माध्यमिक शिक्षा परीक्षा (एसइई) २०८२ को उत्तरपुस्तिका जाँच कार्य बाँके जिल्लामा सुरु गरिएको छ । शिक्षा विकास तथा समन्वय एकाइ बाँकेका प्रमुख धनसुदन चौलागाईँका अनुसार चैत १९ गतेदेखि जिल्लाभरका सबै परीक्षा केन्द्रमा जाँच कार्य अघि बढाइएको हो ।
परीक्षा नियन्त्रण कार्यालयको निर्देशनअनुसार छिटो, व्यवस्थित र समयमै नतिजा प्रकाशन गर्ने लक्ष्यसहित उत्तरपुस्तिका परीक्षण सुरु गरिएको चौलागाईँले जानकारी दिए । जाँच कार्यलाई निष्पक्ष, पारदर्शी र व्यवस्थित बनाउन आवश्यक सुरक्षा प्रबन्ध मिलाइएको पनि उनले बताए ।
यस वर्ष बाँकेबाट कुल ९ हजार ६१५ विद्यार्थी एसइईमा सहभागी भएका छन् । जसमध्ये ७ हजार ९१३ नियमित र १ हजार ७०२ ग्रेड वृद्धि तर्फका विद्यार्थी छन् । परीक्षामा ४ हजार ६७५ छात्रा र ४ हजार ९४० छात्र सहभागी रहेका छन् ।
विशेषतर्फ, दुई बालसुधार गृह र दुई कारागारबाट समेत ४१ जना परीक्षार्थी सहभागी भएका छन् । डुडुवा गाउँपालिका–६ स्थित जयेन्दु बालसुधार गृहबाट ३१ जना, बैजनाथ–३ नौवस्ता बालसुधार गृहबाट ३ जना, नेपालगन्ज कारागारबाट ४ जना र नौवस्ता कारागारबाट ३ जना कैदीबन्दी तथा बालबिज्याइँकर्ता परीक्षामा सहभागी भएका हुन् ।
जिल्लाभर ८ पालिकामा २७ सामुदायिक र ९ संस्थागत गरी कुल ३६ परीक्षा केन्द्र तोकिएका छन् । नेपालगन्ज उपमहानगरपालिकामा सबैभन्दा धेरै ११ केन्द्र र कोहलपुर नगरपालिकामा १० केन्द्र रहेका छन् ।
सबैभन्दा बढी परीक्षार्थी नेपालगन्जस्थित महेन्द्र माध्यमिक विद्यालय केन्द्रमा ३७५ जना सहभागी भएका छन् भने सबैभन्दा कम राप्तीसोनारी–शमसेरगञ्जस्थित शिवशक्ति मावि केन्द्रमा १६२ जना विद्यार्थी सहभागी रहेका छन् ।
यस वर्ष जिल्लाका २११ विद्यालय (१०५ सामुदायिक र १०६ संस्थागत) का विद्यार्थी एसइईमा सहभागी भएका छन् । साथै, १० सामुदायिक विद्यालयका ३२४ प्राविधिकधारका विद्यार्थी पनि परीक्षामा सहभागी रहेको जनाइएको छ ।
