अखिल क्रान्तिकारीले शैक्षिक हस्तक्षेपको पूर्व तयारी गरिरहेको स्पष्ट संकेत गरेको छ । शुक्रबार नेपालगन्जमा सरोकारवालाहरूसँग अन्तरक्रियात्मक कार्यक्रम गरेको अखिलले आफ्नो १० बुंदे तत्कालीन कार्यक्रम सार्वजनिक गर्दै शैक्षिक क्षेत्रमा गर्ने हस्तक्षेपको पूर्व तयारीबारे संकेत दिएको हो । त्यसबारे अधिकांस वक्ताहरूले भने, ‘नीतिगत रूपमै प्रष्टता’ खोजे ।
नेपालको शिक्षा सम्बन्धी व्यवस्थामा मूलभूत उद्देश्य नै फरक परेको भन्दै अखिल क्रान्तिकारीका केन्द्रीय संयोजक मिलन राईले ‘जागिरे मानसिकता र पराधिन सोंचको किवास गर्ने विद्यमान पाठ्यक्रम नै खारेज गर्नुपर्ने’ औंल्याएर । उनको जोड छ, शिक्षालाई श्रमसँग अलग गरिदिने पाठ्यक्रमका कारण विदेश पलायनको जोखिम बढ्दै गएकाले यसलाई नयाँ ढंगले तयार गरिनु आवश्यक छ ।
विश्वविद्यालयका प्राध्यापक, शिक्षक नेता, निजी क्षेत्रका शैक्षिक लगानीकर्ता, विद्यार्थी नेता, सरकारी कार्यालयका प्रतिनिधिहरू सहितको सहभागितामा गरिएको अन्तरक्रियात्मक बहसका अधिकांस वक्ताहरू विद्यामान राजनीति भ्रष्ट भैदिंदा त्यसको प्रत्यक्ष प्रभाव शिक्षा क्षेत्रमा परेको कुरामा एकमत देखिए । ‘दलहरूमा समर्पण भाव नदेखिंदा शिक्षा क्षेत्र धराशयी हुन पुग्यो’, प्राध्यापक डा. जनार्दन आचार्यले भने, ‘मुलुक कमिशनको जालोमा फँसेको छ ।’ प्रा.डा. आचार्यले प्राविधिक शिक्षा आवश्यक भएको औंल्याउँदै शिक्षा क्षेत्रलाई सीपमूलक बनाउँदै अगाडि बढाउन ध्यानाकर्षण गराए ।
प्राध्यापक कमानसिंह बोहराले विश्वविद्यालय सम्बन्धी नीतिमा गरिएको मनपरीले नेपालमा विश्वविद्यालय स्थापना ‘मजाक’ बनाइएको टिप्पणी गरे । उनको पनि जोड थियो, ‘शिक्षा क्षेत्रलाई भद्रगोल बनाउने वर्तमान अवस्थाको अन्त्य गरी विद्यार्थीलाई उत्पादनसँग जोड्न आवश्यक रहेको बताए ।
कार्यक्रमका प्रमुख वक्ता क्रान्तिकारी कम्युनिष्ट पार्टी नेपालका प्रवक्ता धर्मेन्द्र बास्तोलाले शैक्षिक स्रोत नै भ्रष्ट र परनिर्भर हुँदा मुलुकको अवस्था जर्जर भएको बताए । ‘त्यसका लागि स्पष्ट र दीर्घकालीन शिक्षा नीति आवश्यक छ’, विद्यार्थीहरूलाई देशभरबाट विचार संकलन गरी निर्णयमा पुग्न र त्यसको कार्यान्वयनका लागि सरकार तथा त्यसका सम्बन्धित निकायलाई जिम्मेवार बनाउन सुझाव दिए ।
संस्थागत विद्यालयको प्रतिनिधित्व गर्दै प्याब्सनका प्रतिनिधि शरद रावलले विकल्प नदिंदासम्म निजी क्षेत्रलाई नजिस्क्याउन आग्रह गरे । ‘स्पष्ट नीति बनाएर राज्यले गर्ने दिशा निर्देशनमा संस्थागत विद्यालय अगाडि हिड्ने हो’, रावलको भनाइ थियो, ‘राजनीतिक उपलब्धीको सिढीका रूपमा शिक्षा क्षेत्रलाई बनाउने र त्यसको पीडित निजी शैक्षिक विद्यालय सञ्चालकहरू बनाइदिनु भएन ।’
वरिष्ठ पत्रकार नरेन्द्रजंग पिटर, मब क्याम्पसका उपप्राध्यापक विष्णु केसी, जिल्ला शिक्षा समन्वय समितिका संयोजक राम सुरेश यादव, अखिल नेपाल राष्ट्रिय शिक्षक संगठनका केन्द्रीय सदस्य बामदेव सुवेदी लगायतका वक्ताहरुले अखिल क्रान्तिकारीका ६ नम्बर प्रदेश इन्चार्ज हरि विष्टले प्रस्तुत गरेको कार्यपत्रमाथि आफ्ना विचार राखेका थिए । विष्टले वर्तमान शिक्षाको संकट र समाधानका विषयमा आफ्नो कार्यपत्र प्रस्तुत गर्दै संगठनका तत्कालीन कार्यक्रमहरु सार्वजनिक गरेका थिए ।
शैक्षिक हस्तक्षेपको पूर्व तयारीमा अखिल
