नेपालगन्जदेखि बर्दियाको प्रसिद्ध पर्यटकीय गन्तव्य ठाकुरद्वारासम्म सञ्चालन हुने ‘टुर दि ठाकुरद्वारा’ साइकलयात्राले पश्चिम नेपालको पर्यापर्यटन, धार्मिक पर्यटन र साहसिक यात्रालाई नयाँ उचाइमा लैजाने अपेक्षा गरिएको छ ।
यस वर्ष फागुन ७ देखि ९ गतेसम्म सञ्चालन हुने साइकलयात्रा नेपालगन्जको बागेश्वरी मन्दिरबाट सुरु भई बाँके र बर्दियाका विभिन्न धार्मिक, सांस्कृतिक तथा प्राकृतिक पर्यटकीय स्थलको परिक्रमासहित करिब एक सय किलोमिटर दूरी तय गर्दै ठाकुरद्वारासम्म पुग्ने छ ।
‘यात्रा अवधिभर सहभागीहरूले स्थानीय संस्कृति, प्राकृतिक सौन्दर्य र जैविक विविधताको प्रत्यक्ष अनुभव गर्नेछन्,’ टुर डे ठाकुरद्वाराका संयोजक प्रदिप सापकोटाले कार्यक्रमबारे दैनिक नेपालगन्जसँग भने ।
साइकल उत्सवका रुपमा मनाइने यो मा नेपाल र तेस्रो मुलकबाट करिव ३ सय जना साईक्लिष्टहरूको सहभागिता रहने आयोजकले जनाएको छ ।
यात्राको तयारीस्वरूप आयोजक नेपालगन्ज साइक्लिङ्ग क्लवले आइतबारदेखि नेपालगन्जमा औपचारिक सचिवालय स्थापना गरेको छ ।
सचिवालय उद्घाटन कार्यक्रममा नेपालगन्ज उपमहानगरपालिकाका प्रमुख प्रशान्त विष्टले साइकल पर्यटन वातावरणमैत्री, स्वास्थ्यप्रवद्र्धक र दिगो पर्यटनको महत्वपूर्ण माध्यम भएको उल्लेख गर्दै यस्ता गतिविधिमा उपमहानगरपालिकाको निरन्तर सहकार्य रहने प्रतिबद्धता व्यक्त गरे । नगर प्रमुख विष्टले स्थानीय पर्यटकीय गन्तव्यको पहिचान र प्रचारमा साइकलयात्राले सकारात्मक भूमिका खेल्ने विश्वास व्यक्त गरे ।
नेपालगन्ज साइक्लिङ क्लबका अध्यक्ष कविराम बुढाथोकीले विगत केही वर्षदेखि निरन्तर रूपमा सञ्चालन हुँदै आएको यो साइकलयात्राले बाँके र बर्दियाका धार्मिक तथा पर्यटकीय स्थलहरूको राष्ट्रिय र अन्तर्राष्ट्रिय स्तरमा प्रचार–प्रसारमा योगदान पु¥याउँदै आएको बताए ।
साइकलयात्रामा नेपालगन्जसहित आसपासका क्षेत्रका साथै भारतबाट समेत साइकलयात्रीहरूको सहभागिता रहने नेपालगन्ज साइक्लिङ्ग क्लवका सचिव बिजयेन्द्र जिसीले जानकारी दिए ।
‘टुर दि ठाकुरद्वारा’ साइकलयात्रा केवल खेलकुद कार्यक्रम मात्र नभई प्रकृति, संस्कृति र साहसिक पर्यटनलाई एउटै सूत्रमा बाँध्ने विशिष्ट पर्यटन अभियानका रूपमा विकसित हुँदै गएको सरोकारवालाहरूको विश्वास छ ।
‘यसले सीमावर्ती पर्यटन प्रवद्र्धनसँगै क्षेत्रीय पर्यटन सहकार्यलाई समेत मजबुत बनाउनेछ,’ क्लबका पूर्व अध्यक्ष सतिश निरौलाले भने ।