बाँकेको राप्ती तटमा बैकुण्ठधाम सिधनियाघाट निर्माणका लागि सम्बन्धित निकायबीच विहिवार गहन छलफल गर्दै महत्वपूर्ण निर्णयहरू गरिएको छ ।
बैकुण्ठधाम सिधनियाघाट समितिका अध्यक्ष डा. सुरेश कुमार कानोडयाको अध्यक्षतामा भएको कार्यसमितिको बैठकले परियोजनालाई अगाडि बढाउने स्पष्ट खाका तय गरेको हो । ‘यो बैठकले सरोकारवालाहरुसँग समन्वय गरि निर्माण कार्यलाई अर्काे चरणमा अगाडी बढाउने गरि निर्णय लिएका छ,’ संस्थाका सचिव श्रीराम सिग्देलले दैनिक नेपालगन्जसँग भने ।
सचिव सिग्देलका अनुसार, बैठकमा सिधनियाघाट निर्माण परियोजनाको डिपिआर (विस्तृत परियोजना प्रतिवेदन) तयारी, बजेट व्यवस्थापन र निर्माण प्रक्रियालाई तीव्रता दिने विषयमा विस्तृत छलफल भएको थियो । छलफलपछि सिधनियाघाट निर्माणका लागि आवश्यक डिपिआर तयार गर्न नेपालगन्ज उपमहानगरपालिकाको कार्यालयमार्फत लागत बजेट माग गर्ने निर्णय गरिएको छ । ‘त्यसका लागि नगर प्रमुखको प्रतिबद्धता घोषणा भएकाले कार्यान्वयनमा अगाडी बढ्न लागिएको हो,’ सचिव सिग्देलले भने ।
त्यसैगरी राप्ती नदीमा निर्माण गरिने बैकुण्ठधाम सिधनियाघाटको कामलाई द्रुत गतिमा अघि बढाउन विभिन्न सरोकारवाला सरकारी कार्यालयहरूसँग समन्वय र सहकार्य गर्ने निर्णय पनि बैठकले गरेको छ । ‘निर्माण प्रक्रिया ढिलाइ नहोस् भन्ने उद्देश्यका साथ सम्बन्धित निकायबीच निरन्तर समन्वय कायम राख्ने प्रतिबद्धता व्यक्त गरिएको छ,’ बैठकको निर्णयबारे दैनिक नेपालगन्जको जिज्ञासामा सचिव सिग्देलले भने ।
बैठकमा सहरी विकास मन्त्रालयअन्तर्गत विनियोजित बजेटसम्बन्धी विषयमा पनि गहन छलफल भएको सचिव सिग्देलले बताए । उनका अनुसार, चालू आर्थिक वर्षमा सहरी विकास मन्त्रालयमार्फत विनियोजित ३ करोड रुपैयाँ बजेट पहिलो चरणको निर्माण कार्यका लागि प्रक्रिया अघि बढिसकेको जानकारी गराइएको छ । ‘दोस्रो चरणको निर्माणका लागि समेत आवश्यक पहल गर्ने निर्णय बैठकले गरेको छ,’ सचिव सिग्देलले सरकारी प्रक्रियाकै कारण काममा ढिलाई भएको टिप्पणी गर्दै भने ।
सिधनियाघाट निर्माणलाई धार्मिक, सांस्कृतिक तथा सामाजिक दृष्टिले महत्वपूर्ण परियोजनाका रूपमा लिइएको बैठकका सहभागीहरूले बताएका छन् । परियोजना सम्पन्न भएपछि बाँके जिल्लासहित आसपासका क्षेत्रका नागरिकलाई अन्त्येष्टि तथा धार्मिक कर्मकाण्डका लागि व्यवस्थित, सुरक्षित र सम्मानजनक स्थल उपलब्ध हुने विश्वास व्यक्त गरिएको छ । त्यसका लागि गरिएको महायज्ञमा दशौं हजार श्रद्धालुहरुले सहभागिता जनाएर आवश्यकतालाई अनुमोदनमात्रै गरेनन्, लाखौं दान सहयोग गरेका थिए ।
बैठकमा अध्यक्ष डा. सुरेश कुमार कानोडयासहित कार्यसमितिका पदाधिकारी तथा सदस्यहरू, सहरी विकास मन्त्रालय, स्थानीय पूर्वाधार विभाग, आयोजना कार्यालय तथा निर्माण व्यवसायीका प्रतिनिधिहरूको उपस्थिति रहेको थियो । शहरी विकास मन्त्रालयका सचिव गोपाल सिग्देल, स्थानीय पूर्वाधार विभागका महानिर्देशक महेश चन्द्र न्यौपाने, स्थानीय पूर्वाधार विभागका सहसचिव शंकर बुढाथोकी, सघन शहरी तथा भवन निर्माण आयोजना बाँकेका आयोजना प्रमुख राजु न्यौपाने, इन्जिनियर विजय केशर खनाललगायतका अधिकारी बैठकमा उपस्थित थिए ।
कार्यक्रमको अन्त्यमा अध्यक्ष कानोडियाले सबै सरोकारवाला निकायको सहकार्य र समन्वयबाट बैकुण्ठधाम सिधनियाघाट निर्माण कार्यलाई सफलतापूर्वक सम्पन्न गरिने विश्वास व्यक्त गर्दै बैठकमा भएका निर्णयहरू कार्यान्वयनमा लैजान आफूहरू प्रतिबद्ध रहेको बताए ।