होटेल–रेष्टुरेन्ट आपूर्तिमा नयाँ आयाम हुने सञ्चालकको दावी
नेपालगन्जमा ‘सफल मार्ट’ सञ्चालनमा ल्याइएको छ । २ करोड ५० लाख रुपैयाँको लगानीमा सञ्चालनमा ल्याइएको सफल मार्ट लुम्बिनीका आन्तरिक मामिला तथा कानुन मन्त्री आदेशकुमार अग्रवालले विहीवार उद्घाटन गरे ।
होटेल तथा रेष्टुरेन्ट व्यवसायलाई आवश्यक पर्ने खाद्यान्नदेखि घरायसी प्रयोजनका सम्पूर्ण सामग्री एकै ठाउँबाट सहज रूपमा उपलब्ध गराउने उद्देश्यसहित देशका विभिन्न सहरमा सञ्चालित सफल मार्टले नेपालगन्जमा आफ्नो छैठौँ शाखा सञ्चालनमा ल्याएको हो ।
मार्ट उद्घाटन गर्दै मन्त्री अग्रवालले कालोबजारी रोक्न सके नेपालगन्जको आर्थिक गतिविधिले उचाई लिने बताए । ‘त्यसका लागि प्रदेश सरकारले आवश्यक समन्वय गरिरहेको छ,’ प्रहरी प्रशासनसँगका विभिन्न समस्यामा चर्चा गर्दै मन्त्री अग्रवालले भने ।
विहीवार देखि औपचारिक सुरु भएको सफल मार्टमा खाद्य सामग्रीका साथै होटेल, रेष्टुरेन्ट तथा घरायसी प्रयोजनमा प्रयोग हुने करिब १७ हजार प्रकारका सामग्री उपलब्ध गराइएको सफल मार्ट प्रालिका अध्यक्ष लक्ष्मण भण्डारीले जानकारी दिए । ‘यसले नेपालगन्जको सुपर मार्कटलाई प्रतिष्पर्धीमात्रै बनाउँदैन, घरघरै पुगेर सेवा प्रवाह गरेर ग्राहक सेवालाई प्राथमिकतामा राख्छ,’ अध्यक्ष भण्डारीले दैनिक नेपालगन्जसँग भने ।
सम्बद्ध व्यवसायीका अनुसार, नेपालगन्जमा हालसम्म होटेल तथा रेष्टुरेन्ट व्यवसायीहरू आवश्यक सामग्री किन्न दर्जनौँ पसल धाउनुपर्ने, मूल्यमा बार्गेनिङ गर्नुपर्ने तथा कतिपय अवस्थामा भ्याट बिलसमेत नपाउने समस्यामा रहेका थिए । ‘सफल मार्टको अवधारणाले यी सबै झन्झट अन्त्य गर्दै एकै स्थानबाट सुपथ मूल्यमा, भ्याट बिलसहित तथा होम डेलिभरी सुविधा उपलब्ध गराउने विश्वास लिइएको छ,’ होटल व्यवसायी संघ बाँके नेपालगन्जका अध्यक्ष भीमलाल कंडेलले भने ।
तीन दशकभन्दा बढी समयदेखि खाद्यान्न व्यवसायमा सक्रिय गुल्मीका ५० वर्षीय उद्यमी लक्ष्मण भण्डारीको नेतृत्वमा सफल मार्ट सञ्चालन हुँदै आएको हो । करिब डेढ दशकसम्म खाद्यान्न होलसेल कारोबार गरेका भण्डारीले २०७० सालमा काठमाडौंको शंखमूलबाट मार्ट व्यवसाय सुरु गरेका थिए ।
सुरुका वर्षमा ‘लुम्बिनी मार्ट’का रूपमा शंखमूल, पेप्सीकोला र कोटेश्वरमा सञ्चालन हुँदै आएको व्यवसायलाई थप लगानी र साझेदारीसहित गत वर्षदेखि ‘सफल मार्ट’ ब्रान्डका रूपमा तीव्र विस्तार गरिएको हो ।
अध्यक्ष भण्डारीका अनुसार, पछिल्ला ६ महिनाभित्र चितवनको संगम रोड, बुटवलको कालिका नगर र नेपालगन्जको सुर्खेत रोडमा गरी तीन नयाँ शाखा विस्तार गरिएका छन् । हालसम्म देशभर सञ्चालनमा रहेका ६ वटा मार्टमा करिब १५ करोड रुपैयाँ लगानी भइसकेको छ भने ८५ जनाले प्रत्यक्ष रोजगारी पाएका छन् ।
देशका प्रमुख सहरहरूमा सफल मार्ट विस्तार गर्ने दीर्घकालीन लक्ष्यसहित अन्य सम्भावित सहरहरूमा पनि शाखा विस्तारका लागि अध्ययन भइरहेको अध्यक्ष भण्डारीले बताए ।
