दशौँ लुम्बिनी प्रदेशस्तरीय प्रदर्शनीको अवसरमा शुक्रबार वस्तुको गुणस्तर निर्धारणसम्बन्धी अन्तरसंवाद गरिएको छ ।
महिला उद्यमी संघ नेपाल, बाँकेले आयोजना गरेको प्रदर्शनीका क्रममा आयोजित संवादमा महिला उद्यमीहरूका लागि वस्तुको गुणस्तर, ब्रान्डिङ र बजार प्रवद्र्धनका विषयमा व्यावहारिक छलफल गरिएको हो ।
अन्तरसंवाद कार्यक्रममा केएल दुगड ग्रुपका महाप्रबन्धक प्रदीप छाजेड र खाद्य प्रविधि तथा गुण नियन्त्रण कार्यालय नेपालगन्ज, बाँकेका प्रमुख प्रशान्त पोखरेलले महिला उद्यमीहरूका जिज्ञासा सम्बोधन गर्दै आफ्ना अनुभव प्रस्तुत गरेका हुन् ।
केएल दुगड ग्रुपका महाप्रबन्धक छाजेडले उत्पादित वस्तु तथा सामग्रीलाई सफल बनाउन ब्रान्डिङको भूमिका अत्यन्त महत्वपूर्ण हुने बताए । उद्योगपति छाजेडले केएल दुगड ग्रुपले अपनाउँदै आएको ब्रान्डिङ रणनीतिबारे जानकारी दिँदै साना उद्यमी तथा व्यवसायी महिला दिदीबहिनीहरूले कसरी आफ्ना उत्पादनलाई प्रभावकारी रूपमा ब्रान्डिङ गर्न सकिन्छ भन्ने विषयमा सुझाव दिएका थिए ।
खाद्य प्रविधि तथा गुण नियन्त्रण कार्यालय नेपालगन्जका प्रमुख पोखरेलले आफ्नो कार्यालयले गरिरहेको कामबारे जानकारी दिँदै वस्तुको गुणस्तर परीक्षण गर्ने सामान्य तरिका, उद्यमीहरूले उत्पादन गरेका वस्तु तथा सामग्रीको गुणस्तर व्यवस्थापन गर्ने उपाय र गुणस्तर मापदण्ड पालना नगर्दा लाग्ने कारबाहीबारे स्पष्ट पारे । उनले गुणस्तर मापदण्ड व्यवस्थापनमा महिला उद्यमीहरूले विशेष ध्यान दिनुपर्ने पक्षहरूबारे पनि अनुभव सुनाएका थिए ।
महिला उद्यमी संघ नेपाल, बाँकेकी अध्यक्ष रेवती सिंहको अध्यक्षतामा भएको अन्तरसंवाद कार्यक्रमको सहजीकरण महिला उद्यमी संघ नेपाल, बाँके कार्यसमिति सदस्य रिचा लुइँटेलले गरिन् । ‘यसखालको आयोजनाले महिला उद्यमीलाई धेरै कुराको ज्ञान उपलब्ध गराउँछ भन्ने विश्वास हो,’ अन्तरसंवादबारे संघकी निवर्तमान अध्यक्ष साबित्रा पोखरेल बस्नेतले भनिन् ।
कार्यक्रममा नेपाल महिला उद्यमी महासंघकी केन्द्रीय सदस्यसमेत रहेकी लुम्बिनी प्रदेश अध्यक्ष सरस्वती शर्मा, पूर्व अध्यक्षहरू, प्रदर्शनी संयोजक तथा संघकी प्रथम उपाध्यक्ष आभा गौतमलगायत महिला उद्यमी, पत्रकारको सहभागिता थियो ।
महिला उद्यमी संघ नेपाल, बाँकेले हरेक वर्ष लुम्बिनी प्रदेशस्तरीय प्रदर्शनी आयोजना गर्दै आएको छ । यस वर्षको १०औँ लुम्बिनी प्रदेशस्तरीय प्रदर्शनी माघ १४ देखि १८ गतेसम्म नेपालगन्जस्थित बागेश्वरी मन्दिर परिसरमा सञ्चालन भइरहेको छ ।
संघकी महासचिव विन्दु चर्तिमगरका अनुसार, प्रदर्शनीमा लुम्बिनी र कर्णाली प्रदेशका महिला उद्यमीहरूले उत्पादन गरेका वस्तुहरूको बिक्री तथा प्रवद्र्धनका लागि ७५ वटा स्टल राखिएका छन् ।
नेपालगन्ज उपमहानगरपालिकाको आर्थिक सहयोग र केएल दुगड ग्रुपको मुख्य प्रायोजनामा सञ्चालन भइरहेको प्रदर्शनीले महिला उद्यमीका उत्पादनको बजारीकरणमा महत्वपूर्ण योगदान पु¥याइरहेको महासचिव चर्तिमगरले बताइन् ।
