बाँकेमा सक्रिय विभिन्न पेशागत संगठनले राजतन्त्र समर्थकले शुक्रबार काठमाडौंमा गराएको हिंसात्मक घटनाको भत्सर्ना गरेका छन् । साथै यी घटनाको सुक्ष्म तरिकाले छानबिन गरि दोषीलाई कानुन बमोजिम कारवाही गर्न सरकारको ध्यानाकर्षण गराएको छ ।
ती संगठनले नेपाली जनताको लामो संघर्ष र बलिदानीबाट प्राप्त संघीय लोकतान्त्रिक गणतन्त्रात्मक शासन व्यवस्था र पहिलो पटक जनताको संविधान प्राप्त भइ तीन तहका सरकार मार्फत संविधानको कार्यान्वयन र संघीयताको मर्मअनुरूप संघ, प्रदेश र स्थानीय सरकारहरू मार्फत विकासका पहल÷प्रयत्नहरू भइरहेको उल्लेख गरेका छन् ।
त्यो अवस्थामा प्राप्त उपलब्धिहरूको संस्थागत विकास हुँदै गर्दा काठमाण्डौमा राजावादी समुहले आन्दोलनका नाममा गरेको हिंसात्मक गतिविधि प्रति हाम्रो गम्भीर ध्यानाकर्षण भएको जनाए । संयुक्त अपील जारि गर्दै उनीहरूले सरकारी तथा निजी सम्पत्ति माथिको आगजनी र तोडफोड, संचारगृह र संचारकर्मी माथिको आक्रमण एवं हत्या, मानवअधिकारकर्मी एवं कर्मचारीमाथिको आक्रमण एवं दुव्र्यवहारको घटनाको सख्त विरोध जनाएका हुन ।
उनीहरूले दोषी उपर कानुनी कारबाहीका लागि सरकारसंग जोडदार माग गरेका छन् । हिंसात्मक घटनाको शिकार भइ मृत्यु वरण गर्न पुगेका पत्रकार सुरेश रजक र सवारी चालक सविन महर्जन प्रति हार्दिक श्रद्धाञ्जली व्यक्त गर्दै घाइतेहरूको शीघ्र स्वास्थ्यलाभको कामना गरिएको छ ।
लोकतन्त्र माथि धावा बोल्ने र यस माथि आँच पुर्याउने कुनै पनि कदम नेपाली जनताका निम्ति सर्वथा अस्वीकार्य भएको उनीहरूको ठहर छ ।
संविधान प्रदत्त अधिकारको प्रयोग गरि शान्ति पुर्वक आफ्नो कुरा राख्ने, आन्दोलन गर्ने र जनमत सृजना गर्ने कार्य जायज भएपनि आन्दोलनका नाममा गरिने हिंसात्मक गतिविधिको निन्दनीय गरेका छन् साथै यस खालका अराजक गतिविधिको समयमै नियन्त्रण गर्न र लोकतान्त्रिक मुल्य मान्यता प्रति सचेत रहन, सरकार र आम नागरिक समुदायमा अपील गरेका छन् ।
यसरी बिज्ञप्ति प्रकाशन गर्नेमा नेपाल निजामती कर्मचारी संगठन, बाँकेका अध्यक्ष देवीलाल चौलागाई, नेपाल राष्ट्रिय शिक्षक संगठन, बाँकेका सचिव डा.पूर्ण बहादुर शाही, प्रेस चौतारी नेपाल बाँकेका अध्यक्ष कमल डाँगी, प्रगतिशील तथा पेशागत कानुन व्यवसायी संगठन, बाँकेका उपाध्यक्ष सुरेश गौतम, प्रोग्रेसिभ इन्जिनियर्स एशोसियसन अध्यक्ष कन्चन तिवारी, प्रोग्रेसिभ इन्जिनियर्स एशोसियसनका केन्द्रीय सदस्य, प्रभात कुमार ठकुरी, एड्भोकेशी फोरमका प्रदेश संयोजक बसन्त गौतम, इन्सेक लुम्बिनी प्रदेश कार्यालय, नेपालगन्जका अधिकृत टेकनाथ आचार्य, मानव अधिकार एलायन्सका अध्यक्ष घनश्याम आचार्य, नेपाल स्वास्थ्य प्राविधिक संघका अध्यक्ष खडक रोका, दलित महिला संघ, बाँकेका उपाध्यक्ष ज्ञानु स्वर्णकार रहेका छन् ।
