साझेदार थप्दै नेपालगन्ज कनक्लेभ
धारा नेपालगन्ज म्याराथनको आगामी एघारौं संस्करणको तयारीमा आयोजकको दौडधुप चलिरहँदा नेपालगन्ज कनक्लेभको यो संस्करणमा ‘फाइनप्रिन्ट फिभर’ पनि सँगै हुने भएको छ ।
आउँदो ५ मंसिरमा आयोजना हुने नेपालगन्ज डिस्कोर्षको पाँचौं श्रृंखला, नेपालगन्ज कनक्लेभमा पुस्तक र साहित्य सम्बन्धि सेसनहरु फाइनप्रिन्ट फिभरमार्फत हुने नेपालगन्ज कनक्लेभका निर्देशक जनक नेपालले बताए । उनका अनुसार, यसपटक अर्थ, सामाजिक र राजनीति सेसनहरुसँगै सिनेमा संवाद कनक्लेभका नियमित सेसनकै रुपमा संचालन हुनेछन् । कनक्लेभमा बरिष्ठ अभिनेता राजेश हमालसँग पत्रकार पवन आचार्यले संवाद गर्नेछन् । हमालको यसबर्ष ‘युगदेखि युगसम्म’ पुस्तक प्रकाशित छ ।
त्यस्तै, जेनजी विद्रोहपछिको नेपाल ः अन्यौल र अवसर, नेपालगन्ज ः आर्थिक राजधानीको नारा र सम्भावना, डिजिटल युगको दोधार ः प्रविधि वरदान कि अभिशाप लगायतका सेसनहरु तय भएको निर्देशक नेपालले बताए ।
कनक्लेभको अघिल्लो दिन ४ मंसिरमा पनि खेलकुद र खेल डकुमेन्ट्रीसहित सदभावको सहरबारे बहस हुने तयारी छ । मंसिर ६ गते शनिवार ११ औं धारा नेपालगन्ज म्याराथन हुनेछ । त्यस्तै, फाइनप्रिन्ट फिभरमा स्वस्पर्श कृतिका लेखक डा. नवराज केसी, चमेलीको फूल बैजनी रुमाल कृतिका लेखक सुबिन भट्टराई र ज्ञानिका कृतिका लेखक ददि सापकोटा सहभागी हुँदैछन् ।
फाइनप्रिन्ट फिभर नारायणगढबाट सुरु भएर पोखरामा सम्पन्न भइसकेको छ । आज शनिवार सुर्खेतमा हुँदैछ । यसपछि नेपालगन्ज कनक्लेभसँगै फिभर हुन लागेको हो । अरु सहरमा पनि फिभर आयोजना गर्ने आयोजकको योजना छ । यसअघि फाइनप्रिन्ट फिभर २०७५ बैशाखमा धनगढी, नेपालगन्ज र सुर्खेतमा आयोजना गरिएको थियो । त्यसपछि पोखरामा २०७७ सालमा गरिएको फाइनप्रिन्ट फिभर त्यसपछि २०७७ सालमा नवलपुरको हर्कपुरस्थित उन्नति कल्चरल भिलेजमा आयोजना गरिएको थियो ।
