कास्कीदेखि बाँकेसम्म १० जना पक्राउ
देशका विभिन्न जिल्लामा प्रहरीले चलाएको लागूऔषध नियन्त्रण अभियानका क्रममा ब्राउनसुगर, टापेन्टाडोल, ट्रामाडोल, फेनारगन र नोर्फिनसहित १० जना पक्राउ परेका छन् । झापा, पर्सा, कास्की, सुर्खेत, मकवानपुर, बाँके र सुनसरीमा छुट्टाछुट्टै कारबाही गर्दै प्रहरीले उनीहरूलाई नियन्त्रणमा लिएको हो । पक्राउ परेकामध्ये केहीको साथबाट ठूलो परिमाणमा लागूऔषध र नगदसमेत बरामद भएको प्रहरीले जनाएको छ ।
सबैभन्दा ठूलो परिमाणको लागूऔषध कास्कीबाट बरामद भएको छ । पोखरा महानगरपालिका–५ मा डेरा गरेर बस्दै आएका २९ वर्षीय मनिष ठकुरीलाई प्रहरीले आइतबार बिहान पक्राउ गरेको हो । वडा प्रहरी कार्यालय बैदामबाट खटिएको टोलीले उनको कोठामा तलासी गर्दा नियन्त्रित लागूऔषध टापेन्टाडोल ३९ हजार ५ सय ट्याब्लेट र १ लाख ८९ हजार ५ सय रुपैयाँ नगद फेला पारेको थियो । प्रहरीले बरामद लागूऔषध र रकम नियन्त्रणमा लिएर अनुसन्धान अघि बढाएको जनाएको छ ।
झापामा मात्रै दुई फरक घटनामा तीन जना पक्राउ परेका छन् । मेचीनगर नगरपालिका–६ पुरानो मेचीपुलबाट १४ ग्राम ६ सय ६० मिलिग्राम ब्राउनसुगर जस्तो देखिने पदार्थसहित १८ वर्षीय किशोर पक्राउ परेका छन् । उनलाई शनिबार दिउँसो लागूऔषध नियन्त्रण ब्यूरो शाखा कार्यालय काँकरभिट्टाको टोलीले नियन्त्रणमा लिएको हो ।
उता दमक नगरपालिका–९ मा शनिबार बिहान प्रहरीले मे १ ह ५३४६ नम्बरको अटो जाँच गर्ने क्रममा ४ सय ८० मिलिग्राम ब्राउनसुगर जस्तो देखिने पदार्थ बरामद गरेको थियो । त्यसक्रममा कमल गाउँपालिका–१ घर भएका ३० वर्षीय सुर्य भन्ने बुद्धि साहु पक्राउ परेका हुन् । कोशी प्रदेश प्रहरी कार्यालय विराटनगरसमेतको टोलीले उनलाई नियन्त्रणमा लिएको जनाएको छ ।
घटनाको थप अनुसन्धान गर्दै जाँदा अटो धनी अर्जुनधारा नगरपालिका–११ घर भएका ३२ वर्षीय सन्देश भन्ने टिका बहादुर तामाङको दमक नगरपालिका–९ स्थित कोठामा प्रहरीले तलासी गरेको थियो । तलासीका क्रममा १ ग्राम ३ सय मिलिग्राम ब्राउनसुगर जस्तो देखिने पदार्थ र ट्रामाडोल १५ ट्याब्लेट फेला परेपछि उनलाई पनि प्रहरीले पक्राउ गरेको छ ।
पर्साको वीरगंज महानगरपालिका–३१ कटगेनवा टोलमा शनिबार राति मोटरसाइकलमा सवार दुई जनालाई प्रहरीले लागूऔषधसहित पक्राउ गरेको छ । इलाका प्रहरी कार्यालय पटेर्वासुगौलीबाट खटिएको टोलीले ना ३९ प २५३२ नम्बरको मोटरसाइकल रोकेर जाँच गर्दा करिब ८ ग्राम ३५ मिलिग्राम ब्राउनसुगर जस्तो देखिने पदार्थ र डिजिटल तराजु १ थान बरामद गरेको थियो । पक्राउ पर्नेमा वीरगंज महानगरपालिका–३२ परासवा टोल बस्ने २० वर्षीय राहुल सिंहसहित दुई जना रहेका छन् ।
मकवानपुरको हेटौँडा उपमहानगरपालिका–१० बसपार्कबाट पनि शनिबार बेलुकी लागूऔषधसहित एक जना पक्राउ परेका छन् । जिल्ला प्रहरी कार्यालय मकवानपुरबाट खटिएको टोलीले हेटौँडा–१३ पदमपोखरी बस्ने २६ वर्षीय निग्मा लामाको साथबाट फेनारगन ६ एम्पुल र नोर्फिन ३ एम्पुल बरामद गरेको जनाएको छ ।
बाँकेको बैजनाथ गाउँपालिका–१ मानखोलाबाट २४ वर्षीय समिर शाही पक्राउ परेका छन् । शनिबार दिउँसो इलाका प्रहरी कार्यालय चिसापानीको टोलीले उनको साथबाट १ सय १० मिलिग्राम ब्राउनसुगर जस्तो देखिने पदार्थ बरामद गरेको थियो ।
सुर्खेतको वीरेन्द्रनगर नगरपालिका–१० बसपार्कमा शनिबार दिउँसो प्रहरीले दुई जनालाई नियन्त्रणमा लिएको छ । जिल्ला प्रहरी कार्यालय सुर्खेतबाट खटिएको टोलीले मुगुको छायाँनाथ रारा नगरपालिका–१ घर भएका २९ वर्षीय नरेश शाही र झापा घर भएका ३३ वर्षीय अविषेक केसीको साथबाट १ ग्राम ४ सय २० मिलिग्राम ब्राउनसुगर जस्तो देखिने पदार्थ फेला पारेको जनाएको छ ।
सुनसरीको इटहरी उपमहानगरपालिका–२ हलगडाबाट पनि आइतबार बिहान २३ वर्षीय कृष्ण राई पक्राउ परेका छन् । सामुदायिक प्रहरी बिट हलगडाबाट खटिएको टोलीले उनको साथबाट ९ सय २० मिलिग्राम ब्राउनसुगर जस्तो देखिने पदार्थ बरामद गरेको थियो ।
प्रहरीले सबै घटनामा पक्राउ परेकामाथि लागूऔषध सम्बन्धी कसुरमा थप अनुसन्धान भइरहेको जनाएको छ । ‘देशका विभिन्न जिल्लामा लागूऔषध ओसारपसार र कारोबार नियन्त्रणका लागि निगरानी बढाइएको छ,’ प्रहरी स्रोतले भन्यो, ‘पक्राउ परेकामाथि आवश्यक कानुनी प्रक्रिया अघि बढाइएको छ ।’