लुम्विनी प्रदेशका सामाजिक विकासमन्त्री जन्मजय तिमिल्सिनाले नेपालगन्जमा रहेको लुम्बिनी प्राविधिक विश्वविद्यालय यसक्षेत्रका विद्यार्थीहरुका लागि प्राविधिक ज्ञानको अवसर प्रदान गर्ने थलो भएकाले यसलाई चलायमान बनाउन आवश्यक रहेको बताएका छन् ।
प्राविधिक विश्वविद्यालयले नेपालगन्जस्थित आफ्नै भवनमा आयोजना गरेको शैक्षिक अन्तरक्रिया कार्यक्रमलाई सम्वोधन गर्दै उनले प्राविधिक विश्वविद्यालयले गुणस्तरीय शिक्षा प्रदान गर्दै रोजगारीको अवसर सिर्जना गर्ने बताए । ‘अव विश्वविद्यालय थपेर मात्रै काम छैन उनले भने–‘गुणस्तरीय शिक्षा प्रदान गरेर रोजगारी सुनिश्चित गर्ने खालको शिक्षा अहिलेको आवश्यक हो । विश्वविद्यालयहरु अव त्यसतर्फ केन्द्रीत हुन आवश्यक छ ।’
पढ्दै गर्ने, सीप सिक्दै गर्ने र रोजगारी पनि दिने खालको शिक्षा अहिलेको आवश्यकता रहेको उनले बताए । अहिले ठूलो जनशक्ति विदेश पलायन भइरहेको भन्दै यही अवस्था रहिरहे भोलि मलामी जाने मान्छे समेत गाउँमा भेट्न मुश्किल पर्ने उनको भनाइ छ ।
विश्वविद्यालयका सहकुलपति समेत रहेका मन्त्री तिमिल्सिनाले अवको शिक्षा नेपालमै रोजगारी सिर्जना गर्ने खालको हुन आवश्यक रहेकोमा जोड दिए । बाँके र बर्दियाका प्रदेश र स्थानीय तहका जनप्रतिनिधिहरु समेत सम्मेलित अन्तरक्रियामा बोल्ने सहभागिहरु पनि अवको शिक्षा गुणस्तरीय हुन आवश्यक रहेको बताए । उनीहरुले दक्ष जनशक्ति पाउनै मुश्किल परिरहेको उल्लेख गर्दै मागमा आधारित जनशक्ति उत्पादन गर्नतर्फ विश्वविद्यालयले ध्यान दिनुपर्नेमा जोड ।
विश्वविद्यालयका रजिस्टर रेगबहादुर भण्डारीले विश्वविद्यालय स्थापनाको उद्देश्य र हालसम्म शिक्षा क्षेत्रमा पु¥याएको योगदानमाथि चर्चा गरेका थिए । उनले विश्वविद्यालयको शैक्षिक र अनुसन्धान कार्यहरूमा केन्द्रित एक्सिलेन्सी र डिजिटल शिक्षालाई प्राथमिकता दिइरहेको जानकारी दिए । हालसम्म स्नातक तहका प्राविधिक फ्याकल्टीहरूमा १५० विद्यार्थी भर्ना भइसकेको र निकट भविष्यमा स्नातकोत्तर तहमा आर्टिफिसियल इन्टेलिजेन्स र अनुसन्धानका विषय समावेश गरिने बताए ।
निवर्तमान राष्ट्रिय योजना आयोग लुम्बिनी प्रदेशका अध्यक्ष नकुल केसीले आफ्नो कार्यपत्र प्रस्तुत गर्दै विश्वविद्यालयले डिजिटल शिक्षालाई आर्थिक आयआर्जनसँग जोडेर युवाहरूलाई सक्षम बनाउनु आवश्यक रहेको धारणा राखेका थिए । गुणस्तरीय शिक्षाको माध्यमबाट स्थानीय र बाह्य विद्यार्थीहरूलाई आकर्षित गर्न विश्वविद्यालयको भूमिकामा जोड दिए । ज्ञान व्यवस्थापन विशेषज्ञ कृष्णप्रसाद पौडेलले विश्वविद्यालयलाई ग्लोबली सक्षम जनशक्ति उत्पादन गर्ने उद्देश्यमा केन्द्रित रहन आग्रह गरे । उनले शिक्षा, सीप र आर्थिक गतिविधिलाई जोडेर स्थानीय निकायसँग समन्वय गरी गुणस्तरीय शिक्षामा लगानी गर्नुपर्नेमा जोड दिए । कार्यक्रम विश्वविद्यालयका उपकुलपति डा. विनोद ढकालको अध्यक्षतामा भएको थियो ।
उपप्राध्यापक प्रतिक चन्दको स्वागत मन्तव्यबाट सुरु भएको कार्यक्रमको खुला छलफल सत्रमा सहभागी विद्यालयका प्रधानाध्यापकहरूले पेशागत विकास, नीतिगत सुधार, कानूनी विषयहरू र मूल्याङ्कन प्रणाली सुधार गर्न विश्वविद्यालयले विशेष भूमिका खेल्नुपर्ने धारणा व्यक्त गरे ।
