रत्न राजमार्ग आसपासमा अतिक्रमण गरी बनाइएका घर, टहरा नेपालगन्ज उपमहानगरपालिकाले आजदेखि हटाउन सुरु गरेको छ ।
उपमहानगरले बिपीचोकबाट धम्बोझी चोकसम्म राजमार्ग नालादेखि सात फुट भित्रसम्मका संरचना हटाउन थालेको हो ।
नेपालगन्ज उपमहानगरपालिकाका प्रमुख प्रशान्त विष्टले त्यस क्षेत्रमा अपाङ्गमैत्री संरचना निर्माणका लागि ठेक्का सम्झौता भइसकेकाले अतिक्रमण हटाउन सुरु गरिएको जानकारी दिए । उनले हरियाली प्रवद्र्धन गर्न रुख बिरुवासमेत रोपिने उल्लेख गर्दै डेढवर्षमा गणेशमान चोकदेखि बिपीचोक र धम्बोझी चोकदेखि पुप्पलाल चोकसम्म पूर्वाधार निर्माण गरिने बताए ।
रु ४९ लाख ५० हजारमा सो ठेक्का लगाइएकाले हाल बिपीचोकदेखि धम्बोझी चोकसम्म अतिक्रमण हटाइने उनको भनाइ छ । उपमहानगरले यसअघि सार्वजनिक सूचना जारी गर्दै अतिक्रमण गरेका जग्गा खाली गर्न आग्रह गरेको थियो ।
