जेनजी आन्दोलनका क्रममा ज्यान गुमाएकाहरूको सम्झनामा बुधवार नेपालगन्जमा दीप प्रज्वलन, शोकसभा तथा श्रद्धाञ्जली सभाका कार्यक्रम गरिएको छ ।
राष्ट्रिय शोक दिवस पारेर नेपालगन्जका विभिन्न ठाउँमा सहिद सम्मान र सम्झनाका कार्यक्रम गरिएका हुन् ।
त्यसक्रममा गोल्डेन एबीसी बाँके एकेडेमी हाइस्कूलले क्रिभुवन चोकमा दीप प्रज्वलन, शोकसभा तथा श्रद्धाञ्जली अर्पण गरेका छन् । सो क्रममा उनीहरूले मौनधारण समेत गरेका थिए ।
भदौ २३ र २४ गते भएको आन्दोलनको क्रममा कम्तिमा ७४ जनाको ज्यान गएको छ । ‘उहाँहरुको सम्मानमा ७४ वटा दीप प्रज्वलन गरिएको छ,’ गोल्डेन एबीसी स्कूलका संस्थापक निर्देशक विकासबहादुर सिंहले भने, ‘यसले देशका लागि सहादत दिनेको सम्मान दिने हाम्रो उद्देश्य हो ।’ विद्यालयका प्रिन्सीपल मधुसिंह खत्रीले विद्यार्थीहरुबीच सहिदबारे धारणा राखेकी थिइन् ।
त्यस्तै, जेनजी आन्दोलनमा सहादत प्राप्त गरेका वीर सहिदहरुलाई स्मरण गर्दै युवाहरुले बागेश्वरी मन्दिर पार्कमा श्रद्धाञ्जली कार्यक्रम आयोजना गरे । स्वतन्त्र युवा समूह र जेन–जी युवाहरुको सहभागितामा भएको कार्यक्रममा वक्ताहरुले सहादत प्राप्त वीर युवाहरुप्रति श्रद्धाञ्जली र सम्मान व्यक्त गर्दै आन्दोलनका मागलाई सम्बोधन गर्न राज्य जिम्मेवार हुनुपर्नेमा जोड दिए ।
उनीहरुले सहादत प्राप्त नेपालगन्जका दुई युवाको स्मरणमा शहरका चोकमा शालिक निर्माण गर्ने, आन्दोलनका क्रममा जलाइएका कार्यालय र संरचनाहरुको सरसफाइ तथा पुनःस्थापना गर्न श्रमदान गर्ने र आगामी नेतृत्व चयन गर्दा इमान्दार, जनउत्तरदायी र जेन–जीको माग सम्बोधन गर्न सक्ने व्यक्तित्वलाई अघि बढाउनुपर्ने धारणा राखेका थिए ।
