रजत महोत्सवसँगै अभिभावक दिवस
विभिन्न कार्यक्रमसहित तीन दिनदेखि रजतोत्सव आयोजना गरिरहेको बाँकेको कोहलपुरस्थित गोरखा युनाइटेड पब्लिक स्कुलले शुक्रवार अभिभावक दिवस भव्य रुपले मनाएको छ ।
आफ्नो स्थापनाको २५ वर्ष पूरा गरेको उपलक्ष्यमा आयोजना गरेको २५औँ रजत महोत्सवको पहिलो दिन खेलउत्सव गरेको गोरखाले दोस्रो दिन शुक्रवार विभिन्न सिर्जनात्मक कार्यक्रमसहित अभिभावक दिवस मनाएको हो ।
विद्यालय प्राङ्गणमा आयोजित अभिभाकवक दिवसमा शिक्षा क्षेत्रका विशिष्ट व्यक्तित्व, स्थानीय जनप्रतिनिधि, अभिभावक, पूर्वविद्यार्थी तथा वर्तमान विद्यार्थीहरूको उल्लेखनीय सहभागिता रहेको थियो ।
रजत महोत्सवको औपचारिक उद्घाटन गर्दै प्रमुख अतिथि प्रा. डा. गोविन्दप्रसाद ढकालले विद्यालयले विगत दुई दशकभन्दा बढी समयदेखि गुणस्तरीय, व्यवहारिक र जीवनोपयोगी शिक्षा प्रदान गर्दै समाजमा महत्वपूर्ण योगदान पु¥याउँदै आएको उल्लेख गरे । शिक्षा क्षेत्रमा गोरखा युनाइटेड पब्लिक स्कुलले स्थापना गरेको विश्वास र पहिचान प्रशंसनीय रहेको उनको भनाइ थियो ।
समारोहको अध्यक्षता गरिरहेका विद्यालय व्यवस्थापन समितिका अध्यक्ष केशरबहादुर आलेले रजत जयन्ती विद्यालयका लागि गर्वको क्षण भएको बताए । शिक्षक, कर्मचारी, अभिभावक र विद्यार्थीहरूको निरन्तर सहयोगकै कारण विद्यालय आजको उचाइमा आइपुगेको उनको भनाइ थियो ।
‘गुणस्तरीय शिक्षा, अनुशासन र नैतिक मूल्यलाई प्राथमिकतामा राख्दै आगामी दिनमा विद्यालयलाई अझ उत्कृष्ट र व्यवहारिक शिक्षाको केन्द्रका रूपमा विकास गर्ने’ प्रतिबद्धता अध्यक्ष आलेको थियो ।
रजत उत्सवका क्रममा आयोजित अभिभावक दिवसलाई सम्बोधन गर्दै विद्यालयकी प्रधानाध्यापक साधना थापाले विद्यालयको २५ वर्षे गौरवपूर्ण यात्राको स्मरण गरिन् । उनले आगामी दिनमा विद्यालयलाई प्रविधिमैत्री, नवप्रवर्तनमुखी र अन्तर्राष्ट्रिय स्तरको शिक्षाको केन्द्रका रूपमा विकास गर्ने लक्ष्य रहेको बताइन् । अभिभावकहरूको सहयोग र विद्यार्थीहरूको सिर्जनात्मक क्षमताले विद्यालयको चौतर्फी विकास सम्भव भएको उल्लेख गर्दै उनले विद्यालयका उपलब्धी चर्चा गरिन् ।
रजत महोत्सवको अवसरमा विद्यालयले विद्यार्थीहरुको उत्कृष्ट कला, सिर्जनाहरुको शैक्षिक प्रदर्शनीको आयोजना गरिएको थियो । कार्यक्रमम विद्यार्थीहरूले विभिन्न जातजातिका सांस्कृतिक नृत्य, साङ्गीतिक कार्यक्रम तथा कक्षागत सिर्जनात्मक प्रस्तुतिहरू पनि प्रदर्शन गरे । आयोजनाले दर्शकका रुपमा रहेका अभिभावकहरूले आफ्नो मन जितेको प्रतिक्रिया दिएका छन् ।
त्यसैगरी उत्कृष्ट नतिजा हासिल गर्ने विद्यार्थी तथा अभिभावकहरूलाई सम्मान तथा पुरस्कार वितरण गरिएको थियो । अभिभावकहरूबीच आयोजना गरिएको मैत्रीपूर्ण खेलकुद प्रतियोगितामा विजयी समूहलाई समेत पुरस्कृत गरिएको थियो ।
त्यस्तै, रजत महोत्सवलाई सामाजिक उत्तरदायित्वसँग जोड्दै विद्यालयका पूर्वविद्यार्थी समाजको आयोजनामा निःशुल्क स्वास्थ्य शिविर तथा रक्तदान कार्यक्रम समेत सञ्चालन गरिएको थियो ।
रजतोत्सवकै क्रममा आज शनिवार विशेष समारोहको आयोजना गरिने विद्यालयका प्रशासन प्रवन्धक कर्णबहादुर बस्नेतले जानकारी दिए ।
