अठार महिनादेखि रोकिएको म्याग्दीको बेनी नगरपालिका–५ पछैको रावण पार्क निर्माण योजना अझै सुरु भएको छैन । साझेदारी गरेको निकायमा बेनी नगरपालिकाले नियमित प्रतिवेदन बुझाउन नसक्दा बजेट व्यवस्थापन हुन नसकेको योजनाका निर्माण व्यवसायी पनि पन्छिन खोजेपछि अलपत्र पार्क निर्माण बनेको हो । संस्कृति, पर्यटन तथा नागरिक उड्डयन मन्त्रालयको पर्यटन पूर्वाधार तथा पर्यटन उपज विकास साझेदारी कार्यक्रमअन्तर्गत रावण मूर्तिसहित पार्क निर्माण गर्न विसं २०७७ फागुनमा काठमाडौँ कलङ्कीको धर्म एस कास्यप जेभीसँग रु एक करोड ७६ लाख ७७ हजार पाँच सय ६३ मा ठेक्का भएको थियो । सम्झौताको सर्तअनुसार विसं २०७९ फागुनमा निर्माण सकिनुपर्ने पार्कको हालसम्मको भौतिक प्रगति २५ प्रतिशत रहेको नगरपालिकाले जनाएको छ । पछैस्थित पुलाश्रम मन्दिरका पुजारी जगदीश सुवेदीले विसं २०७८ असारदेखि यता रावण पार्क निर्माणको काम नभएको बताउनुभयो । “हिन्दू धर्मग्रन्थ रामायणका पात्र पुलह, पुलत्य ऋषिको तपोभूमिमा पार्क निर्माण शुरु हुँदा खुसी लागेको थियो”, उहाँले भन्नुभयो, “पार्क निर्माणमा भएको ढिलाइले यो ठाउँ ओझेलमा परेको छ, निराश भएका छौँ ।” पुजारी सुवेदीका अनुसार पुलह, पुलत्स्य ऋषिले तपस्या गरेको पछैमा रावण जन्मिएको र उनको नावी गाडेको ठाउँमा राखिएको शिला अझै सुरक्षित छ । पर्यटन मन्त्रालयको ७० प्रतिशत र नगरपालिकाको ३० प्रतिशत लागत साझेदारीमा पार्क निर्माण सुरु गरिएको थियो । नगरपालिकाका प्राविधिकले गत वर्ष प्रगति विवरण नबुझाएकोले मन्त्रालयले भुक्तानी रोकेपछि पार्क निर्माण प्रभावित भएको नगर प्रमुख सुरत केसीले बताउनुभयो । “हाम्रा प्राविधिकको लापरबाहीले मन्त्रालयले बजेट नदिएपछि रोखिएको रावण पार्क निर्माणका लागि चालु आर्थिक वर्षमा लयमा फर्काउन लागेका छौँ”, उहाँले भन्नुभयो, “मन्त्रालयले हालै रु १५ लाख बजेट पठाएकाले नगरपालिकाको दायित्वसमेत थप गरी यो आवमा पार्क पूरा गर्न पहल थालेका छौँ ।” रावणको मूर्ति बनाउन प्रयोग हुने धातुको दर कम कबोलेका कारण निर्माण व्यवसायीले ठेक्का तोड्न चाहे पनि धरौती जफत गर्ने र कालोसूचीमा राख्ने प्रक्रिया अघि बढाएपछि आगामी चैत १९ गते मूर्ति ल्याएर आउने प्रतिबद्धता जनाएको नगर प्रमुख केसीले बताउनुभयो । करिब १४ रोपनी क्षेत्रफलमा फैलिएको पुलाह आश्रम क्षेत्रमध्ये चार रोपनीमा पार्क बनाउन लागिएको हो । आश्रममा रहेका ऋषिमूनि मन्दिर, हवन कुण्ड, रावणको नाभी गाडिएको भनिने स्थानलाई यथावत् संरक्षण गरी छ मिटर अग्लो रावणको मूर्तिसहित बगैँचा, विश्रामस्थल, घेरबार र जमिन संरक्षणलगायत पूर्वाधार निर्माण गर्ने योजना छ । घेराबारका लागि पर्खाल निर्माण पनि भइसककेको छ । पार्क निर्माणले पर्यटन प्रवद्र्धन हुने स्थानीयले आशा गरेका छन् । निर्माण कम्पनीका प्रतिनिधीले काठमाडौँमा रावणको मुर्ति निर्माण गरिसकेको बताएका छन् । रावण पार्क निर्माण स्थल पछैबाट धौलागिरि, नीलगिरि, अन्नपूर्ण हिमशृङ्खला, सूर्योदयको मनोरम दृश्यका साथै म्याग्दी र कालीगण्डकी नदी दोभानमा अवस्थित बेनीसहित जिल्लाका अधिकांश भूगोलको दृश्यावलोकन गर्न सकिन्छ । यहाँ पुलह, कपिल र जडभरत ऋषिले तपस्या गरी सिद्धि प्राप्त गरेको पौराणिक मान्यता छ ।
रावण पार्क निर्माण योजना रोकियो
- Dainik Nepalgunj
![](https://dainiknepalgunj.com/wp-content/uploads/2024/03/Rowan-park-1-1024x575.jpg?v=1710320623)
default
- Categories: News
Related Content
थारू समुदायमा अट्वारी पर्वको रौनक
by
Dainik Nepalgunj
September 8, 2024
मनाइयो निजामति दिवस
by
Dainik Nepalgunj
September 8, 2024
श्रष्टा रिजाल र शाहलाई ‘पशुपति शाह स्मृति पुरस्कार’
by
Dainik Nepalgunj
September 8, 2024
पब्लिक स्पिच नेपालको सेमिफाइनल हुँदै
by
Dainik Nepalgunj
September 8, 2024
बाल संरक्षण नक्साङ्कन निर्माण
by
Dainik Nepalgunj
September 7, 2024