नेपालगन्ज उपमहानगरपालिका वडा नं. १८ ले चालू आर्थिक वर्ष २०८२/८३ मा संघ, प्रदेश र स्थानीय सरकारबाट कुल १५ करोड ९० लाख रुपैयाँको बजेट व्यवस्थापन गर्न सफल भएको छ ।
शनिवार, नेपालगन्ज–१८ ले आगामी बजेट निर्माणका लागि योजना तर्जुमा गर्न आयोजना गरेको वडा भेलामा वडाध्यक्ष दीपककुमार बर्माले सिमित बजेट, स्रोत साधनबीच वडाबासीका असिमित अपेक्षा पुरा गर्न भइरहेको चुनौती राखे ।
वडा भेलामा वडाध्यक्ष बर्माले विकासको बहुआयामिक योजनासहित प्रस्तुत बजेटले धार्मिक, शैक्षिक र भौतिक पूर्वाधार निर्माणमार्फत वडाको रूपान्तरणको बाटो खोल्ने अपेक्षा गरिएको बताए ।
वडाध्यक्ष बर्माका अनुसार, संघीय सरकारबाट सबैभन्दा धेरै रकम आएको छ । श्री तिरुपति बालाजी मन्दिरको सौन्दर्यकरण तथा पूर्वाधार निर्माणका लागि ३ करोड रुपैयाँ विनियोजन गरिएको छ । यस्तै गोर्खा साइकल स्टोर्स हुँदै स्प्रिङडेल स्कूलसम्मको सडक स्तरोन्नतिका लागि अर्को ३ करोड रुपैयाँ छुट्याइएको छ । त्यसैगरी सुर्खेत रोड, भाटभटेनी हुँदै भुजगाउँ नयाँ बस्तीमा सडक विस्तार र स्तरोन्नतिका लागि पनि ३ करोड बराबरको बजेट छुट्याइएको छ ।
संघीय सशर्त अनुदानतर्फ ७० लाख, २५ लाख, २५ लाख गरी तीन योजनामा १ करोड २० लाख रुपैयाँ विनियोजन भएको छ । यस्तै, प्रदेश सरकारबाट विशालचोक देखि बानिया गाउँ सडक स्तरोन्नतिका लागि ५० लाख र १५ लाख गरी ६५ लाख रकम आएको छ ।
वडाध्यक्ष बर्माका अनुसार, प्रदेश सशर्त अनुदानबाट दुर्गा भगवती टोल र शिवशक्ति टोलको सडकस्तर सुधारमा २५ लाख र ७० लाख गरी ९५ लाख विनियोजन गरिएको छ ।
स्थानीय सरकार अर्थात् नेपालगन्ज उपमहानगरपालिकाबाट वडाले १० लाखका दरले चारवटा योजना, २ लाख र ३ लाखका अन्य दुई योजना गरी ४५ लाख रुपैयाँ प्राप्त गरेको छ ।
यसरी संघीय, प्रदेश र स्थानीय गरी वडाले कुल १५ करोड ९० लाख रुपैयाँ बराबरको बजेट ल्याउन सफल वडाध्यक्ष बर्माले बजेट कार्यान्वयनलाई समयमै पुरा गर्न अहोरात्र खटिनु परेको बताए । योजनाहरूलाई प्रभावकारी बनाउन उपभोक्ता समिति, स्थानीय संस्था, तथा प्राविधिक साझेदारहरूसँग नियमित समन्वय गर्दै जाने योजना वडाले लिएको वडाध्यक्ष बर्माको भनाइ छ ।
शनिवार गरिएको वडा भेलामा वडाले सार्वजनिक गरेको नीति तथा कार्यक्रममा भौतिक पूर्वाधार, धार्मिक पर्यटन, शिक्षा र नागरिक पूर्वाधारलाई विशेष प्राथमिकता दिइएको छ । संघीयताको भावना अनुरूप नागरिक सहभागिता, पारदर्शिता, तथा समावेशी विकासलाई कार्यान्वयनको मूलमन्त्र बनाउने वडाको प्रतिबद्धता देखिएको छ ।
वडाध्यक्ष बर्माले वडाको समग्र स्वरूप बदल्ने गरी योजनाहरू कार्यान्वयन गरिने जानकारी दिए । उनले भने, ‘बजेट ल्याउनु मात्रै होइन, गुणस्तरीय र समयमै निर्माण सम्पन्न गर्नु हाम्रो जिम्मेवारी हो ।’
वडा भेलामा देखिएको उत्साहजनक सहभागिताले पुष्टि हुन्थ्यो, वडावासीहरू पनि सडक, नाला, धार्मिक स्थल र विद्यालय वरिपरिको सुधारले जनजीवनमा प्रत्यक्ष असर पार्ने अपेक्षा गर्दै छन् ।
‘महानगरका वडामा पनि यो स्तरको जनसहभागिता देखिंदैन, योजना तर्जुमाका लागि भएको वडा भेलामा तपाईहरुको यो सहभागिताले स्थानीय सरकारको मर्मलाई उजागर गरेको छ,’ कार्यक्रममा सहभागी नेपालगन्ज उपमहानगरपालिकाका प्रमुख प्रशासकीय अधिकृत रामहरि शर्माले भने । उनले जनप्रतिनिधिका खल्तीबाट योजना बन्ने संस्कारलाई जनसहभागिताले चिर्दै जाने बताए ।
योजनाहरू सफल हुनका लागि समयमै टेन्डर, निर्माणको गुणस्तर अनुगमन, र पारदर्शितालाई प्राथमिकतामा राखेर आफुले काम गरिरहेको वडाध्यक्ष बर्माले बताए ।
नेपालगन्ज–१८ ले कायान्वयनमा ल्याएको बजेटले संघीयता कार्यान्वयनको उत्कृष्ट नमुना प्रस्तुत गर्नुका साथै पूर्वाधार विकासमा वडाको स्थानात्मक सुधार र पहिचान निर्माण गर्न महत्वपूर्ण योगदान पु¥याउने विश्वास भेलामा सहभागीहरुको थियो ।
वडा भेलामा विभिन्न राजनीतिक दलका प्रतिनिधिदेखि टोलवस्तीका प्रतिनिधिहरुले सुझावसहितका विभिन्न अपेक्षाहरु प्रस्तुत गरेका थिए । ‘यहाँ प्राप्त सुझाव र मागका आधारमा आगामी आर्थिक वर्षका लागि स्वीकृत १ करोड ३० लाखबढीको बजेटबाट समेट्न सकिने गरि योजना बनाइनेछ,’ वडाध्यक्ष बर्माले भनेका छन् । जनताका अपेक्षा निकै भएकाले प्रदेश तथा संघबाट थप बजेटका लागि कसरत गर्नुपर्ने आवश्यकतामा आफु लाग्ने उनको प्रतिबद्धता थियो ।
