भारतीय प्रतिष्ठित म्याक्स अस्पतालले बिहीबार नेपालगन्जमा नेपाली चिकित्सकहरू बीच मेडिकल शिक्षाबारे भव्य कार्यशालाको आयोजना गरेको छ ।
म्याक्स अस्पतालबाट आएका विशेषज्ञ चिकित्सकहरूले विभिन्न अध्ययन, अनुभव र विशेषज्ञता प्रस्तुति सहितको कार्यशाला नेपाल मेडिकल एशोसिएसन नेपालगन्ज च्याप्टरका अध्यक्ष डा. विनोद कुमार थापाले समुद्घाटन गरे । ‘यसले विज्ञ चिकित्सक बीच अनुभव र ज्ञान सातासाटको अभूतपूर्व अवसर प्रदान गरेको छ’, वेष्टर्न अस्पतालका प्रमुख समेत रहेका अध्यक्ष थापाले भने ।
कार्यक्रमको नेतृत्व गरेर आएका भारत उत्तरप्रदेशको राजधानी लखनउ स्थित म्याक्स सुपर विशेषज्ञ अस्पतालका एभिपि तथा युनिट हेड प्रमित मिश्राले विश्वस्तरमा भैरहेको चिकित्सा क्षेत्रका ज्ञान, नवप्रवर्तन र सहकार्यको महत्वको बारेमा प्रकाश पारे । ‘हामीले नेपालको छिमेकमै ठूलो लगानीमा विश्वस्तरीय अस्पताल सञ्चालनमा ल्याएका छौं, जहाँ सहुलियतमा सुपर स्पेशियालिष्ट सर्भिस उपलब्ध हुनेछ’, मिश्राले दैनिक नेपालगन्जको जिज्ञासामा भने, ‘त्यसका लागि छुट्टै नेपाल हेर्ने डेस्कको व्यवस्था गरेका छौं, जहाँ नेपाली भाषा मात्रै होइन रूपैयाँ र भावना पनि चल्नेछ ।’
कार्यशालामा नेपाल मेडिकल एशोसिएसन (एनएमए) का महासचिव डा. दिनेश कुमार चौधरीले नेपालको स्वास्थ्य सेवा क्षेत्रमा भैरहेको परिवर्तनबारे खुलेर चर्चा गरे । ‘यस्तो सहकार्यपूर्ण कार्यक्रमहरूले ज्ञानको खाडललाई कम गर्न र क्षेत्रीय स्तरका सेवाको गुणस्तरलाई सुधार गर्न ठूलो मद्दत पुर्याउँछ’, डा. चौधरीले कार्यक्रममा भने ।
कार्यशालामा म्याक्स सुपरस्पेशियालिटी अस्पताल लखनउका बहुविशेषज्ञताका वरिष्ठ चिकित्सकहरूले आफ्ना विभिन्न अनुभव, ज्ञान र अभ्यासहरूबारे आफ्ना प्रस्तुतिहरू गरेका थिए । म्याक्सका वरिष्ठ निर्देशक तथा प्रमुख मडिकल अन्कोलोजिष्ट डा. आलोक गुप्ता, युरोलोजी, एन्ड्रोलोजी, मृर्गौला प्रत्यारोपण तथा रोबोटिक यूरो अन्कोलोजिका निर्देशक डा. आदित्य के शर्मा, न्यूरो सर्जरीका निर्देशक डा. मनु रस्तोगी र डा. सम्शेरीले आफ्ना प्रस्तुति गरेका थिए । अस्पतालका वरिष्ठ निर्देशक तथा प्रमुख मेडिकल अनकोलोजिस्ट डा. आलोक गुप्ताले क्यान्सर हेरचाहमा भएका पछिल्ला प्रगतिबारे विस्तृत जानकारी दिए ।
त्यस्तै, म्याक्सका युरोलोजी, एन्ड्रोलोजी, मिर्गौला प्रत्यारोपण तथा रोबोटिक युरो–अनकोलोजीका निर्देशक डा. आदित्य के. शर्माले रोबोटिक सर्जरीले बिरामीको हेरचाहमा कसरी रूपान्तरणकारी प्रभाव पारिरहेको छ भन्ने कुरा प्रस्तुत गरेका थिए ।
बाँकेका सरकारी अधिकारी सहित ठूलो संख्यामा सहभागी चिकित्सकहरू बीच भएको कार्यशालामा म्याक्सका न्युरोसर्जरीका निर्देशक डा. मनु रस्तोगीले मिनिमली इन्भेसिभ प्रविधिहरूमा आधारित नयाँ प्रविधिहरूबारे चर्चा गर्दै स्पाइन सर्जरीमा आएको नयाँ परिवर्तनबारे प्रकाश पारेका थिए ।
‘यस कार्यलाई हामी आउँदा दिनमा पनि सक्दो निरन्तरता दिने र नेपाली चिकित्सकहरूको ज्ञान वृद्धिका साथै चिकित्सा अभ्यासका पछिल्ला अनुभवलाई साटासाट गर्न ध्यान दिने छौं’, म्याक्सका युनिट हेड मिश्राले भने । कार्यशालाका विभिन्न सत्रहरूको अध्यक्षता प्राध्यापक डाक्टर अनुप शर्मा र डा. विनोद कुमार थापाले गरेका थिए । कार्यक्रममा नेपालगन्ज उपमहानगरपालिकाका नगर प्रमुख प्रशान्त विष्ट, बाँकेका प्रमुख जिल्ला अधिकारी खगेन्द्र रिजाल लगायत पनि सहभागी थिए ।
