पश्चिम नेपाल क्षेत्रकै सबैभन्दा पुरानो ज्ञान–मठका रूपमा परिचित नेपालगन्जस्थित, महेन्द्र पुस्तकालयले आफ्नो ८०औँ वार्षिक साधारणसभा तथा १८औँ अधिवेशन शुक्रवार आयोजना गरिएको छ ।
साधारणसभा उद्घाटन कार्यक्रममा वक्ताहरूले पुस्तकालय केवल किताब राख्ने कोठा नभई समाजको चेतना, संस्कृति र पहिचान जोगाइराख्ने जीवित संस्था भएको उल्लेख गर्दै यसको सम्वद्र्धनका लागि सामूहिक जिम्मेवारी आवश्यक रहेको बताएका छन् ।
कार्यक्रमका प्रमुख अतिथि, लुम्बिनी प्रदेशका सामाजिक विकास मन्त्री आदेशकुमार अग्रवालले महेन्द्र पुस्तकालय केवल नेपालगन्जको मात्र नभएर पश्चिम नेपालको सांस्कृतिक धरोहर भएकाले सबैले मिलेर जोगाउनै पर्ने दायित्व सम्झाए ।’
चालु वर्षमा पुस्तकालयका लागि छुट्याइएको रकम त्रुटिवश अन्य शीर्षकमा स्थानान्तरण भएको स्वीकार गर्दै, ‘यो गल्ती सुधारिन्छ । आगामी वर्षदेखि पुस्तकालयलाई निरन्तर बजेट सुनिश्चित हुन्छ,’ भन्ने प्रतिवद्धता व्यक्त गरे ।
नेपालगन्ज उपमहानगरपालिकाका नगर प्रमुख प्रशान्त बिष्टले नगरपालिका पुस्तकालयलाई नियमित सहयोग गर्दै आएको र यसलाई शहरी संस्कृति तथा शिक्षाको मूल आधार मान्दै आगामी दिनमा पनि निरन्तरता दिने स्पष्ट गरे ।
कार्यक्रममा पुस्तकालयका सल्लाहकार नरेन्द्रजंग पिटर, नेपाल प्रज्ञा–प्रतिष्ठानका प्राज्ञसभा सदस्य महानन्द ढकाल, पुस्तकालयका आजीवन सदस्यसमेत रहेका वरिष्ठ पत्रकार झलक गैरे, लगायतका वक्ताहरूले पुस्तकालयलाई पढ्ने संस्कार अभिवृद्धि गर्ने आधारभूत संरचना भन्दै त्यसको सुधार र विस्तारका लागि ठोस पहल आवश्यक रहेको धारणा राखे ।
विद्यालयदेखि विश्वविद्यालयसम्मका विद्यार्थी, साहित्यकार, शोधकर्ता तथा स्थानीय बासिन्दाले दैनिक पुग्ने महेन्द्र पुस्तकालय आज पनि पढाइ, विचार र संस्कृतिको जीवित थलोका रूपमा उभिएको छ ।
कार्यक्रमले पुस्तकालयलाई आर्थिक, भौतिक तथा संस्थागत रूपमा सुदृढ बनाउन सबै तहका सरकार र समुदाय एकैसाथ लाग्नुपर्ने सन्देश दिन सफल भएको आयोजकले जनाएको छ ।
उपस्थितलाई सम्बोधन गर्दै पुस्तकालयका अध्यक्ष बलराम यादवले भने, ‘एक समय खण्डहर झैँ देखिन थालेको यो पुस्तकालयलाई हामीले फेरि धुलो टकटक्याएर जीवन्त बनायौँ ।’ उनले सञ्चालन खर्चको स्थायी समाधान अब अत्यावश्यक भइसकेको बताए । अध्यक्ष यादवले प्रदेश तथा संघीय सरकार दुवैलाई पुस्तकालयका आवश्यकता बुझेर नियमित बजेट व्यवस्था गर्न आग्रह गरे ।
पुस्तकालयमा यादवको पुनः नेतृत्व
महेन्द्र पुस्तकालयको नयाँ कार्यसमितिमा बलराम यादव पुनः निर्बिरोध निर्वाचित भएका छन् । शुक्रवार भएको पुस्तकालयको १८ औँ अधिवेशनबाट यादव पुनः अध्यक्ष चयन भएका हुन् ।
निर्वाचन समितिका अनुसार, नवनिर्वाचित कार्यसमितिमा उपाध्यक्षमा पंकज श्रेष्ठ र कोषाध्यक्ष अजयकुमार टण्डन पनि पुनः निर्विरोध भए । सचिवमा सतिश निरौला पनि निर्विरोध निर्वाचित भएका छन् । यसअघि सचिवको जिम्मेवारीमा खजुराका मणिदेव अर्याल थिए ।
कार्यसमितिको सहसचिवका लागि दुई जनाको र ४ जना खुला सदस्य पदका लागि ६ जनाको उम्मेदवारी परेपछि शनिबार निर्वाचन मतदानबाट टुंगो लगाइने निर्वाचन समितिले जनाएको छ । महिला सदस्यमा भने पुष्पा सुवेदी र चन्द्रावति अधिकारी पनि निर्विरोध निर्वाचित भए ।
सहसचिवमा ललिता उपाध्याय र मो. असफाक जसगढको उम्मेदवारी परेको छ । यसैगरी ४ जना सदस्यका लागि विष्णुप्रसाद सुवेदी, मो. आरिफ अन्सारी, जमिल अहमद सिद्धिकी, श्यामविहारी गुप्ता, सुनिल भण्डारी र सुशिलकुमार चौधरीको उम्मेदवारी परेको निर्वाचन समितिले भनेको छ ।
पुनः अध्यक्ष निर्वाचित भएपछि यादवले अब पुस्तकालयलाई इ पुस्तकालयमा स्तरोन्नति गर्ने, बाल पुस्तकालय कक्ष व्यवस्थापन गर्ने र पाठकमैत्री वातावरण निर्माण गर्ने मुख्य योजना रहेको बताए ।
