स्वादको सहर नेपालगन्जमा शुरु भयो सिद्धार्थ मःमः उत्सवको चौथो संस्करण
सन्ध्या गैरे
स्वादको सहर नेपालगन्जमा सिद्धार्थ कटेज आयोजना गर्दै आएको ‘मःमः फेस्टिवल’ को चौथो संस्करण सुरु भएको छ । स्वाद, संगीत र संस्कृतिको संगम बनेको फेस्टिवलको शनिवार नेपालगन्ज उपमहानगरपालिकाका मेयर प्रशान्त विष्टले उद्घाटन गरेका छन् ।
अंग्रेजी नयाँ वर्ष २०२६ को अवसरमा यो आयोजना गरिएको हो । ‘आगामी वर्षदेखि यसलाई नेपालगन्जको साझा आयोजनाका रुपमा अगाडी बढाउने हाम्रो उद्देश्य छ,’ सिद्धार्थ विजनेश ग्रुप अफ हस्पिटालिटीका पश्चिम क्षेत्रीय कार्यकारी प्रमुख केशव न्यौपानेले दैनिक नेपालगन्जसँग भने । उनले यो आयोजना नाफामुखी नभइ स्वादको सहर नेपालगन्जलाई देशभर ब्राण्डिङको उद्देश्य पनि राखिएको बताए ।
सन् २०८० सालदेखि निरन्तर रूपमा आयोजना हुँदै आएको मःमः फेस्टिवल यसपटक अझ भव्य र फराकिलो बनेको आयोजकको दाबी छ । तीन दिनसम्म सञ्चालन हुने फेस्टिवलमा दुई सयभन्दा बढी प्रकारका मःमः सहभागी गराइएको सिद्धार्थ ग्रुपका हेड अफ सेफ एलबी कौशलले जानकारी दिए । स्थानीय स्वादसँगै नयाँ–नयाँ फ्लेभरका मःमःले फेस्टिवललाई विशेष बनाएको उनले बताए । ‘यो आयोजना साँच्चिकै स्वाद र संगीतको उत्सव हो,’ उनी भन्छन् ।
फेस्टिवलको पहिलो दिन शनिवार स्वादिष्ट मम पस्किनुका साथै स्थानीय कलाकार तथा ब्याण्डहरूको सांस्कृतिक प्रस्तुति गरिएको छ । दोस्रो दिन आइतवार आज चर्चित गायक खुमन अधिकारी, इब्सल सञ्ज्याललगायत कलाकार तथा ब्याण्डहरूको विशेष प्रस्तुति रहने बताइएको छ ।
सिद्धार्थ विजनेश ग्रुप अफ हस्पिटालिटीका पश्चिम क्षेत्रीय कार्यकारी प्रमुख केशव न्यौपानेका अनुसार, दोस्रो दिन नै सांस्कृतिक कार्यक्रमसँगै मःमः मेकिङ एण्ड कुकिङ प्रतियोगिता पनि आयोजना गरिंदैछ ।
फेस्टिवलको अन्तिम दिन भोलि सोमवार, राष्ट्रिय तथा स्थानीय ब्याण्डहरूको प्रस्तुति रहनेछ भने तीनै दिन राष्ट्रिय तथा स्थानीय कलाकारहरूको नृत्य प्रस्तुति निरन्तर रूपमा प्रस्तुत गरिने आयोजकले जनाएको छ ।
नेपालगन्ज शहरको मुटुमा अवस्थित सिद्धार्थ कटेज पर्याप्त स्पेस, स्वादिलो परिकार र सांगीतिक माहोलका कारण लोकप्रिय रेष्टुरेन्टका रूपमा परिचित छ । सिद्धार्थ ग्रुपअन्तर्गत नेपालगन्जको चारतारे लक्जरी होटल सिद्धार्थसहित देशभर ३३ वटा होटल, रिसोर्ट, रेष्टुरेन्ट तथा क्याफे सञ्चालनमा रहेका छन् ।
स्वादको सहर नेपालगन्जमा शनिवारदेखि सुरु भएको मःमः फेस्टिवलले खाद्य पर्यटनलाई थप उचाइ दिने अपेक्षा गरिएको सहभागीहरुले प्रतिक्रिया दिए । स्वाद र संगीतमा रमाएका उनीहरुले आयोजनाको खुलेर प्रशंसा गरे ।
