बर्दियाको क्षेत्र नम्बर २ बाट उम्मेदवार रहेका नेपाली काँग्रेसका नेता किशोरसिंह राठौरलाई स्थानीय जनताले जनावर र मानव बस्ती व्यवस्थापन गर्न सुझाव दिएका छन् । बाँके र बर्दिया निकुञ्जका कारण दिनहुँजसो जंगली जनावर बस्तीमा पस्ने, हिँस्रक जनावरको आक्रमणबाट मानिसको मृत्यु हुने क्रम बढ्दै गएपछि मध्यवर्ती क्षेत्रसहित बाँके र बर्दियाका धेरै क्षेत्रका मानिसले असुरक्षा महसुस गरेका छन् । पछिल्लो दिनमा मानव र जनावरबीचको द्धन्द्ध थप बढ्दै जाँदा त्यो विषय अहिले सबैभन्दा पेचिलो बन्दै गएको छ । नेपाली काँग्रेसका स्थापित तथा प्रभावशाली नेता निर्वाचनमा आफ्नो क्षेत्रबाट उम्मेदवार भएकाले उनलाई आफूहरुको पिरमर्का सुनाएको र सम्बोधन हुने विश्वास पनि लिएको ठाकुरबाबा नगरपालिका ३ का कमानसिंह साउद बताउँछन् । स्थानीय कौशिला टमटा विगतमा बर्दियामा विकासका थुप्रै कामको अगुवाई गरेका नेता राठौरले मानव–वन्यजन्तु द्वन्द्व न्यूनीकरण, कृषकका समस्या, सडक, पुल पुलेसालगायत समस्या समाधान गर्ने विश्वास दिएको बताउँछिन् । नेता राठौरले स्थानीय जनतासंग भेटघाट गर्नुका साथै ई–सुझाव संकलन गरिरहेका छन् । जसमा जनावर र मानव बस्ती व्यवस्थापन सहितका निकै धेरै विषयका सुझावहरु आएको ठाकुराबाबा नगरपालिकाका मेयरसमेत सरहेका स्थानीय काँग्रेस नेता तिलक लम्सालले बताए । काँग्रेस नेता राठौर २०७९ को निर्वाचनमा बाँकेको क्षेत्र नम्बर–३ बाट उम्मेदवार थिए । उनी उक्त निर्वाचनमा २९ हजार ४० मतसहित विजयी भएका थिए । निकट प्रतिस्पर्धी एमालेका तत्कालीन जिल्ला अध्यक्ष किश्मतकुमार कक्षपतिले २४ हजार २ सय ४७ मत ल्याएका थिए ।
