जिल्ला प्रहरी कार्यालयले नेपालगञ्ज उपमहानगरपालिका वडा नम्बर १२ मा भएको हत्या घटनामा संलग्नताको आरोपमा ६ जनालाई पक्राउ गरेको छ
प्रहरी कार्यालय बाँकेको प्रेस विज्ञप्तिअनुसार ब्रतबन्ध कार्यक्रममा सहभागी भएका युवाहरूबीच सामान्य विवाद बढ्दै जाँदा एक जनाको ज्यान गएको छ भने ६ जना पक्राउ परेका छन्।
सोमबार साँझ नेपालगञ्ज उपमहानगरपालिका–१२ बेलासपुर बस्ने २१ वर्षीय प्रितम अधिकारीको ब्रतबन्ध कार्यक्रममा आएका साथीहरू कार्यक्रमपछि बस्ने ठाउँ अभावका कारण नजिकै आफन्त दीपेन्द्र रोकायको घरमा एउटै कोठामा बसेका थिए।
मंगलबार बिहान करिब २ बजे दिपेन्द्र राज गिरी र विशाल चन्द ठकुरीबीच सामान्य विषयमा विवाद भएको थियो।विवादपछि गिरीले आफ्नो घर लम्कीचुहा नगरपालिका बस्ने साथीहरूलाई बोलाएका थिए। बिहान करिब ५ बजे उनीहरू मोटरसाइकलमा नेपालगञ्ज आइपुगी गिरीसहित समूहले सुतिरहेका विशाल चन्द ठकुरी र अन्य व्यक्तिमाथि बियरका बोतल र चक्कुजस्ता धारिलो हतियार प्रहार गरेको प्रहरीले जनाएको छ।
आक्रमणपछि ज्यान जोगाउन भाग्ने क्रममा ठकुरीलाई करिब १०० मिटरसम्म लखेटेर आक्रमण गरिएको थियो। गम्भीर घाइते ठकुरीको उपचारका क्रममा संजीवनी कलेज अफ मेडिकल साइन्सेज मा मंगलबार बिहान करिब ६ बजे मृत्यु भएको प्रहरीले जनाएको छ।
घटनामा घाइते भएका चन्दननाथ नगरपालिका–४ का २० वर्षीय योगेन्द्र कामी उपचारपछि डिस्चार्ज भएका छन्।घटनामा संलग्नमध्ये ४ जनालाई ठाकुरबाबा नगरपालिका–२ अग्रेनी नजिकबाट र २ जनालाई नेपालगञ्जबाट पक्राउ गरिएको प्रहरीले जनाएको छ। पक्राउ पर्नेमा दिपेन्द्र राज गिरी, बिबियस कुँवर, सुशील खत्री, खकेन्द्र देवकोटा, सन्तोष संज्याल र रुपेश थापा रहेका छन्।
प्रहरीले घटनास्थलबाट चक्कु, सु.प.प्र.०१–०१४ प १२५६ नम्बरको एनएस २०० मोटरसाइकल तथा बियरका बोतल र फुटेका टुक्राहरू बरामद गरेको छ। घटनाबारे थप अनुसन्धान भइरहेको जिल्ला प्रहरी कार्यालय बाँकेका प्रहरी नायब उपरीक्षक दीपक पातलीले जानकारी दिएका छन्।
