मानवीय सेवा र सामाजिक रूपान्तरणमा उत्प्रेरणा
वेस्टर्न बचत तथा ऋण सहकारी संस्थाले आफ्नो १६ औँ स्थापना दिवसलाई विभिन्न सिर्जनात्मक कार्यक्रमहरु आयोजना गरि मनाइरहेको जनाएको छ।
यस अवसरमा सहकारीले मानवीय सेवा र सामाजिक उत्तरदायित्वमा आफ्नो प्रतिबद्धता दर्शाएको हो।
स्थापना दिवसको पूर्वसन्ध्यामा शनिबार जेष्ठ तथा असहाय नागरिकहरूका लागि भोजन अर्पण कार्यक्रम गरेको वेस्टर्नले आज आइतबार वृहत् रक्तदान आयोजना गरिएको छ ।
संस्थाका प्रबन्धक थानिश्वर पाण्डेयका अनुसार, शनिबार निलसागर सेवाआश्रम र मानव सेवा आश्रममा छुट्टाछुट्टै कार्यक्रम गरी जेष्ठ तथा असहाय नागरिकहरूलाई भोजन अर्पण गरिएको थियो।
यस कार्यक्रमले सहकारीलाई वित्तीय संस्था मात्र नभई सदस्य प्रति उत्तरदायी मानवीय सेवामा समर्पित एक सामाजिक संस्थाका रूपमा स्थापित गरेको छ।
संस्थाका अध्यक्ष सञ्जय थापाले सहकारीलाई सामाजिक रूपान्तरणको अभिन्न अंगका रूपमा लिँदै असहायहरूको सेवामा समर्पित हुनुपर्ने बताए।
अध्यक्ष थापाले वेस्टर्न सहकारी स्थापना दिवसका अवसरमा आइतबार एक बृहत् रक्तदान कार्यक्रमको आयोजना गरिएको जानकारी दिँदै संस्थालाई मानव हितका लागि कसरी प्रयोग गर्न सकिन्छ भन्ने दिशातर्फ पाइला चालिएको बताए।
प्रबन्धक पाण्डेयले आगामी दिनहरूमा स्वास्थ्य क्षेत्रमा सहयोगी भूमिकाका लागि योजनाहरू बनाइरहेको जानकारी दिए। कोभिड महामारी र त्यसपछिको आर्थिक मन्दीका बाबजुद पनि बाँके र बर्दियामा अब्बल सहकारीका रूपमा स्थापित वेस्टर्न बचत तथा ऋण सहकारी संस्थाले साना वित्तीय सहयोगलाई अझ प्रभावकारी ढंगले अगाडि बढाउन नयाँ योजनाहरूमा काम गरिरहेको उनको भनाइ छ।
संस्थाले आफ्ना करिब तीन हजार सेयर सदस्यहरूसँग अझ नजिकको र बलियो सम्बन्ध स्थापित गर्न स्वास्थ्य र शिक्षा क्षेत्रमा समेत काम गर्ने सोच बनाएको छ।
आर्थिक सुशासन र लगानीका क्षेत्रमा संस्थाको स्पष्टताका कारण वेस्टर्न सहकारी सेयर सदस्यहरूबीच लोकप्रिय बन्न सफल भएको प्रबन्धक पाण्डेयले बताए।
वेस्टर्न बचत तथा ऋण सहकारी संस्थाले आफ्नो १६ औँ स्थापना दिवसलाई केवल औपचारिकतामा सीमित नगरी मानवीय कार्य र सामाजिक उत्तरदायित्वको माध्यमबाट सार्थक बनाएको हो। यसखालको कार्यले सहकारीले आर्थिक उन्नतिको साथसाथै सामाजिक रूपान्तरणमा पनि महत्त्वपूर्ण भूमिका खेल्न सक्छ भन्ने सन्देश दिएको छ।
