाइरहेको प्रतिक्रिया पाएको पत्रकार मधेसियाले बताए ।
